Sano Inatey so Inad-arom

Manga alas siete na labi ed saman, Martes, Hulyo 17, 2007, kinmudyas ed runway so sakey a pampasaheron eroplano diad sankaokupadoan ya airport na Brazil, a walad sentro na São Paulo. Tinurubos toy baleg a karsada na syudad insan binmangga ed simpenay kargamento. Manga 200 a totoo so inatey ed saman ya aksidente.

SAYAN agawa a tinawag a sankagrabian ya aksidente ed eroplano diad Brazil so agnalinglingwanan na saramay inateyan. Si Claudete so sakey ed sikara. Sikatoy manbabantay na TV sanen abalitaan ton nan-crash so sakey ya eroplano. Akalugan so anak ton si Renato ed satan ya eroplano. Duamplo tan anem años to ni labat tan plano toy mangasawa no Oktubre. Desperadon tinawagan nen Claudete so cell phone na anak to, balet anggapoy oneebat. Sikatoy nalmay tan agaylay panugaog to.

Inatey so nobyo nen Antje ed sakey ya aksidente ed luluganan nen Enero 1986. Sanen naamtaan to itan, masyadoy impakabigla to. “Diad gapo et agak makapanisia. Abaloan kon nababangongot ak labat tan kabangon ko et naamtaan ko lanlamang ya aliwa manaya iyan tua. Manggiwgiw ak tan teribli sakit na lusok ko, a singano walay nambulasok ed siak.” Diad tinmumbok a taloy taon et awalaan si Antje na depresyon. Anggaman masulok a 20 a taon lay apalabas manlapud samay aksidente, sikatoy manggiwgiw nin siansia sano nanonotan to so agawa.

Agnipaliwawa ed salita so pakabigla, agpanisia, agpakalikna, tan inkadesperado lapud ontan a trahedya odino ed ag-inilaloan ya ipatey na inad-aro. Balet, anggan sano say inad-aro tayo et abayag lan mansasakit tan amta tayon magano lan ompatey, siansia nin nalikna tayo so pinasyan ermen. Anggapoy siopaman a talagan akaparaan ed ipatey na inad-aro to. Alaen pan alimbawa si Nanci, a say ina to et abayag a nansakit. Sanen inatey so ina to nen 2002, ontan lay impakabigla to a sikatoy nipalespak ed ospital. Parad sikato, singano anggapo lay kabaliksan na bilay. Limaran taon lay linmabas balet siansia nin agto napokpokay makaakis sano nanonotan toy ina to.

“Saray totoon inateyan et agda nalingwanan itan, noagta nipasal da labat,” so kuanen Dr. Holly G. Prigerson. No inateyan ka na inad-aro, biglaan man itan odino andi, nayarin nitepet mo: ‘Normal kasi manermen? Panon kon nalabanay ermen ed impatey na inad-arok? Nanengneng ko ni kasi lamet?’ Saratan a tepet tan saray arum ni ra so ebatan na ontumbok ya artikulo.

[Picture Credit Line ed pahina 3]

EVERTON DE FREITAS/AFP/Getty Images