Kasin Antam La?

Akin a labi so pangigagapo na saray Judio no ngilinan day Sabaton?

Sanen inter nen Jehova ed saray totoo to so ganggan nipaakar ed Agew na Pananakbong, inkuan to: “Agkayo manggagawa na anggan anton nengneng na kimey ed satan lanlamang ya agew. . . . Sikato naani ed sikayo so sakey a sabaton a masimpit [odino kompleto] a pampainawa. . . . Manlapud [kaselek na agew] ya angga ed sakey a [kaselek na agew] so nepeg yo a pamalabas na sabaton.” (Levitico 23:28, 32) Ipapanengneng na sayan ganggan a say sanagew et onggagapo ed labi, odino kaselek na agew, tan mansampot ed onsublay a kaselek na agew. Ontan so panmoria na saray Judio.

Sayan estilo na panagbilang ed saray agew et inalig a mismo ed samay inletneg na Dios. Diad salaysay nipaakar ed unonan piguratibon agew na panamalsa, oniay nabasa tayo: “Linmabas so labi tan sinmabi kabuasan, sikato ya so unaan ya agew.” Ontan met so impanukoy ed sinmusublay iran “agew,” a ginmapo ed “labi.”​—Genesis 1:5, 8, 13, 19, 23, 31, Maung a Balita.

Aliwa labat a saray Judio so walaan na onian panmoria, noagta pati saray taga Atenas, saray Numidian, tan saray taga Fenicia. Balet, duma’d saray taga Babilonia, ta diad sikara et onggapo so sanagew ed kabutay na agew. Bangta diad saray Ehipsio tan Romano et manlapud pegley-labi ya anggad onsublay lamet a pegley-labi, a singa say uusaren tayo natan. Anggaman ontan, angga ni’d natan et siansia nin gagapoan tan sasampotan na saray Judio so panagngilin da’d Sabaton diad kaselek na agew.

Anto so tutukoyen ya ‘aakaren ed agew na sabaton’?

Kayarin atasian so insegep nen Jesus ed tawen manlapud Palandey na saray Olibo, saray disipulo to so amawil ed Jerusalem, ya ‘aakaren ed agew na sabaton.’ (Gawa 1:12) Say sakey a managbiahe et makapanakar ed loob na sanagew na manga 30 kilometro odino onsulok ni. Anggaman ontan, asingger labat ed Jerusalem so Palandey na saray Olibo. Kanian, anto sirin so kabaliksan na saray salitan ‘aakaren ed agew na sabaton’?

Say Sabaton et agew na pampainawa na saray Israelita manlapud inagew-agew a kimey da. Anggan say pamarngat na apoy ed kaabungan ed satan ya agew et insebel. (Exodo 20:10; 35:2, 3) Oniay ingganggan nen Jehova ed sikara: “Agkayo onaalis, balang sakey a too ed pasen to, anggapo komon so too ya ompaway ed pasen to no komapito ya agew.” (Exodo 16:29) Sayan ganggan so mangiter na pankanawnawa ed saray Israelita pian makapanpainawa ira’d saray inagew-agew a kimey da, ontan met pian niyapasakey day imano ra’d saray espiritual a bengatla.

Lapud ag-inkakontento ed saray prinsipyon walad saray Ganggan nen Jehova, saray panatiko ed ganggan a rabbi [odino managbangat] so angipaakseb na eksakton totontonen no kaunongan karukey so distansian naabuloyan ya akaren ed panaoy Sabaton, singa bilang no onla ran mandayew. Nipaakar ed saya, oniay inkomento na Cyclopedia of Biblical, Theological, and Ecclesiastical Literature: “Bilang resulta na mapeget a ganggan nipaakar ed panagngilin ed Sabaton . . . , impaakseb da ya anggapoy Israelitan naabuloyan a manakar ya onlampas ed espisipikon distansia, a tatawagey aakaren ed agew na Sabaton.” Satan a distansia et 2,000 kasiko, a kapetekan toy 900 metro ya anggad sakey kilometro.

[Litrato ed pahina 11]

Itsura na Jerusalem no bantagen manlapud palandey na saray Olibo