Say Impangipropesiya ed Mesias

LAPUD amta na Judion nasyon no antoy insulat nen Isaias tan arum nin propeta nipaakar ed Mesias, abayag da lan tatalaranan so isabi to. Diad tua, nen panaon nen Jesus, dakel a Judio so “manaalagar” ed asingger lan isabi na Mesias. (Lucas 3:15) Sankaimano a kaiba’d saray propesiya na Biblia so makapadinayew iran detalye nipaakar ed bilay na Mesias. No diad dilin karunongan labat na too, anggapoy makapangipropesiya ed saratan ya ebento odino makapangiyuksoy pian nagawa iratan ed bilay nen Jesus diad dalin.

Saray Detalye Nipaakar ed Impangiyanak ed Mesias. Impropesiya nen Isaias a say Mesias, odino Kristo, et iyanak na sakey a birhen. Kayarin deneskribe nen apostol Mateo iray mamilagron nagawa ed kianak nen Jesus, oniay insulat na apostol: “Saya ya amin agawa pian nasumpal so sinalita na Katawan ed panamegley na propeta, a kuan to, Nia, say birhen manlukon naani, tan iyanak to so sakey ya anak a laki.” (Mateo 1:22, 23; Isaias 7:14) Impasakbay met nen Isaias a say  Kristo et manlapud poli nen David, ya espisipiko ton sinalambit si Jesse, say ama nen David. Si Jesus sirin et direktan nanlapud poli nen David. (Mateo 1:6, 16; Lucas 3:23, 31, 32) Kanian, sakbay ya iyanak si Jesus, oniay imbaga nen anghel Gabriel ed ina nen Jesus a si Maria: “Iter na Dios a Katawan ed sikato so trono nen David ya ama to.”​—Lucas 1:32, 33; Isaias 11:1-5, 10; Roma 15:12.

Saray Detalye ed Bilay na Mesias. Diad samay pasen na panagpikasian na saray Judio ed Nazaret, si Jesus ya adulto la’d saman et nambasa na maksil manlapud propesiya nen Isaias, a kaiba’d satan irayan salita: “Say espiritu na Katawan wala ed siak, ta nilanaan to ak a mangipulong na saray maong a balita ed saray duruka.” Inyaplika nen Jesus iyan propesiya ed inkasikato, ya oniay inkuan to: “Natan ya agew asumpal ed kalayagan yo so sayan sulat.” (Lucas 4:17-21; Isaias 61:1, 2) Impasakbay met nen Isaias so maabig, mauyamo, tan mapaabeban panagtrato nen Jesus ed saramay totoon mankaukolan na panamaabig. Insulat nen Mateo: “Amayamay iray tinmumbok ed sikato; et sikara so tinambal to ya amin, tan imbilin to’d sikara ya agda komon ipakabat. Pian nasumpal so sinalita nen Isaias a propeta . . . Sikatoy agmisiblangan naani tan agmet oningal . . . Say kawayan a betag sikatoy agto naani puteren.”​—Mateo 8:16, 17; 12:10-21; Isaias 42:1-4; 53:4, 5.

Saray Detalye Nipaakar ed Impanirap na Mesias. Impropesiya nen Isaias a say Mesias et ag-awaten na karaklan ya Israelita tan magmaliw a “sakey a bato a katiroran” ed sikara. (1 Pedro 2:6-8; Isaias 8:14, 15) Tan tua, anggano amayamay so milagron ginawa nen Jesus, saray totoo et ‘ag-anisia ed sikato, pian nasumpal so salita nen Isaias a propeta, a kuan to, Katawan, siopa so anisia ed imbalita mi?’ (Juan 12:37, 38; Isaias 53:1) Say sakey a rason no akin ya ag-anisia iray Judio a si Jesus so Mesias et say kabkabat balet ta lingon sisiaen, ya ekalen kunon tampol na Mesias so pananguley na Romanon nasyon tan ipawil to so independentin panarian na kapolian nen David. Lapud nanirap tan inatey si Jesus, agnapanisiaan na maslak a Judio a sikato so Mesias. Balet diad tua, impasakbay la nen Isaias a say Mesias so manirap sakbay ton magmaliw ya Ari.

Diad Isaias, oniay impropesiyan ibaga na Mesias: “Imbeneg ko so saray mangabil . . . Agko insanib so lupak ed kibabaing tan kalutdaan.” Insalaysay nen Mateo no antoy agawa legan a bibistaen si Jesus: “Nilutdaan da so lupa to, tan sikatoy tinampal da; et saray arum sikatoy kinabil da ed saray talog da.” (Isaias 50:6; Mateo 26:67) “Anggan sanen sikato so pinairap agto nilukasan so sangi to,” so insulat nen Isaias. Kanian, sanen tinepetan nen Pilato si Jesus nipaakar ed akusasyon na saray Judio, si Jesus et “ag-angiter na ebat, ya anggan sakey a salita, et ontan la a say gobernador nikelaway baleg.”​—Isaias 53:7; Mateo 27:12-14; Gawa 8:28, 32-35.

Saray Detalye Nipaakar ed Impatey na Mesias. Say propesiya nen Isaias nipaakar ed impatey nen Jesus anggad kayari ipatey to et asumpal ya amin. Oniay impasakbay nen Isaias: “Nisurob ed lubok a kaiba to ray totoon mauges, niponpon a kaiba to ray totoon mayaman.” (Isaias 53:9, Maung a Balita) Panon a tinmua iyan singa mankontraan a propesiya? Sanen inatey si Jesus, sikatoy impasak diad pegley na duaran matakew. (Mateo 27:38) Balet diad saginonor, say mayaman a si Jose, a taga Arimatea, so angala ed bangkay nen Jesus tan imponpon to itan ed balon inungib a lubok. (Mateo 27:57-60) Diad impatey nen Jesus et asumpal so sakey ed saray sankaimportantian a kabiangan na propesiya nen Isaias. Nipaakar ed Mesias et oniay  imbaga nen Isaias: “[Say] matunong ya aripen ko patunongen to naani so saray dakel, tan sikato awiten to naani so saray inkauges da.” On, diad impatey nen Jesus et nitarya so bagat pian naekal ed saray matoor a totoo so belat na kasalanan.​—Isaias 53:8, 11; Roma 4:25.

Seguradon Nagawa Iray Propesiya

Pian nipalinew so pakabidbiran na Mesias unong ed Kasulatan, saray apostol tan si Jesus a mismo et mas mabetbet ya angalay salaysay manlapud propesiya nen Isaias nen say diad arum a libro na Biblia. Anggaman ontan, aliwan say libro na Isaias labat so mangipapasakbay no antoy nagawa’d arapen. Dakel nin propesiya nipaakar ed si Jesus, say Panarian to, tan saray marakdakep a gawaen na satan a Panarian so naromog ed arum a libro na Hebreon Kasulatan. * (Gawa 28:23; Apocalipsis 19:10) Akin et seguradon nagawa irayan propesiya? Imbaga nen Jesus ed saray Judion dumerengel to: “Agyo isipen a linma ak dia a mamagbag na ganggan ono saray sinalita na saray propetas [salanti, say Hebreon Kasulatan]. Agak linma dia a mamagbag, noag say manumpal. Ta tua kuan ko ed sikayo, anggad kabalang na tawen tan dalin, agbalot nabalang so anggan sakey a [letra] ono sakey a tulnek na ganggan, ya angga ed kasumpal na amin a bengatla.”​—Mateo 5:17, 18.

Impaimano met nen Jesus so pakasumpal na saray propesiya na Biblia ed saray detalyin nagawa diad panaon to tan diad arapen. (Daniel 9:27; Mateo 15:7-9; 24:15) Ontan met, mismon si Jesus tan saray apostol to et angipasakbay na saray nagawa kayari na samay panaon da, kaiba la ray dakel a nanenengneng tayon nagagawa natan. Sarayan punto tan arum ni ran propesiya na Biblia a nagawa ni labat ed arapen et ikonsidera ed ontumbok ya artikulo.

[Paimano ed leksab]

[Litrato ed pahina 4]

“Say birhen . . . iyanak to so sakey ya anak a laki”

[Litrato ed pahina 5]

“Agko insanib so lupak ed kibabaing”