Ibangat Yo Iray Anak Yo

Asalim la Kasi Nanimon? Ontan so Alikna na Saray Agagi nen Jose

PANTONGTONGAN tayo pa so kabaliksan na panimon. Nanairapan ka kasin miulop ed sakey a too lapud ta ibabaga na arum a sikatoy maong, guapo, odino matalino? *​— Bueno, ontan so nayarin nagawa no paniimonan moy sakey a too.

Onlesa so imon ed pamilya no ipapanengneng na ateng a walay paborito ton anak. Isasalaysay na Biblia so nipaakar ed sakey a pamilyan lapud imon et agaway baleg a problema. Konsideraen tayoy epekto na saya, tan no anto so naaralan tayo ed sayan agawa.

Si Jose et koma-11 ya anak nen Jacob, tan saray agagi to’d ama et nanimon ed sikato. Antam no akin?​— Lapud ta say ama ran si Jacob et paborito ton anak si Jose. Alimbawa, impagawaan nen Jacob si Jose na balibalin kawes. Mas inaro nen Jacob si Jose “lapud nianak nen matatken la [si Jacob],” tan si Jose et panguloan ya anak na inar-aro ton asawa a si Raquel.

Ibabaga na Biblia a sanen anengneng ‘na saray agagi nen Jose a babaleg so panangaro na ama ra ed sikato nen sikara ya amin, ginulgula ra si Jose.’ Insan sakey ya agew et inistorya nen Jose ed pamilya to so nipaakar ed kugip to ya amin ira et tinmuek ed sikato, pati say mismon ama to. “Saray agagi to inib-ibegan [odino nanimonan] da,” so kuan na Biblia, tan sikatoy nampasnokan ni ingen na ama to lapud impangistorya to ed satan.​—Genesis 37:1-11.

Ag-abayag, sanen si Jose so manedad na 17, saray agagi to so linma’d arawin pasen pian mangipastol na saray karnero tan kanding na pamilya ra. Kanian imbaki nen Jacob si Jose pian nengnengen so kipapasen na saray agagi to. Antam ta no anto so labay a gawaen na maslak ed sikara sanen anengneng dan sikatoy onsasabi?​—  Labay dan pateyen! Balet duara ed saray agagi to, si Ruben tan Juda so ag-inmabuloy.

Nen onlalabas iray managtagilako a mamaarap ed Ehipto, inkuan nen Juda: “Sikato so ilako tayo.” Kanian ontan so ginawa ra. Insan ira amatey na sakey a kanding tan intaksaw da so kawes nen Jose ed dala na satan. Diad saginonor, sanen impanengneng da so kawes ed ama ra, oniay inyakis nen Jacob: ‘Walay mauges ya ayep a nambuag ed si Jose!’​—Genesis 37:12-36.

Sinmabi panaon, agamoran nen Jose so pabor nen Faraon, say ari na Ehipto. Diad tulong na Dios, nipatalos to so duaran kugip nen Faraon. Say inmunan kugip et nipaakar ed pitoran mataban baka tan pitoran mabeng a baka. Say komaduan kugip et nipaakar ed pitoran dawa a maiyan tan pitoran dawa ya apa. Imbaga nen Jose a pareho so kabaliksan na duaran kugip, salanti, pitoran taon a dakel so aanien, insan onsublay so pitoran taon na eras. Unong ya ingganggan nen Faraon, si Jose et nagmaliw a manangasikaso ed panagtipon na naakan legan na saray taon a maong so aanien pian naparaanan so eras.

Nen sinmabi so nipasakbay a panaon na eras, say pamilya nen Jose, a manaayam ed arawin pasen et mankaukolay naakan. Imbaki nen Jacob ed Ehipto so samploran kuya nen Jose pian mangaliw na naakan. Akiarap ira ed si Jose, balet sikatoy agda abidbir. Diad ag-impangipakabat ed inkasikato, sinubok nen Jose iray agagi to, tan naamtaan ton nagbabawian dan maong so aliwliwan impantrato ra’d sikato nensaman. Insan to la’d satan imbaga a sikato si Jose. Insan ira nanlalakapan ta agaylay liket dan makapannenengneng lamet!​—Genesis, kapitulo 40 anggad 45.

Anto so naaralan mo nipaakar ed imon diad sayan alimbawa ed Biblia?​— Say imon et manresulta’d baleg a problema, sengegan ni ingen iya pian sakitan na sakey so mismon agi to! Basaen tayo so Gawa 5:17, 18 tan Gawa 7:54-59 tan nengnengen tayo so resulta na impanimon na saray totoo ed saray babangatan nen Jesus.​— Kayari iyan basaen, kasin anengneng mo no akin a nepeg tayon manalwar ed pagmaliw a maimon?​—

Si Jose et nambilay na 110 a taon. Sikatoy awalaan na saray anak, apo, tan apo-ed-pueg. Maseguro itayo a mabetbet iran binangatan nen Jose a manaaroan tan ag-ira maniimonan.​—Genesis 50:22, 23, 26.

[Paimano ed leksab]

Tepetepet:

○ Anto so kabaliksan na pagmaliw a maimon?

○ Lapud imon, antoy ginawa na saray agagi nen Jose?

○ Akin a pinerdona nen Jose iray agagi to?

○ Anto so naaralan tayo’d sayan alimbawa ed Biblia?