Panon a Tinmulong so Pananisiak Pian Arapen Iray Makapaermen ya Agawa

Unong ed istorya nen Soledad Castillo

Aminpiga ed bilay ko ya adaeg ak lawari na kaermenan​—balet ta alabanan ko itan. Sanen 34 años ko, inatey so inad-arok ya asawa. Kalabas na anem taon, inatey so tatay ko. Waloy bulan kalabas na impatey nen tatay ko, naamtaan kon say saksakey ya ana’kon laki et walay sakit ton agnatambal.

SAY ngaran ko et Soledad, a kabaliksan toy “Kaermenan.” Anggaman ontan, agkon balot aliknan bukbukor ko. Sanen inarap ko iray makapaermen ya agawa, panisiaan kon wadtan si Jehova a Dios, a mangitatabin ‘ed limak tan tutulongan to ak kanian agak tinmakot.’ (Isaias 41:13) Abuloyan yo ak pan mangisalaysay no panon kon alampasan iray makapaermen ya asagmak ko tan no panon a saratan so lalon amaasingger ed siak ed si Jehova.

Maliket a Bilay tan Daiset so Problema

Nianak ak ed Barcelona, España, nen Mayo 3, 1961, tan saksakey ak ya anak na atateng kon si José tan Soledad. Sanen mantaon ak na siamera, naaralan nen nanay ko so katuaan na Salitay Dios. Inanap to iray ebat na saray tepet to nipaakar ed relihyon balet ta agto aromog so makapenek ya ebat ed kawalaan ton relihyon. Sakey ya agew, duaran Tasi nen Jehova so binmisita ed sikato diad abung tan naebatan so amin a tepet to manlapud Biblia. Sikatoy tampol ya impaiyaralan na Biblia.

Ag-abayag, si nanay ko so abautismoan bilang Tasi nen Jehova, tan kalabas na pigaran taon, inalig nen tatay ko so ehemplo to. Si Eliana, ya angiyaral ed si nanay ko, so akaimano ed interes ko ed Biblia. Anggaman ugaw ak ni, insuheri nen Eliana ya iyaralan to ak a biig. Lapud tulong to tan ed panamaseseg nen nanay ko, abautismoan ak sanen 13 años ko.

Legan na inkatin-edyer ko, mabetbet ak a manpipikasi ed si Jehova​—nagkalalo la sano mandedesisyon ak. Diad tua, daiset so problemak legan a wala ak ed kalangweran. Diad kongregasyon, dakel so kakaarok, tan maapit so relasyon ko ed atateng ko. Nen 1982, akiasawa ak ed si Felipe, sakey a Tasi a labay to met a napaaligwas so panaglingkor to ed si Jehova a singa siak.

Panamabaleg ed Anak Mi a Mangaro ed si Jehova

Apalabas so limaran taon, inyanak ko so malimlimgas ya ugaw a laki ya inngaran min Saúl. Panliketan mi nen Felipe so nawalaan na anak. Inilaloan mi ya ombaleg si Saúl a maong so bunigas to tan makalakal ya ugaw a walaan na panangaro ed Dios. Baleg a panaon so inusar mi ed si Saúl, ya itotongtong mi ed sikato so nipaakar ed si Jehova, sankakaiba kamin mamangakan, ipapasyar  mi ed parki, tan migagalaw kami met ed sikato. Labalabay nen Saúl so mila ed si Felipe ed panginabang na saray katuaan na Biblia ed arum, tan sikatoy impibiang nen Felipe ed panagpulong manlapud inkaugaw to, ya imbangat ton man-doorbell tan mangiyopresi na saray angkelag iran pampleta ed totoo.

Maabig so inkiwas nen Saúl ed panangaro tan panangipasal mi. Diad taon ton anemira, sikatoy regular a mimila ed sikami a manpulong. Labalabay toy ondengel ed saray istorya ed Biblia, tan pitalaran toy panagaral mi na Biblia bilang pamilya. Ag-abayag sanen maneskuela la, sikatoy ginmapon manggawa na angkelag iran desisyon base ed amta to ed Biblia.

Balet, sanen mantaon la na pitora si Saúl, biglan anguman so bilay na pamilya mi. Naimpektaan na virus iray bala nen Felipe. Diad loob na 11 a bulan, sikatoy nanirap ed sakit to, ya agto sarag so mantrabaho tan mabetbet ya akarukol. Diad edad ton 36, inatey si asawak.

Siansian makaakis ak no nanonotan ko itan a mairap a taon. Banbantayan koy asawak a kalkalnan nadadaeg na virus, tan anggapoy nagawaan ko. Sanlegan na satan, nanggunaetan kon pasesegen si Felipe, anggaman diad dalem na liknaan ko et imposible lan nagawa iray ninonot ko tan implanok parad pamilya mi. Sikatoy imbabasaan ko na saray nibase ed Biblia ya artikulo, tan saraya so amabiskeg ed sikami sano agkami makaatendi ed saray pantitipon na Kristiano. Sanen sikatoy inatey, aliknak so pirmin kaermenan.

Balet, tinulongan ak nen Jehova. Naynay kon impikasi ed sikato a pabiskegen to ak. Akisalamat ak ed sikato lapud maliket iran taon a kaibak si Felipe tan ed ilalon pakanengneng lamet ed si asawak sano onoli ed bilay. Impikasik ed Dios a tulongan to ak a magmaliw a maliket diad pannonot ed saray panaon ya impaniba mi nen asawak tan ikdan to ak komon na kakabatan pian pabalegen so anak mi bilang tuan Kristiano. Aligliwa ak anggaman ed kaermenan ko.

Saray atateng ko tan saramay kakongregasyonan ko met so tinmulong a maong ed siak. Balet kaukolan ko nin siansia ya idaulo so pangiyaral na Biblia ed si Saúl tan ibangat no panon so panserbi ed si Jehova. Say datin amok so angiyopresi ed siak a mangopisina, balet nilabay koy trabaho a managlinis ta pian dakel a panaon so nausar ko ed si Saúl tan nakaibak kayari na eskuela to.

Sakey a teksto so angipurek ed siak na kaimportantiay panangipasal ed si Saúl ed saray dalan na Dios: “Ibangat mo so anak ed dalan a nepeg to a laen, tan anggan sano masiken la ag-onarawi ed sikato.” (Uliran 22:6) Sayan teksto so angiter ed siak na ilalo a no gawaen ko so anggaay nayarian kon itongtong ed si Saúl iray espiritual a bengatla, bendisyonan nen Jehova iray sagpot ko. Tua, kaukolan koy mansakripisyo ed pinansyal, balet kaukolan koy panaon pian nakaibak so ana’ko, tan saya so importantin maong ed siak nen say dinanman a materyal a pankaabigan.

Sanen mantaon na 14 si Saúl, inatey si tatay ko. Ansakisakit a maong ed si Saúl so impatey na laki to, lapud anonotan ton amin so sakit ya alikna to sanen inatey so mismon tatay to. Napanuliranan met si tatay ko ed panangipatnag na panangaro ed si Jehova. Kayari na saya, determinado  si Saúl a magmaliw a responsable lapud sikato labat lay laki ed pamilya, tan kaukolan ton asikasoen so nanay tan bai to.

Pilalaban ed Leukemia

Waloy bulan kayari impatey nen tatay ko, inkuan ed siak na doktor na pamilya mi a kaukolan kon awiten si Saúl ed hospital ed lugar mi, lapud sikatoy manlilikna na sobran inkakesaw. Kayari na nantutumbokan ya impan-eksamin ed sikato, imbaga na saray doktor ed siak a walay leukemia nen Saúl. *

Legan na ontumbok a duara tan kapalduan taon, pawilpawil si Saúl ed hospital legan ton lalabanan so kanser tan chemotherapy ya uusaren na saray doktor ed panggugunaet dan labanan itan. Say inmunan anem bulan a panagtambal so nanresulta ed inkatempey ya asabi toy 18 bulan. Balet ta pinmawil so kanser, tan ondalan lamet si Saúl ed mas antikey iran sesyon na chemotherapy ya amakapuy a maong ed sikato. Atempey lamet so kanser ya agano, tan agla nayarian nen Saúl so komatlon chemotherapy. Indedika nen Saúl so bilay to ed Dios tan imbalikas toy pilalek ton nabautismoan bilang sakey ed saray Tasi nen Jehova, balet sikatoy inatey antis a mantaon na 17.

Mabetbet ya irekomenda na saray doktor so panagpasaksak na dala pian labanan so makapairap ya epekto na chemotherapy. Siempre, anggano saksakan na dala et ag-onabig so sakit to. Sanen inmunan asukayan na saray doktor so leukemia, kaukolan min ipalinew nen Saúl ya agmi awaten so panagpasaksak na dala, lapud labay min unoren so ganggan nen Jehova ya “onarawi . . . ed dala.” (Gawa 15:19, 20) Diad aminpigan inkagawa, kaukolan a kombinsien nen Saúl iray doktor a sarag to lay mandesisyon a bukor ed sayan pamaakaran anggano anggapo ak. (Nengnengen so kahon ed pahina 31.)

Say konklusyon na saray doktor et si Saúl so makapandesisyon la anggano menor-de-edad ni, a natatalosan ton maong so klase na sakit to. Nirespeto ra so talindeg mi tan inyopresi da ed sikami so panagtambal ya ag-usaran na dala, anggaman naynay da kamin pipiliten ya umanen so desisyon mi. Talagan pandinayewan koy Saúl sanen nadngel kon ipapaliwawa toy talindeg to ed saray doktor. Peteg a sikatoy walaan lay maapit a relasyon ed si Jehova.

Legan na tiagew, sanen naamtaan so sakit nen Saúl, say libron apauloan na Onapit ed si Jehova so impaway diad distriton kombension ed Barcelona. Satan a makanakanan libro so amabiskeg ed sikami sanen inarap mi iray anggapoy pakaseguroan ya arapen tan makapadismayan pansumpalan. Legan na saray oras ya impansiansia mi ed hospital, binasa min dua iray kabiangan na libro. Legan na dakel a mairap iran panaon ya inanosan mi ed saginonor, mabetbet min ninonot iray lugan na satan. Say teksto ed Isaias 41:13, ya abitla ed unonan parte na satan a libro, so makabkabaliksan ed sikami. Inkuan to: “Siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan ta ka naani.”

Say Pananisia nen Saúl so Anenyeg ed Kapusoan na Arum

Pandinayewan a maong na saray doktor tan nars diad Vall d’Hebrón Hospital so pakasarag la nen Saúl a mandesisyon tan ed inkapositibo to. Sikatoy labalabay na ulop na doktor ya angasikaso ed sikato. Nanlapu la’d saman, say chief hematologist a mangaasikaso ed saray walay kanser so angasikaso met la ed arum a Tasin ananak a walaay leukemia, tan nirespeto to iran maong. Nanonotan to ni imay agnauman a desisyon nen Saúl ya italindeg iray sisiaen to, say inkakpel ton mangarap ed ipapatey, tan say maliket a panmoria to ed bilay. Inkuan na ulop na nars ed si Saúl a sikatoy sankaabigan a pasyentin inasikaso ra ed saman a ward. Inkuan da a sikatoy agbalot nanreklamo  tan mapaelek ni​—anggan sanen sikatoy magano lan ompatey.

Inkuan na sakey a psychologist ed siak a dakel ya ugugaw, a walaan na ontan a makapatey a sakit ed ontan iran edad, so walay tendensian manrebelde ed saray doktor tan ed atateng lapud naaalipanesan tan naaandian la ray ilalo. Naimano to ya aliwan onman si Saúl. Parad sikato, makapakelaw so pakanengneng ed inkakalmado tan inkapositibo nen Saúl. Saya so angiter ed sikami nen Saúl na pankanawnawan pulongan imay psychologist nipaakar ed pananisia mi.

Nanonotan ko met no panon ya atulongan nen Saúl so sakey a Tasi ed kongregasyon mi. Sikatoy manlilikna na depresyon ed ngalngali anem taon la, tan anggapoy agawaan na pampapatambal to. Pigaran labi a sikatoy nambantay ed si Saúl diad hospital. Inkuan to ed siak a pandinayewan toy awawey nen Saúl a mangarap ed leukemia. Naimano to ya anggaman makapkapuy lay Saúl et papasesegen to ni ray ombibisita ed sikato. “Say ehemplo nen Saúl so angiter ed siak na pakpel a labanan so depresyon ko,” so inkuan na sayan Tasi.

Taloy taon la natan so linmabas nanlapu la’d impatey nen Saúl. Siempre, siansia nin ansakisakit itan ed siak. Aliwa ak a mabiskeg, balet inikdan ak na Dios na “pakayari.” (2 Corinto 4:7) Naamtaan ko ya anggan ed sankairapan tan makapaot-ot iran eksperiensya et walan walay positibon epekto. Lapud naaralan kon labanan so ermen ed impatey na asawak, tatay ko, tan say ana’ko, atulongan ak a lalon agmagmaliw a makasarili tan lalon makatalos ed arum a manasagmak na problema. Nagkalalo ed amin, satan so lalon amaasingger ed siak ed si Jehova. Antokaman so nagawa, sarag ko lan arapen iray bengatla ya anggapoy takot lapud siansia nin tutulongan ak na Amak ed tawen. Siansian itatabin to ak.

[Paimano ed leksab]

[Kahon/Litrato ed pahina 31]

KASIN PANKELAWAN YO?

Nayarin abalitaan yo la a saray Tasi nen Jehova so agmanpapasaksak na dala. Kasin pankelawan yo no akin?

Mabetbet ya aliway pakatalos na totoo ed sayan nibase ed Biblia a talindeg. No maminsan, say pakaamta na totoo et aglabay na saray Tasi nen Jehova so amin a klase na panagpatambal odino ibabaga ran agda papablien so bilay. Anggapoy katuaan na satan lapud aanapen na saray Tasi nen Jehova so sankaabigan a panagtambal parad sikara tan parad saray kapamilyaan da. Balet, aanapen da so panagtambal ya ag-uusaran na dala. Akin?

Say talindeg da so nibase ed manunan ganggan ya inter na Dios ed katooan. Sanen kasumsumpal na Delap ed panaon nen Noe, inabuloyan na Dios si Noe tan say pamilya to a sarag day mangan na karne. Balet walay sakey ya insebel na Dios: Agda kakanen so dala. (Genesis 9:3, 4) Amin a totoo et nanlapud poli nen Noe, kanian sayan ganggan so parad amin a katooan. Agbalot itan akansela. Kalabas na waloran siglo, pinaletan lamet na Dios itan a ganggan ed nasyon na Israel, ya impaliwawa ton say dala et sagrado, a mangirerepresenta ed kamarerwa, odino bilay a mismo. (Levitico 17:14) Apalabas so masulok a 1,500 a taon, ingganggan na saray Kristianon apostol so amin a Kristiano ya “onarawi ed . . . dala.”​—Gawa 15:29.

Parad saray Tasi nen Jehova, imposibli a naarawian so dala no iloob itan ed laman panamegley na panagpasaksak. Kanian say ipipilit da et saray panagtambal ya ag-uusaran na dala. Satan a nibase ed Biblia a talindeg so mabetbet a manreresulta ed mas atagtagey ya estandarte ed panagtambal. Kanian dakel met a totoo ya aliwan Tasi nen Jehova so malabay ed panagtambal ya ag-uusaran na dala.

[Litrato ed pahina 29]

Kaibak si asawak a Felipe tan say anak min si Saúl

[Litrato ed pahina 29]

Saray atateng kon si José tan Soledad

[Litrato ed pahina 30]

Si Saúl, sakey bulan antis ya ompatey