Say Betang nen Maria ed Gagala na Dios

LEGAN na panmiministeryo nen Jesus, walay sakey a biin inmeyag tan inkuan to: “Mapalar so eges ya angawit ed sika, tan saray pagew a sinosoan mo.” No labay nen Jesus a nadayew so ina to, saya la so sankaabigan a pankanawnawa pian ipaseseg to itan. Balet, inkuan to: “Lalon mapalar so saray ondengel ed salita na Dios, tan sikatoy unoren da.”​—Lucas 11:27, 28.

Agbalot trinato nen Jesus si ina to diad paraan a singa to la dadayewen, nisay imbangat to iray babangatan to ya ontan so gawaen da. No ontan, akin et dakel so debotadon mandadayew ed si Maria? Pantongtongan tayo pa no anto so ibabaga na Masanton Biblia ed pigaran kabkabat a bangat nipaakar ed ina nen Jesus.

“Napno Kay Grasya,” ‘Mapalar ed Limog na Saray Bibii’

Imbaga nen anghel Gabriel no anto so magmaliw a betang nen Maria ed gagala na Dios. Sanen imbaga to itan, sikatoy imbano to, a kuan to: “Daray ka la, nasnaspot ya apalangkapan, say Katawan wala ed sika.” (Lucas 1:28) Say arum a patalos parad satan met lanlamang a pabano et: “Ave, napno kay grasya, say Katawan walad sika.” Agnambayag kayari na satan, imbano nen Elizabeth si Maria ed onia iran salita: “Mapalar ka ed [limog na] saray bibii, tan bendito so bunga na eges mo.” (Lucas 1:42) Kasin sarayan balikas et mangipapatnag a kaukolan a makaawat si Maria na espisyal a dayew?

Andi. Anggaman inlaktip iraya ed pikakasi na saray Katoliko parad si Maria, say Biblia a mismo so mamapaneknek ya anggapoy rason a sikatoy pampikasian. Binidbir nen Gabriel tan Elizabeth so nikadkaduman betang nen Maria a pangilukon ed Mesias, balet say ideyan pampikasi ed sikato et anggapo ed Biblia. Sanen nampaibangat iray babangatan nen Jesus no panon so pampikasi,  imbaga ton say kaukolan da labat a pampikasian et say Ama to, imbes ya ipaseseg toy pampikasi ed si Maria. Diad katuaan to, say gapo na samay kabkabat a modelon pikakasi nen Jesus et: “Ama min wala ka ed tawen.”​—Mateo 6:9.

Sakey ed Saray Manuley

Say sakey nin kabkabat a bangat nipaakar ed si Maria et sikato la natan so “Reyna na tawen.” Sikatoy agbalot tinawag na Biblia ed onian titulo. Anggaman ontan, ibabaga na Biblia a sikatoy walaan na espisyal a betang ed mangatatawen ya uksoyan na Dios. Anto itan?

Imbaga nen Jesus ya arum ed saray matoor a papatumbok to et manuley a kaiba to diad Panarian to. (Lucas 22:28-30) Inikdan nen Jesus iramay apili na pakayari pian manserbi bilang “saserdote nipaakar ed Dios [tayo]; et manari ra ed tapew na dalin.” (Apocalipsis 5:10) Ipapatnag ed sikatayo na Biblia a si Maria et kabiangan na saramay naikdan na onian espisyal a pribilehyo. Panon tayon nibaga ya ontan?

Nayarin nanonotan yo ni a kayari na impatey nen Jesus, si Maria et ‘nansiansia a nampikasi’ a kaiba iray babangatan tan agagi nen Jesus. Manga 120 a totoo so nantitipon parad sayan gagala, a kaiba ‘iray bibii.’ (Gawa 1:12-15) Inkuan na Biblia a legan na “[piesta na] Pentecostes, wala ra ya amin ya atipon ed saksakey a pasen” sanen say masanton espiritu na Dios et niibong ed sikara, ya angiter ed sikara na abilidad a mansalita na nanduruman lenguahe.​—Gawa 2:1-4.

Say impagmaliw nen Maria a kabiangan na sarayan abendisyonan so mangipapanengneng a sikato tan saray arum niran bibii ya akaawat na masanton espiritu et apili pian magmaliw a kabiangan na mangatatawen a Panarian nen Jesus. Kanian walaan itayo na rason a manisian si Maria et akayurong lan kaiba nen Jesus ed mangatatawen a gloria. (Roma 8:14-17) Imanoen pa so pigaran espisyal a pribilehyon niwalad sikato tan ed arum a kaiba nen Jesus a manuley diad panumpal ed gagala na Dios.

Manginabang na Makapakelaw Iran Bendisyon

Ibabaga ed sikatayo na libro na Biblia ya Apocalipsis a say bilang na saray bilayen ed mangatatawen a gloria pian manlingkor a kaiba nen Jesus bilang saserdote, ukom, tan arari et 144,000. (Apocalipsis 14:1, 4; 20:4, 6) Bilang saserdote, kaiba ira’d pangipagamor na saray gunggona na dondon bagat nen Jesus ed amin a matulok a katooan, a gawaen da iran perpekto ed espiritual, moral, tan pisikal. (Apocalipsis 21:1-4) Talagan baleg a pribilehyo parad amin a matoor a lingkor nen Jehova so pakaimaton ed satan a panaon! *

Si Maria et awalaay betang tan siansia nin walaay betang ed pakasumpal na saray gagala na Dios. Lapud inkamapaabeba, pananisia, katutulok, tan debosyon to bilang ina, kaiba met lay impanmatoor to’d saray subsubok, sikatoy manepeg tayon aligen. Ontan met, lapud impangiyanak to ed Mesias tan pakawalaan to na kabiangan diad panangiter na bendisyon ed katooan lapud dondon, sikatoy manepeg a respetoen.

Anggaman ontan, say sankaimportantian a bengatlan naaralan tayo ed si Maria, et si Jehova lambengat so nanlingkoran to, a singa met ed ginawa na arum a matoor a lingkor na Dios. Onia so iyabawag nen Maria a kaiba iray arum a miiba ed si Kristo a manuley ed tawen: “Diad samay manyurong ed trono [Jehova a Dios], bendisyon, tan dayew, tan gloria, tan pakayari tan diad Kordero [Jesu-Kristo] dia ed ando lan ando.”​—Apocalipsis 5:13; 19:10.

[Paimano ed leksab]

[Blurb ed pahina 10]

Say inkamapaabeba, pananisia, tan katutulok nen Maria et manepeg ya aligen