Kasin Antam La?

Wala ta’y rason nen Poncio Pilato a takotan si Cesar?

Pian desdesen so Romanon Gobernador a si Poncio Pilato ya ipapatey si Jesus, oniay inkuan na saray Judion lider: “No ibulos mo so sayan too, agto ka kaaro nen Cesar.” (Juan 19:12) Say “Cesar” a nasasalambit ed saya et say Romanon Emperador a si Tiberio. Wala ta’y rason nen Pilato a takotan si Tiberio Cesar?

Anton klase na too si Tiberio Cesar? Pigay taon sakbay a bistaen si Jesus, “say pinonot [la nen Tiberio] et say pamenek labat ed dili ton pilpilalek tan lalon onuuges so paraan na pamepenek to’d saratan,” so inkuan na The New Encyclopædia Britannica. Lapud alablabas a panag-inap to, pinapairap tan pinapatey to so siopaman ya ipapasen ni labat ya agmatoor. “No panisiaan iramay kapanaonan ton historyador,” so inreport na satan met lanlamang a reperensya, “saray paborito ton panagrelaks et saramay bayolenti tan mabanday. . . . Sikatoy marukduksan mamapatey ed siopaman, tan kapiganman a labay to.”

Sirin, nayarin say reputasyon nen Tiberio so rason no akin a nampadaeg si Pilato ed pananesdes na saramay Judion lider tan ingganggan toy pamatey ed si Jesus.​—Juan 19:13-16.

Akin et inurasan nen Jesus iray sali na saray apostol to?

Diad Israel nensaman, dakel ya ordinaryon totoo so mankikimey ed inagew-agew ya akasalisali. No bilang ta mansusulong ira na sandalyas, wala labat so sapin na dapan da ya imbariber ed sali ra. Lapud marabok odino mapitek iray karsada tan kaumaan, seguradon narurutakan so sali na totoo.

Kanian sano onloloob ed abung so sakey a too, niyugali lay pangekal toy sandalyas. Pian nipatnag so inkamaparawes, nakaukolan so panguras ed sali na bisita. Balanglan say akan-abung odino say aripen so manggawa ed saya. Walaray pigaran tinukoy na Biblia nipaakar ed sayan kustombre. Singa bilang, imbaga nen Abraham ed saray binmisita ed tolda to: “Pikasik ed sikayo a say daiset a danum so naala ni komon a panuras yo ed salisali yo, insan kayo manpainawa ni ed silong na kiew. Tan mangiyakar ak dia na sankatagano a tinapay, tan pabiskegen yo so puso yo.”​—Genesis 18:4, 5; 24:32; 1 Samuel 25:41; Lucas 7:37, 38, 44.

Sayan impormasyon so ontutulong ed sikatayon natalosan no akin ya inurasan nen Jesus iray sali na saray babangatan to sanen nanselebra ira na unor lan Paskua. Diad satan ya okasyon, anggapoy akan-abung odino aripen a manguras na sali ra, tan mapatnag ya anggapoy namboluntaryo ed saray babangatan to. Kanian sanen angalay sampalangganan danum tan tuwalya si Jesus, insan to inurasan tan pinunasan iray kasalian na apostol to, sikatoy angiter na leksion ed sarayan lalaki nipaakar ed aro tan inkamapaabeba.​—Juan 13:5-17.