No Antoy Naaralan Tayo ed Ehemplo nen Maria

Kasin asali yo la imay liknaan a singa agyo la nasarag so sakey a subok odino responsabilidad ya agyo iilaloan? Kasin naknaksawan kayo la’d kabibilay yon sanka almo sanka luto? Ompan kabiangan kayo ed saray minilyon a manaaburido tan natatakot lapud kaukolan day onalis ed bansa ra bilang sakey a takas. Tan siopa ed sikatayo so agni akalikna na pirmin ot-ot, a singa walay kulang ed bilay tayo kayari na impatey na sakey ya inad-aro ed bilay?

KABAT yo ta’n asagmak iyan amin nen Maria, say ina nen Jesus? Balet, agto labat iraya asagmak, noagta atalonaan to met! Anto so naaralan tayo’d ehemplo to?

Seguradon kabkabat si Maria ed interon mundo. Ag-iya pankelawan lapud sikatoy awalaan na nikadkaduman betang diad impakasumpal na saray gagala na Dios. Kaaruman ni, si Maria et dadayewen na minilyon a totoo. Sikatoy idadayew tan ipapasen na Katolikon Simbaan ya inad-aron Ina tan sakey ya ehemplo na katooran, ilalo, tan kaabigan. Imbangat met ed dakel a totoo a si Maria so dalan pian makaasingger ira ed Dios.

Sikayo ey, antoy panmoria yo ed si Maria ya ina nen Jesus? Tan say mas importante ni: Anto so panmoria na Dios ed sikato?

Nikadkaduman Asainmin

Si Maria ya anak nen Eli et nanlapud tribu na Israel a Juda. Say sankaunaan ya impanalambit ed sikato diad Biblia et nipaakar ed sakey a makapakelaw ya inkagawa. Sakey ya anghel so binmisita ed sikato tan inkuan to: “Daray ka la, nasnaspot ya apalangkapan, say Katawan wala ed sika.” Diad gapo et apagaan a tuloy si Maria tan ‘inisip to no anto kasin nengneng iya na panangigalang.’ Kanian imbaga ed sikato na anghel a sikatoy apili parad alay-abig, ingen ta seryoson asainmin a pannginew, pangilukon tan pamabaleg ed Anak na Dios.​—Lucas 1:26-33.

Talagan baleg a responsabilidad so nimatalek ed sayan marikit! Panon so inkiwas to? Nayarin inisip nen Maria no wala kasi manisia ed agawa’d sikato. Ompan say panlukon to et pansengegan laingey pinasyan kababaingan tan pakabalang toy panangaro nen Jose, a nobyo to. (Deuteronomio 22:20-24) Anggaman ontan, mabulbulos ton inawat iyan importantin asainmin.

Say mabiskeg a pananisia nen Maria so tinmulong ed sikaton ontulok ed linawa na Dios to, si Jehova. Sikatoy kombinsido met a sikatoy agpaulyan na Dios. Kanian inkuan to: “Nia, so aripen na Katawan; nagawa ed siak so unong na salitam.” Akaparaan si Maria a mangarap ed saray angat lapud pangaapresya to’d espiritual a pribilehyo a niiter ed sikato.​—Lucas 1:38.

Sanen imbaga nen Maria ed si Jose a sikatoy malukon, ginetma nen Jose a sikatoy isian. Seguradon sayan inkagawa et talagan ansaki-sakit ed sikara. Ag-ibabaga na Biblia no panon  kabayag dan asagmak itan ya ermen, ingen seguradon nainawaan iran maong sanen nampanengneng so anghel nen Jehova ed si Jose. Impaliwawa na sayan imbaki na Dios so rason ed nikadkaduman impanlukon nen Maria tan inganggan toy Jose a mangala ed sikato bilang asawa to.​—Mateo 1:19-24.

Mairap Iran Kipapasen

Diad panaon tayo, kaslakan ed saray bibiin malukon et pigay bulan a manpaparaan parad pananak da, tan nayarin ontan met so ginawa nen Maria. Nagkalalo la ta saya so panguloan ya anak to. Ingen ta walaray ag-iilaloan ya agawa ya amakomplikado ed saray plano to. Nampa-sensus si Cesar Augustos, sirin et kaukolan a manparehistro so amin a totoo ed pasen a nianakan da. Kanian si Jose tan si Maria, a natan et siameran bulan to lan malukon, et nambiahe na ngalngali 150 a kilometro, nayarin diad inlugan ed sakey ya asno! Diad saman et dakdakel so too ed Betlehem tan kaukolan nen Maria so pribadon pasen a pananakan, balet say alenleneg a lugar a napan-anakan to et diad sakey ya atotong. Seguradon aliwan mainomay parad si Maria so pananak ed ontan a lugar. Nayarin sikato met so nababaingan tan natatakot.

Diad sayan im-importantin parte na bilay to, seguradon imbalikas nen Maria so amin a nalilikna to ed si Jehova, tan nanilalon sikato tan say anak to et asikasoen na Dios. Agnambayag walaray sinmabin managpastol a manpipirawat a makanengneng ed sayan ugaw. Inkuan dan sayan ugaw et tinawag na saray anghel bilang “Manangilaban, a sikato so Kristo a Katawan.” Insan, onia so nabasa tayo: “Si Maria inem-eman to so saraya ya amin a bengatla, a ninodnonot to ed puso to.” Ninodnonot to irayan salita, tan saraya so amabiskeg ed sikato.​—Lucas 2:11, 16-19.

Komusta itayo met? Nayari palagin makaeksperiensya itayo met na irap ed bilay. Kaaruman ni, ibabaga na Biblia a say mauges a ‘panaon tan ag-iilaloan a bengatla’ et nayarin nasagmak na balang sakey  ed sikatayo, a lalon mamaloor ed kairapan tayo. (Eclesiastes 9:11, NW) No naeksperiensya tayo iraya, kasin onunganget itayo la tan tetelen tayoy Dios? Agta mas magmaong no aligen tayo so maabig ya ugali nen Maria tan mas onapit ed Dios panamegley na panaral ed Salita to, say Biblia, insan nodnonoten iray nanaaralan tayo? No onia so gawaen tayo, seguradon ontulong iraya pian natalonaan tayo iray subsubok.

Pobri tan Sakey a Takas

Naeksperiensya met nen Maria so arum niran problema, singa say mairap a kabibilay tan pagmaliw a takas lapud puersaan ya impamaalis manlapud nianakan a pasen. Agawa met la kasi ed sikayo iraya? Unong ed sakey a report, “kapaldua ed populasyon na mundo​—ngalngali taloran bilyon a totoo​—so mamapasarag ed kulang a duaran dolyar labat ed kada agew,” tan minilyon so nanairapan a mamawala na saray nakaukolan da ed bilay anggaman manaayam ira ed mayaman iran bansa. Sikayo ey? Kasin nakekesawan kayo la’d inagew-agew a pantatalikarkar yon mangitarya na tagano na pamilya yo, kawesen da, tan panayaman da, a no maminsan et singa labay yo lay onsuko?

Ibabaga na Biblia a mairap so panagbilay di Jose tan Maria. Anto so paneknek? Pepekderan na saray Ebanghelyo na Mateo, Marcos, Lucas, tan Juan a kayari na 40 agew manlapud impananak nen Maria, linma ira nen Jose ed templo pian gawaen so kakaukolanen a panangibagat, salanti, ‘pangibagat na duaran palekpek odino duaran malapati a sibong.’ * (Lucas 2:22-24) Sayan bagat et naabuloyan labat ed saramay agmakasarag a mangibagat na kalakian a karnero. Kanian, say pamawala ed saray nakaukolan ed bilay et nayarin mairap parad Jose tan Maria. Anggaman ontan, makapadinayew ya agnaandi panaaroan na pamilya ra. Andi duaruwan manuna ed sikaray panagdayew ed Dios.​—Deuteronomio 6:6, 7.

Agnambayag kayari na inkianak nen Jesus, anguman lamet a maong so bilay nen Maria. Inkuan na anghel ed si Jose a kaukolan ton itakas ed Ehipto so pamilya to. (Mateo 2:13-15) Saya so mikaduan pankanawnawa a kaukolan nen Maria ya ibatikan so kabkabat to lan lugar, balet diad sayan pankanawnawa et sikatoy kaukolan ya onla ed arum a bansa. Wala so baleg a populasyon na saray Judio a manaayam ed Ehipto, kanian sarag di Maria tan Jose so manayam ed limog na saray kapara ran Judio. Anggaman ontan, siansia nin say panayam ed arum a bansa et makapaangat tan makapawetwet. Kasin kabiangan kayo tan say pamilya yo ed minilyon a totoon kaukolan ya onalis ed bansa ra, parad pankaabigan na ananak da odino pian makatakas ed kapeligroan? No ontan, natalosan yon maong so arum ed saray kairapan a sinagmak nen Maria diad Ehipto.

Debotadon Asawa tan Ina

Mataltalag ya abitla si Maria ed Ebanghelyo, nilikud labat ed saramay report nipaakar ed inkianak tan impanugaw nen Jesus. Nayarin nikelawan kayo no naamtaan yon si Maria tan Jose et walaan na manga anemiran anak. Anggaman ontan, ikonsidera tayo pa so ibabaga na Ebanghelyo.

Baleg so respeto nen Jose ed pribilehyo nen Maria a mangilukon ed Anak na Dios. Lapud saya, sikatoy agbalot akiakdol ed si Maria anggad sanen nianak to lay Jesus. Inkuan na Mateo 1:25 a si Jose et ‘agsinmingger ya angga ed impangiyanak to na sakey ya anak a laki.’ Say salitan “angga” ed sayan bersikulo et mangipapabitar a kayari na inkianak nen Jesus, si Jose tan si Maria et awalaan na seksual a relasyon bilang sanasawa. Ibabaga na Ebanghelyo a nanresulta itan ed impananak nen Maria na lalaki tan bibii. Di Santiago, Jose, Simon, tan Judas et agagi nen Jesus ed ina. Tan si Maria so awalaan met na manga duaran anak a bibii.  (Mateo 13:55, 56) Ingen ta diad saraya et aliwan mamilagro so impanlukon to. *

Pabpablien a maong nen Maria so maapit a relasyon to ed Dios. Anggaman agkakaukolanen na Ganggan ya onatendi iray bibii ed panselebra na Paskua, naynay a mimila si Maria ed si Jose diad tinaon a pambiabiahe paarap ed Jerusalem parad satan a piesta. (Lucas 2:41) Kabaliksan na satan so pambiahe na masulok a 300 a kilometro paonla tan papawil kada taon, a kaiba ni ombabaleg a pamilya ra! Balet seguradon sarayan impanbiahe et malikeliket iran okasyon parad sikaran sankapamilyaan.

Dakel a bibii natan so mangaalig ed maabig ya ehemplo nen Maria. Sikaray agmakasarili tan mankikimey ira na impasya pian sumpalen iray akasulat ed Biblia iran obligasyon da. Mabetbet ya ipapanengneng na sarayan debotadon kaasawaan so agaylan inkaanos, inkasungdo tan inkamapaabeba! Say pannonot da ed awawey nen Maria so ontutulong ed sikaran napansiansia so maabig a relasyon ed Dios, imbes ya iyuna so dili ran kalkaliktan pian nainawaan tan naliketan. Singa si Maria et kabat dan say pandayew ed Dios kaiba so kaasawaan tan ananak da et mamabiskeg tan ontulong ed pankakasakey na pamilya ra.

Walay aminsan ya inkagawa, a sanen onsesempet la ra di Maria tan Jose manlapud inyatendi ed piesta diad Jerusalem, a nayarin kaiba day pigara lan anak da, naimano ran say 12 taon a Jesus et anggapo ed limog da. Naisip yo tay impampaga nen Maria legan a sikatoy alipeng la ed taloy agew a panaanap ed anak to? Sanen sikatoy nalmo ran siansia ed templo, inkuan nen Jesus: ‘Agyo ta amta  a nakaukolan ak a wala ed abung nen Amak?’ Diad saya lamet a pankanawnawa et inkuan na report ya ‘inem-eman nen Maria so saraya ya amin a salita diad puso to.’ Sakey lamet iyan paneknek a papablien nen Maria so pakawalaan na panmoria a mipara ed Dios. Tinandaan ton maong so amin ya agawa’d si Jesus. Kayari na pigaran taon, nayarin malinlinew ton impaliwawa iyan agawa tan say arum niran ebento ed bilay nen Jesus antis na ministeryo to, diad saray managsulat na Ebanghelyo.​—Lucas 2:41-52.

Akapantepel Anggaman Maniirap tan Inateyan

Anto la so agawa ed si Jose, a pinagka-ama nen Jesus? Kayari na inkasalambit ed sikato diad saman ya inkagawa sanen ugaw ni si Jesus, sikatoy agla abitla ed rekord na Ebanghelyo. Sayan agla impakabitla ed sikato et papanisiaan na arum a paneknek a si Jose et inatey la sakbay ni na inggapo nen Jesus ed ministeryo to. * Antokaman so agawa, ompatnag a si Maria et biyuda la sanen asumpal nen Jesus so ministeryo to. Sanen asingger lan ompatey si Jesus, impia toy ina ton si Maria ed kinen apostol Juan. (Juan 19:26, 27) Ag-iya gawaen nen Jesus no mabilay ni si Jose.

Dakel so dinalan di Maria tan Jose ya eksperiensya legan iran sankaiba! Sikaray binisita na saray anghel, tinmakas ira ed sakey a diktador, nanayam ed nanduruman lugar, tan amabaleg ed dakel ya anak. Kaunongan kasin karakel a labi so impantongtong dan sanasawa nipaakar ed si Jesus, a nononoten da no anto so nagawa ed sikato diad arapen, tan no kasin say pangipapasal tan pangipaparaan da ed sikato et duga? Insan kayari na satan et bigbiglan bukbukor la nen Maria.

Kasin naandi la’d bilay so inad-aro yon asawa? Kasin nalilikna yo nin siansia so sakit tan singa walay kulang ed bilay yo, anggaman dakel lan taon so linmabas? Segurado itayon si Maria et apabiskeg na pananisia to, tan ed pakapikabat ton wala so kioli ed bilay. * (Juan 5:28, 29) Anggaman ontan, ag-iratan amatunda na saray problema nen Maria. Singa naeeksperiensya met na dakel a mansusulon ateng natan, sikatoy nipapaarap ed  angat na pamabaleg ed saray anak to ya anggapo so tulong na sakey ya asawan laki.

Makatunongan labat ya isipen a si Jesus so nagmaliw a manunan manag-anap na pambilay sanen inatey lay Jose. Legan ya ombabaleg iray agagi nen Jesus, makatulong met la ra ed saray responsabilidad ed pamilya. Sanen ‘mantaon lay Jesus na talomplo,’ sikatoy inmalis la ed abung da tan inggapo to lay ministeryo to. (Lucas 3:23) Kaslakan ya ateng et agda nadeskribe so nalilikna ra sano saray adulto lan anak da et onalis la ed abung da. Dakel a panaon, sagpot, tan emosyon so impuonan ed sarayan ugugaw kanian nalilikna na saray atateng a singa walay kulang ed bilay da sano onalis la ra ed pudir da. Kasin wala la’d saray anak yo so inmalis ed ayaman pian dampoten so pilalek dan karera? Kasin naliliketan kayo ed sikara, anggaman no maminsan et walaray pankanawnawan mas lablabay yo komon ya asingger ira ed sikayo? No ontan, amta yo sirin no antoy alikna nen Maria sanen inmalis ed ayaman da si Jesus.

Ag-iilaloan Iran Subok

Wala ni subok ya adalan nen Maria a nayarin agto iilaloan. Legan a manpupulong si Jesus, dakel so nagmaliw a patumbok to, balet ta saray mismon agagi to et ag-anumbok ed sikato. Diad katuaan to, “saray agagi to ag-ira anisia nensaman ed sikato,” so kuan na Biblia. (Juan 7:5) Seguradon naistorya la nen Maria ed sikara so imbaga ed sikato na anghel, a si Jesus et “Anak na Dios.” (Lucas 1:35) Balet siansia nin parad di Santiago, Jose, Simon, tan Judas, si Jesus et kuya da labat. Kanian say pamilyan mismo nen Maria et nandurumay pananisia ra.

Kasin sinmuko si Maria ed nanduruman panmoria na ananak to? Andin balot! Diad sakey a pankanawnawa sanen manpupulong si Jesus ed Galilea, sikatoy linmoob ed sakey ya abung pian mangan, tan dakel a totoo so nandaragup ed arapan to pian ondengel. Natan, siopa iramay walad paway na satan ya abung a manaanap ed sikato? Si Maria tan saray agagi nen Jesus. Kanian no manpupulong si Jesus diad asingger ed abung da, sikatoy tutumboken nen Maria tan awit-awit to so arum ya agagi nen Jesus, nayarin diad ilalo ton manguman so panmoria ra ed si kuya ra.​—Mateo 12:46, 47.

Nayarin manseseet kayo met a manumbok ed si Jesus, anggaman say arum a membro na pamilya yo et agmalabay a manggawa ed satan. Agkayo nadidismaya, tan agkayo onsusuko! Dakel so kapara nen Maria a nananos ya amaseseg ed membro na pamilya ra ed loob la na dakel a taon sakbay iran akanengneng na pananguman. Say ontan a panagsungdo et papablien nen Jehova, onkiwas man iray totoo odino andi.​—1 Pedro 3:1, 2.

 Say Sankairapan a Subok

Say unor a subok ed si Maria ya akarekord ed Biblia so sankairapan ya asagmak to. Naimatonan toy maot-ot ya impatey na inad-aro ton anak a pirmin pinapairap na saray mismon kabaleyan to ya angipulisay ed sikato. Say ipatey na anak et adeskribe bilang say “sankasakitan,” tan “say makapasinagem ed amin ya ipapatey” balanglan say anak et ugaw ni labat odino adulto la. Singa nipasakbay la, alikna nen Maria a singa walay kampilan a tinmalos ed sikato!​—Lucas 2:34, 35.

Kasin inyabuloy nen Maria a pakapuyen na sayan unor a subok so liknaan odino say pananisia to ed si Jehova? Andi. Say sinmublay ya impakasalambit na Biblia ed si Maria et sanen sikato tan saray babangatan nen Jesus et ‘nansiansian nampipikasi.’ Tan agto la bukbukor, ta kaiba to laray arum ya ananak to, a diad sayan pankanawnawa et manisia la ed si kuya ra. Seguradon angitarok iya na gayaga ed si Maria! *​—Gawa 1:14.

Si Maria et awalaan na makapnek a bilay bilang sakey a matoor a bii, asawa, tan ina. Nanliketan to so dakel ya eksperiensya to ed impanlingkor ed Dios. Tinalonaan to so dakel iran subsubok tan irap. Sano naabet tayo iray ag-iilaloan a subok odino sano manaaburido tayo ed saray problema diad pamilya, seguradon makaaral itayo ed impantultuloy ton matoor a nanlingkor ed Dios anggaman dakel iray asagmak ton kairapan.​—Hebreos 10:36.

Anggaman ontan, anto kasi nibaga yo ed pangiiter da’d si Maria na espisyal a relihyoson debosyon? Kasin say rekord ed Biblia nipaakar ed nikadkaduman betang to et rason la pian sikatoy dayewen?

[Saray paimano ed leksab]

[Kahon/Litrato ed pahina 6]

 Walara Kasi Agagi nen Jesus?

On, walaray agagi to. Susuppiaten na dakel a teologo itan a katuaan, anggaman aminpigan pinaneknekan na ebanghelyo itan. (Mateo 12:46, 47; 13:54-56; Marcos 6:3) Ingen, naimano na saray iskolar so duaran bengatla nipaakar ed teoryan si Maria et agla nananak. Unona, walay motibo ed benegan na saratan a teorya, salanti, pian nasuportaan so sakey a teoryan linmesa ed saginonor. Saya imay bangat na simbaan a si Maria et nansiansian birhen ed interon bilay to. Komadua, sano sarayan teorya et aralen a maong, ag-ira makakombinse tan andian ira na paneknek.

Singa bilang, sakey ed saratan a teorya et mangisusuheri a saramay “agagi” nen Jesus et ananak kuno nen Jose ed inmunan asawa to. Sayan ideya et andian na kakanaan, lapud eekalen na saya so legal a kanepegan nen Jesus bilang panguloan a mananawir ed inkaari nen David.​—2 Samuel 7:12, 13.

Wala ni sananey a teoryan mangibabaga a sarayan agagi nen Jesus et kakapinsan to kuno, anta diad tua et angusar so Griegon Kasulatan na nanduruman salita parad “agi,” “kapinsan,” tan “kanayon.” Kanian imbaga na iskolar a si Frank E. Gaebelein a sarayan teorya et aliwan realistiko. Oniay konklusyon to: “Say sankanaturalan a pantalos ed ‘agagi’ . . . et, satan so manutukoy ed saray anak nen Maria tan Jose, salanti, diad saray agagi nen Jesus ed ina.”

[Kahon ed pahina 7]

 Sikatoy Makpel a Nansalat na Relihyon

Si Maria et nianak ed sakey a pamilyan Judio, kanian tinumbok to so Judion relihyon ya abangonan to. Sikatoy oonla ed saray sinagoga, say tawag ed saray pasen a pandadayewan na saray Judio, tan oonla met ed templo diad Jerusalem. Bangbalet, legan ya ondarakel so kakabatan nen Maria nipaakar ed saray gagala na Dios, atalosan ton saray tradisyon na atateng to et agla aabobonan na Dios. Say Anak to, a Mesias, et impapatey na papanguloy relihyon to. Tan sakbay na satan et inyabawag nen Jesus ed sikara: ‘Nia! Say abung yo so nataynan la ed sikayo.’ (Mateo 23:38) Inekal la na Dios so panangabobon to’d relihyon ya abangonan nen Maria.​—Galacia 2:15, 16.

Sanen aporma so Kristianon kongregasyon, nayarin man-edad lay Maria na manga 50. Anto kasi gawaen to? Kasin ikatunongan ton abangonan to lay Judion relihyon kanian labay to lay mansiansia ed saray tradisyon na atateng to? Kasin inkuan ton sikatoy akulaw la pian manguman ni na relihyon? Siempre, andi! Atalosan nen Maria a say panangabobon na Dios et wala la natan ed Kristianon kongregasyon, kanian sikatoy anisia ed satan tan makpel a nansalat na relihyon to.

[Litrato ed pahina 5]

Tinmakas ira paonla’d Ehipto

[Litrato ed pahina 8]

Say sankasakitan lan nayarin sagmaken na sakey ya ina