Siopa so Makaamta No Antoy Nagawa ed Arapen?

“Siak so Dios, . . .  ya ipaliwawak so panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa.”​—Isaias 46:9, 10.

DIAD sayan agmaligen a panaon, aaralen na saray manag-analisa ed politika, pinansyal, tan ed kabibilay na totoo iray agawa nensaman tan say maslak a nagagawa natan pian naamtaan da no antoy nagawa’d arapen. Walaray onkokonsulta’d astrolohiya odino diad espiritismo lapud desperado la ran naamtaan no antoy nagawa’d bilay da diad arapen. Balet, sarayan totoo et maslak a nadidismaya ed saray resulta. Talaga kasin imposible a naamtaan no antoy nagawa ed sayan mundo, ed pamilya tayo, tan ed sikatayon mismo? Wala kasin talagay makaamta no antoy nagawa’d arapen?

Unong ed teksto’d tagey, sanen si Jehova, say Makapanyarin-amin a Dios, et akitongtong ed kinen Isaias, deneskribe To so mismon abilidad Ton mangipasakbay no antoy nagawa’d arapen. Diad panamegley nen Isaias, impasakbay na Dios so kibulos na saray Israelita nensaman manlapud inkaaripen ed Babilonia, tan say kipawil da pian ipaalagey lamet so Jerusalem tan say templo. Panon ka-eksakto iyan propesiya? Manga 200 a taon ed asasakbay, eksakto so imbaga nen Isaias a ngaran na magmaliw a managsakop ed Babilonia, salanti, si Ciro. Kaaruman ni, duga met so impaneskribe nen Isaias ed estratehiya nen Ciro​—say panguman to’d direksion na agus na Ilog Eufrates, say ilog a manproprotekta ed syudad. Impropesiya to ni ingen a nasabian nen Ciro a samay balbaleg a puerta na bakor na syudad et apaulyanan ya akalukas. Akatulong iya ed magmainomay ya impanalo nen Ciro.​—Isaias 44:24–45:7.

No ikompara ed Dios, anggapoy pakayari na too ya amtaen no antoy nagawa’d arapen. Oniay insulat nen Arin Solomon: “Agmo ipangta so agew na kabuasan, ta agmo amta no anto so ipaway na sakey ya agew.” (Uliran 27:1) Sayan obserbasyon et tua ni anggad natan. Agnayarian na siopaman a too ya amtaen anggan say mismon nagawa’d sikato diad arapen. Anto so pidumaan na Dios? Talagan natatalosan to so amin a pinalsa to, pati say inkagawa ra tan saray tendensia na too. No labayen na Dios, nayarian ton amtaen so eksakton ikiwas na saray totoo tan saray nasyon. Niarum ni, sikatoy walaan na ag-alimitaan ya abilidad a mangontrol ed magmaliw a resulta na saray bengatla. Sano walay ipasakbay ton nagawa diad panamegley na saray propeta to, sikato so “mamaelet ed salita na aripen to, tan manumpal ed simbawa na saray igaganggan to.” (Isaias 44:26) Si Jehova a Dios labat so talagan makagawa ed satan.

Nambilay si Isaias masulok a 700 taon sakbay a nianak si Jesus, say Mesias. Ingen, impropesiya nen Isaias so isabi na Mesias. Anggaman ontan, saray mankrikritiko ed Biblia et inataki ray inkasusto na libron Isaias, nagkalalo la manlapud koma-18 siglo a manpatuloy. Ibabaga ran saray impasakbay nen Isaias et aliwan peteg a propesiya ta nisulat kuno iratan kayarin agawa iray bengatla. Tan sikato kunoy sakey a managsulat a nambilay diad saginonor nin panaon, ya inrekord to labat iray agawa la. Tua kasi ibabaga ra? Nen 1947, adiskobre so sakey a kopya na Isaias, kaibay arum a kadaanan iran lukot, diad sakey a kuweba ya asingger ed Dead Sea. Adiskobre na saray iskolar a ginawa iyan kopya masulok a sanlasus taon  sakbay a nianak so nipropesiyan Mesias, odino Kristo. On, impasakbay na Biblia no antoy nagawa’d arapen!

Agnasarag nen Isaias tan arum nin managsulat na Biblia so mangipasakbay na saray nagawa’d arapen no diad dilin karunongan da labat. Imbes, ‘sinalita ra so nanlapud Dios diad impanenyeg ed sikara na masanton espiritu.’ (2 Pedro 1:21) Diad ontumbok iran artikulo, isentro tayoy imano tayo ed pigaran detalye nipaakar ed bilay nen Jesus ya impropesiya panamegley nen Isaias. Insan tayo pantongtongan iray impasakbay nen Jesus tan saray disipulo to a nagawa diad panaon tayo tan diad arapen.