Alig Yoy Pananisia Ra

“Ninodnonot To ed Puso To”

AGKOMPORTABLE si Maria legan ya akalugan ed sakey ya asno, lapud pigay oras la ran manbiabiahe. Si Jose balet et manetengteng ed asno diad dalan a mamaarap ed arawin Betlehem. Alikna lamet nen Maria a ginmalaw so ugaw ed eges to.

Ipapanengneng na Biblia ya asingger lan mananak si Maria. (Lucas 2:5) Legan a nadadalan na sanasawa iray kaumaan, nayarin arum ed saray dumaralos et onnenengneng ed sikara legan a saraya et manbabaka tan mantatanem, tan nayarin pankelawan da no akin a sayan bii et manbiabiahe ni anta magano lan mananak. Akin a tinaynan nen Maria so abung to’d Nazaret tan linma ed arawin pasen?

Pigaran bulan sakbay na satan a biahe, sayan marikit a Judio et akaawat na agnaparaan a pribilehyo. Sikatoy mangiyanak ed ugaw a magmaliw a Mesias, say Anak na Dios! (Lucas 1:35) Legan a manasingger so pananak to, kakkaukolan met la ran manbiahe. Diad sayan biahe, dakel so nipaarap ed si Maria a pakasubokay pananisia to. Konsideraen tayo pa no anto so tinmulong ed sikaton napansiansian mabiskeg so pananisia to.

Impanbiahe Paarap ed Betlehem

Wala ra met so kaiba di Jose tan Maria a manbiahe lapud kapkapangiganggan ni labat nen Cesar Augustos a kaukolan ya ompawil iray totoo ed lugar a nianakan da pian manparehistro. Kasin tinulok iya nen Jose? Oniay nabasa tayo: “Et si Jose met, nanlapu ed Galilea, ed syudad a Nazaret, linma ed Judea, ed syudad nen David a manngaran na Betlehem, lapud no tinmubo ed abung tan kailalakan nen David.”​—Lucas 2:1-4.

Aliwan nibanbana labat iman a ganggan nen Cesar. Walay propesiyan nisulat, 700 a taon lay apalabas, ya angibagan say Mesias et nianak ed Betlehem. Dugaruga met a walay sakey a baley a manngaran na Betlehem, a 11 kilometro labat so kaarawi to’d Nazaret. Anggaman ontan, espisipikon imbaga na propesiya a diad “Betlehem Efrata” so kianakan na Mesias. (Miqueas 5:2, Maung a Balita) Diad sayan panaon, satan a melag a baley et walad abalaten na Nazaret. Nipalpalandey iray dalan a mamaarap ditan tan say kaarawi to et ngalngali 150 a kilometro manlapud Nazaret. Satan imay Betlehem a laen nen Jose, lapud ditan so nanayaman na pamilya nen Arin David, salanti, say pamilya a nanlapuan nen Jose tan say asawa ton si Maria.

Kasin mikoopera si Maria ed desisyon nen masiken ton onla? Nagkalalo la ta ni sikatoy talagan nairapan a manbiahe. Nayari pa lagin say panaon diad saman et kagapogapo ni labat na autumn, kanian posiblin mantay-tayaketek legan a mansamposampot so tiagew. Sakey ni, say Betlehem et walad atagey a pasen, a manga 2,500 a piye so kaatagey to. Talagan agaylay irap iyan tatdangen, ya ombayag ed pigaran agew. Ontan met, say kipapasen nen Maria et mankaukolan na mabetbet a painawa, kanian mas ombayag so biahe ra nen say arum. Legan a manasingger so pananak na sakey a bii, mas lablabay to so mansiansia ed dilin abung to, no iner kaiba toy pamilya to tan saray kakaaro ton akaparaan ya ontulong ed sikato, sano manpasakit la. Kanian agpanduaruwaan a kaukolan nen Maria so inkakpel pian mila ed sayan biahe.

 Anggaman ontan, unong ed insulat nen Lucas, si Jose et linma a “manparehistro a kaiba nen Maria.” Impaimano to met a si Maria et “magmaliw lan asawa [nen Jose] unong ya akisipanan to.” (Lucas 2:4, 5, NW) Say impagmaliw nen Maria ya asawa nen Jose et angimpluensyan maong ed saray desisyon to. Minoria toy masiken to a mangidadaulo ed sikato diad panagdayew ed Dios, a binidbir to so inter na Dios a betang to bilang katulongan na asawa to diad impanuporta ed saray desisyon na masiken to. * Kanian atalonaan to iyan posiblin subok ed pananisia to panamegley na katutulok.

Anto ni so nayarin amakiwas ed si Maria ya ontulok? Kabat to kasi so propesiya nipaakar ed Betlehem, a ditan so kianakan na Mesias? Ag-itan ibabaga na Biblia. Nayarin kabat to so nipaakar ed propesiya, lapud kabkabat itan na saray papangulo na relihyon tan anggan saray ordinaryon totoo. (Mateo 2:1-7; Juan 7:40-42) No nipaakar ed saray Sulsulat, aliwan ignorante si Maria. (Lucas 1:46-55) Antokaman so rason ed intulok nen Maria et sikatoy angipanengneng na agaylan abig ya alimbawa, balanglan say impangunor ed samay ganggan, say intulok ed si masiken to, say dilin propesiya nen Jehova, odino amin na saraya. Aapresyaen a maong nen Jehova iray mapaabeba tan matulok a lalaki tan bibii. Diad sayan panaon tayo a kaslakan lan agpapablien so katutulok, say ehemplo nen Maria et sakey ya alay abig a giya parad saray matoor a totoo, iner man so kawalaan da.

Nianak so Kristo

Seguradon nainawaan si Maria sanen anengneng ton asingger la ra’d Betlehem. Legan a sikaray ontatatdang et nalalabasan da iray panagtanemay olibo, sakey ed saray sankaunoran ya aanien, a nayarin angipanonot ed sikara diad samay istorya na satan a melag a lugar. Sayan baryo et melmelag no ikompara ed saray angkakabaleg a syudad na Juda, a singa imbaga nen propetan Miqueas; ingen diad sayan lugar nianak si Boaz, Naomi, tan kayari da et si David, masulok a sanlibon taon lay apalabas.

Dakdakel so asabian di Maria tan Jose a totoo ed saman a baryo. Saraya et akauna lan sinmabi a manparehistro, kanian anggapo la so naromog dan panayaman. * Anggapoy nagawaan da noag say onugip ed sakey a kuwadra. Isip yo pa labat so itsura nen Jose legan ton nanenengneng so asawa ton maniirap a maong, a lalon onloloor ni diad ilalabas na saray oras. Diad karakel na lugar, dia ni’d sakey a kuwadra ginmapon manpasakit.

Natatalosan na saray bibii so irap nen Maria. Manga 4,000 a taon ed asasakbay, impasakbay nen Jehova ya amin a bibii et nairapan a mananak lapud atawir a kasalanan. (Genesis 3:16) Anggapo so paneknek tayon agnanirap si Maria. Say sulat nen Lucas et ag-angiter na espisipikon detalye ed irap ya alikna nen Maria, noagta inkuan to labat ya: “Et inyanak to so anak ton panguloan.” (Lucas 2:7) On, say “panguloan” ed manga pitoran anak nen Maria et nianak la. (Marcos 6:3) Ingen, sayan ugaw et talagan magmaliw a nikadkaduma. Aliwa labat a lapud sikatoy panguloan nen Maria, noagta sikatoy “panguloan ed amin a  pinalsa” nen Jehova tan say alenleneg ya Anak na Dios!​—Colosas 1:15.

Diad sayan pankanawnawa et niarum imay kabkabat a detalye: “Sikato so pinonggos to na lamping, tan imparukol to ed sakey ya atotong.” (Lucas 2:7) Say inkianak nen Jesus et ipapanengneng diad saray palabas, saray painting, tan diad saray Belen diad madrama tan aliwan realistikon paraan. Balet isip yo pa so talagan agawa. Say atotong et sakey a panagpakanan na saray ayayep. Siempre agmo ilaloan a malinis tan ambalingit so angob na samay kuwadran tinuloyan dan pamilya. Agta anggapo so siopaman ya ateng a malabay a mananak ed ontan a pasen, no wala labat so pampilian to? No labalabay na maslak ya ateng so sankabalibalian parad saray anak da, di mas nagkalalon labalabay di Jose tan Maria so mangiter na sankabalibalian a bengatla parad Anak na Dios!

Anggaman ontan, agda inabuloyan so kipapasen da a mamaermen ed sikara, noag ingen, inusar da so antokaman a walad sikara pian niiter so sankaabigan parad anak da. Singa bilang, si Maria a mismo so angasikaso ed samay kapkapangiyanak nin ugaw, a maalwar ton binalkot na lamping, tan insan to imparukol ed sakey ya atotong pian makaugip, a sinegurado ton samay ugaw et agnaketel tan arawi ed kapeligroan. Agmet inabuloyan nen Maria so antokaman a kapagaan to ed situasyon da a mangisturbo ed maabig a pangaasikaso to’d pankaukolan na anak to. Amta ran dua nen Jose a say panuporta ra’d sayan ugaw diad panagdayew to’d Dios so sankaimportantian a bengatla a nagawaan da parad sikato. (Deuteronomio 6:6-8) Diad sayan panaon tayo, panseseetan met na saray makabat ya atateng ya unaen so panulong ed saray anak da pian panlingkoran so Dios, anggaman ag-iya importante ed dakel a totoo.

Say Makapabiskeg ya Imbisita

Biglan agulo so marendeen a kaliberliber. Mansasbi iray managpastol ed kuwadra, a manpipirawat a makanengneng ed pamilya, nagkalautla ed samay ugaw. Andi lay pitongtong na sarayan managpastol et say liket a nalilikna ra, a sankanengneng itan ed kalupaan da. Sikaray nanlalapud gilig na kapalandeyan a pangipapastolan da ed saray ayayep da. * Imbaga ra’d nikelawan a Maria tan Jose so nikadkaduman naeksperiensya ra. Diad saman a labi et nampanengneng so sakey ya anghel ed sikara diad gilig na kapalandeyan. Sinmindag so gloria nen Jehova ed interon kaliberliber, tan inkuan na anghel ed sikaran say Kristo, odino Mesias et nianak la diad Betlehem. Naromog da so ugaw ed sakey ya atotong, ya abalkot na saray lamping. Insan, wala ni mas makapakelaw a bengatlan agawa, nadngel da so maksil a kansion na saray anghel, a mangakanta na panangidayew ed Jehova!

Agsirin pankelawan no akin a sarayan mapaabeban lalaki et nanapuran linma ed Betlehem! Talagan agaylay liket dan akanengneng ed akarukol a kapkapangiyanak ya ugaw unong ed impaneskribe na anghel. Agda insekreto iyan maong a balita, noagta, “impakabat da so balita . . . Et amin so saray akadngel, nankelaw ira ed saray imbaga ed sikara na saray pomapastol.” (Lucas 2:17, 18) Wala so magenap a paneknek a saray pomapastol et memelmelagen na saray relihyoson lider nensaman. Balet, malinlinew a sarayan mapaabeba tan matoor a lalaki et importante ed si Jehova. Ingen, anto so epekto na sayan imbisita ed si Maria?

Seguradon si Maria et naknaksawan lapud irap na impananak to, balet sikatoy tinmalineng ed amin ya imbaga ra. Tan wala ni so arum a ginawa to: “Si Maria inem-eman [odino tinandaan] to so saraya ya amin a bengatla, a ninodnonot to ed puso to.” (Lucas 2:19) Talagan momorekdeken nen Maria iray bengatla. Amta ton sayan mensahe a nanlapud anghel et im-importante. Labay na Dios to, si Jehova, a nakabatan tan apresyaen a maong nen Maria so pakabidbiran tan kaimportantian na anak to. Kanian sikatoy aglabat dinmengel. Inyatol to met iratan ed puso to, a singa panangibaga, pian nodnonoten to iratan diad ontumbok iran bulan odino taotaon. Akatulong iyan maong ed pananisian impatnag nen Maria ed interon bilay to.

 Labay mo kasin aligen so ehemplo nen Maria? Pinano nen Jehova na dakel iran importantin katuaan so Salita to. Anggaman ontan, daiset labat so nitulong ed sikatayo na saratan a katuaan no agtayo itan imanoen. Nagawaan tayo itan no inagew-agew tayon basaen so Biblia, aliwa labat a bilang sulsulat, noagta bilang impuyan a Salita na Dios. (2 Timoteo 3:16) Insan, singa ed ginawa nen Maria, kaukolan ya iyatol tayo ed puso tayo iray katuaan a naaralan tayo nipaakar ed Dios tan paaralemen tayo so pakatalos tayo ed saratan. No lawas tayon nodnonoten so nababasa tayo’d Biblia tan isipen no panon tayon nagkalalon niyaplika iray simbawa nen Jehova, napabiskeg tayoy pananisia tayo.

Kaaruman nin Balikas ya Ipapuso

Diad komawalon agew na samay ugaw, sikatoy impasegat di Maria tan Jose unong a kakaukolanen na Mosaikon Ganggan, tan tinawag da a Jesus so ngaran to unong a niganggan ed sikara. (Lucas 1:31) Insan diad koma-40 ya agew to, sikatoy inyakar da ed templo diad Jerusalem, a pigaran kilometro kaarawi manlapud Betlehem pian mangiyapay na bagat a panaggogol, panamegley na duaran palekpek odino duaran malapati ya unong ed Ganggan et parad saray mairap bilay. No bilang ta sikaray nababaingan lapud ag-ira makapangibagat na sakey a kalakian a karnero tan sakey a palekpek a sarag ya ibagat na arum ya ateng, imbaliwala da so ontan a liknaan. Antokaman ni so kipapasen, sikaray akaawat na panamaseseg legan a sikaray wadman.​—Lucas 2:21-24.

Wala so inmasingger ed sikaran sakey a masiken a manngaran na Simeon tan sikatoy angiter na kaaruman nin balikas a pinabli nen Maria ed puso to. Nisipan ed sayan masiken a sakbay na ipatey to et nanengneng to ni so Mesias, tan imbaga ed sikato panamegley na masanton espiritu nen Jehova a sayan ugaw a Jesus et sikato imay nipasakbay a Manangiliktar. Pinasakbayan met nen Simeon si Maria ed irap a kaukolan ton sungdoan. Inkuan to a singa itan sakey ya espada ya ontalos ed sikato. (Lucas 2:25-35) Anggaman makapataktakot iratan a salita, siansia nin tinmulong iratan ed si Maria pian natalonaan to itan a mairap a panaon kayari na taloran dekada. Kayari nen Simeon, anengneng met nen propetesan Ana so ugaw nin Jesus tan ginapoan ton imbalita iya diad amin a maliket a maniilalo ed kiliktar na Jerusalem.​—Lucas 2:36-38.

Talagan alay dakep a desisyon imay impangawit di Jose tan Maria ed ugaw nin anak da ed templo nen Jehova diad Jerusalem! No parad si Jesus, saya et gapoan ni labat na matoor ya iyaatendi to ed templo nen Jehova legay bilay to. Legan iran wadman, ginawa ray anggaay nayarian da pian makapanlingkor ed Dios unong ed pakasarag da. Tan sikaray akaawat na saray instruksion tan panamaseseg. Seguradon mas binmiskeg so pananisia nen Maria, tan say puso to et napno na saray importantin katuaan a lanang ton nodnonoten tan inanabang ed arum.

Talagan makapaliket so pakanengneng ed saray atateng natan a mangaalig ed sayan ehemplo. Diad limog na saray Tasi nen Jehova, matoor ya aawiten na saray ateng so ugugaw nin anak da ed saray Kristianon pantitipon. Sarayan atateng et manggagawa na anggaay nayarian dan manlingkor ed Dios, a papasesegen da met iray kapara ran mananisia. Kayari inyatendi ra ed sarayan pantitipon, sikaray mas binmiskeg, maliket, tan napnoay maabig a bengatlan inabang ed arum. Iimbitaan mi kayon onatendi pian nakabat ira. No awaten yo iyan imbitasyon, nalikna yon mas lalon ombiskeg so pananisia yo a singa si Maria.

[Saray paimano ed leksab]

[Litrato ed pahina 25]

Abendisyonan si Simeon diad impakanengneng ed nipasakbay a Manangiliktar