Saray Lua ed Katat a Botelya

SAYAN balolaki et sakey a takas. Lapud sikatoy manpapaga tan nagogonigon, tekep na saray matan mankirlap lapud lua, sikatoy kinmerew na panangasi tan panangabagey na Dios ton si Jehova, a kuan to: “Yan mo so saray lualuak ed [katat a] botelyam.” (Salmo 56:8) Satan a laki et si David, a diad saginonor et nagmaliw ya ari ed Israel. Balet anto imay tutukoyen ton katat a botelya, tan panon ya ikarga na Dios ditan iray lua tayo?

Pamilyar ed si David iyan katat a botelya. Uusaren iyan kargaan na danum, larak, alak, odino anggan mantikilya. Saray manteteyengteyeng a totoo ed Sahara, a singa saray Tuareg, et siansia nin manguusar ed sarayan katat a botelya, a ginawa’d interon katat na kanding odino karnero. Sarag a kargaen na sarayan katat a botelya so dakel a litro na danum, depende ed kabaleg na ayep ya angalaan na katat. Napansiansia na saraya so betel na danum, anggaman ed pirmin petang na desierto. Nensaman, kaslakan ya ipapasakbat iraya ed saray asno odino kamelyo. Natan et ompan makanengneng kayo ni ingen na sakey ed saratan ya akakarga ed arapan na luganan a parad desierto!

Saray makatenyeg na liknaan a balikas nen David nipaakar ed sayan katat a botelya et walaan met na kabaliksan ed sikatayo. Panon? Bueno, ibabaga na Biblia a si Satanas so mangokontrol ed sayan mundo tan sikatoy walaan na “baleg a sanok” diad panaon tayo. Bilang resulta, say mundo et makakasagmak na saray teriblin irap. (Apocalipsis 12:12) Satan so rason no akin a dakel a totoo, a singa si David, so makakasagmak na emosyonal, mental, tan pisikal ya irap, nagkalalo la’d saramay manggugunaet a mamaliket ed Dios. Kasin sakey ka ed sikara? Tekep na inkakpel, anggaman “mannangis” irayan matoor a totoo et mantutultuloy iran manggugunaet a manbilay a walaay katooran. (Salmo 126:6) Makaseguro iran nanengneng na Ama ran walad tawen, aliwa lambengat iray irirap a nasasagmak da, noagta say epekto na saratan ed emosyon da. Talagan natatalosan to so irap a sasagmaken na saray lingkor to, tan maabagey ton nononoten iray lua tan irirap da, a singa to iratan ikakarga ed sakey a katat a botelya.