Saray Nipasakbay a Nagawa ed Asingsingger Lan Arapen

SANEN ipapaliwawa nen apostol Pedro so nipaakar ed pansumpalan na too tan say dalin, oniay inkuan to: “Unong ed sipan to [Dios] alagden tayo so saray tawen a balo tan dalin a balo, a sikara so panaayaman na katunongan.” (2 Pedro 3:13) Say sipan nipaakar ed “tawen a balo tan dalin a balo” so akauna lan nipaamta panamegley nen propeta  Isaias. (Isaias 65:17; 66:22) Diad impangulit nen Pedro ed sayan propesiya, ipapanengneng ton agni itan sigpot ya agawa ed panaon to.

Diad saginonor, nen manga 96 C.E., say Apocalipsis a nisulat panamegley nen apostol Juan so angikonekta ed satan a “dalin a balo” ed saray bendisyon a nagamoran diad silong na Panarian na Dios. (Apocalipsis 21:1-4) Saray deskripsion nen Jesus tan apostol Pablo nipaakar ed saray kipapasen na mundo antis na isabi Panarian na Dios et nagagawa la natan. No ontan sirin, nailaloan tayo a magano lan ipagamor na Panarian so balon mundo. Antoray nailaloan tayo’d satan a balon mundo? Naamtaan tayo so ebat ed libro na Biblia ya Isaias.

Saray Bendisyon Diad Balon Mundo

Sankamundoan a Kareenan tan Nankakasakey a Panagdayew ed Dios. “Et pitpiten da naani so saray kampilan da a pagmaliwen da a dingding na lukoy, tan saray gayang da a komkompay, say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.”​—Isaias 2:2-4.

Kareenan ed Baetan na Saray Totoo tan Saray Ayayep. “Say lobo miayam naani ed kordero, tan say leopardo miakdol naani ed kanding, et say kilaw na baka tan kilaw na leon tan say pinataba mantitipon ira, et sakey a melag ya ugaw so mangitonton ed sikara. Et say baka tan say oso mankabkab ira naani, saray kilaw da ondukol ira a mantitipon, et say leon mangan naani na dayami a singa say baka. . . . Ag-ira naani mamaunong odino mamagbag dia ed amin a masanto a palandey ko, ta say dalin napano naani ed pikakabat ed Jehova, singa saray danum sakbongan da so dayat.”​—Isaias 11:6-9.

Dakerakel a Naakan Parad Amin. “Dia ed saya a palandey si Jehova na saray ehersito manggawa naani ed saray amin a baley na sakey a liket ed saray mataba a bengatla, sakey a liket na saray alak ed tapew na saray bolirek [odino gaer], saray mataba a bengatla a napno na utek, tan saray alak ed tapew na saray bolirek napaitneng ira.”​—Isaias 25:6.

Anggapo lay Patey. “Inakmon [na Dios] so patey ed ando lan ando, et say Katawan a Jehova punasen to naani so saray lua ya onagus ed saray amin a lupa, et say kabalawan na baley to ekalen to naani a manlapu ed amin a dalin, ta si Jehova sikato so sinalita to.”​—Isaias 25:8.

Ombilay Iray Inaatey. “Saray inaatey mo ombilay ira, saray inaatey a laman ko onalagey ira. Liing tan mankanta kayo, . . . tan say dalin ipaway da naani so saray inatey.”​—Isaias 26:19.

Matunong ya Ukom so Mesias. “Agnaani mangukom unong ed pakanengneng na saray mata to, agmet mangigeter unong ed pakadngel na saray layag to. Noag ingen dia ed kaptekan ukomen to so duka, tan mangigeter a situtunong nipaakar ed saray mauyamo ed dalin.”​—Isaias 11:3, 4.

 Onabig la Iray Bulag tan Telek. “Satan la nilukas so saray mata na bulag, tan say layag na saray telek nibuang naani.”​—Isaias 35:5.

Say Naklangan a Dalin et Magmaliw lan Mabuna. “Say kalawakan tan say amagan dalin magayaga ra naani, et say kabueran a lawak manliket naani, tan manbolaklak a singa bolaklak. Sikato manbolaklak naani na daakan, tan manliket a tekep na gayaga tan kankanta.”​—Isaias 35:1, 2.

Sakey a Balon Dalin. “Nia, mamalsa ak na saray balo a tawen [say balon mangatatawen a gobierno] tan balo a dalin [say balon sosyedad na too], ta saray inmuna a bengatla ag-ira la nanonotan, ag-ira la onla ed nonot. Balet manggayaga tan manliket kayo ed ando lan ando ed saman a palsaen ko. . . . Sikara [saray manayam ed balon mundon insipan na Dios] ipaalagey da naani so saray abung, tan manayam ira naani, et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam, ag-ira naani mantanem et sananey naani mangan. Ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra. Sikara ag-ira naani mankimey na maapa, ag-ira naani mananak a nipaakar ed kaderya, ta sikara so bini a benendisyonan nen Jehova, tan say simit da a pati sikara. Et nagawa naani a dia ed arapen na itawag da, onebat ak naani, et leleg na pansalita ra, talinengen ko naani.” “Ta singa saray balo a tawen tan say balo a dalin, a gawaen ko naani, mansiansia ra naani ed arapan ko, kuan nen Jehova, ontan naani so pansiansia na saray bini yo tan ngaran yo.”​—Isaias 65:17-25; 66:22.

Nipasakbay so Marakdakep ya Arapen

Aliwa labat a say libro na Biblia ya Isaias so angipasakbay ed sikatayo na saray bendisyon ed arapen. Karga na Biblia so dakerakel a propesiya a manideskribe ed makapakelaw iran bengatla a gawaen na Dios panamegley na Panarian diad uley nen Kristo. * Labay mo ta so manayam ed paraiso? On, sarag moy manayam ditan! Amtaen mo no anto so talagan ibabangat na Biblia nipaakar ed saray gagala na Dios parad arapen, tan aralen no panon kan magmaliw a kabiangan na satan. Malikeliket iray Tasi nen Jehova ya ontulong ed sika.

[Paimano ed leksab]

[Litrato ed pahina 8]

Niwalay kareenan ed baetan na totoo tan ed saray ayayep

[Litrato ed pahina 9]

Nabilay lamet iray inatey

[Litrato ed pahina 10]

Magmaliw a paraiso so interon dalin