Tatakotan Mo Kasi Inaatey?

NIPAAKAR ed sayan tepet, dakel so onebat na, “Andi. Akin et ontakot ak?” Papanisiaan dan saray inatey la et talagan anggapo la. Balet, minilyon a totoo so manisian saray inaatey et mantutultuloy nin manbilay bilang espiritu.

Diad Benin, West Africa, dakel so manisia a saray inatey et ompawil lamet pian pateyen iramay arum a membro na mismon pamilya ra. Ilalako na saray totoo so kaykayarian da odino onuutang ira pian nabayaran da iray ayep ya ibagat tan saray seremonya a mamakepay sanok na inaatey a kakanayon da. Mibibiang iray arum ed espiritismo, a mangilaktip ed ideyan walay espiritun onsian sano ompatey so too tan makapitongtong iya ed saray mabilay. Makapataktakot so naeeksperiensya na saray arum, ya ibabaga ran say makasengeg et saray espiritu na inaatey.

Say sakey ed saray akaeksperiensya na ontan et si Agboola, sakey a lakin manaayam ed asingger na ketegay Benin tan Nigeria. Inkuan to: “Say espiritismo et kabiangan na inagew-agew a panagbilay diad lugar mi. Kaugalian so maseremonyan panguras ed saray bangkay pian iparaan ira’d panayam ed mundo na saray espiritu. Mabetbet a titiponen ko iray akeran sabon ya inusar ed impanguras na saray bangkay, insan lalaokan ko iratan na nambabangil a bulong. Tan legan kon ipupuranis itan ed paltog kon panag-anop, iyeeyag ko no anton ayep so labay kon napaltog. Kaslakan lay oniaran kaugalian tan singa epektibo met. Balet, makapataktakot iray arum a kabiangan na espiritismo.

“Sanen misteryoson inatey so duaran anak ko, say suspetsak et walay manguusar na espiritismo sumpad siak. Pian naamtaan ko no tua iya, nilak so sakey a masiken a kabkabat a mabiskeg so espiritistikon pakayari to. Pinekderan to a tua imay suspetsak. Say mas mauges ni, imbaga ton saray duaran anak ko et manaalagar kuno ed mundo na saray espiritu pian magmaliw ya aripen na samay amatey ed sikara no ompatey la. Inyarum ni na sayan masiken ya ontan met so nagawa ed komatlon anak ko. Et tua met, ta kayari pigaran agew et inatey iman ya anak ko.”

Akapitongtong si Agboola ed si John, a sakey ed saray Tasi nen Jehova a taga Nigeria. Say eksplinasyon nen John nipaakar ed kipapasen na inaatey et base ed Biblia. Sayan eksplinasyon so anguman ed bilay nen Agboola. Umanen met na saya so bilay mo.

Kasin Mabilay Niray Inaatey?

Siopa so makapangiter na sankaabigan ya ebat ed sayan tepet? Aliwan say too, anggan panon lay inka-popular to. Noagta, say makapangebat labat et si Jehova, say Amalsa ed amin a bengatla “ed katawenan tan tapew na dalin, saray bengatla a nanengneng tan bengabengatlan agnanengneng.” (Colosas 1:16) Pinalsa to iray anghel pian manayam ed mundo na saray espiritu, bangta saray totoo tan ayayep, pian manayam diad dalin. (Salmo 104:4, 23, 24) Sikato so panlalapuay bilay na amin a pinalsa ed inerman a pasen. (Apocalipsis 4:11) Konsideraen sirin no anto so mismon ibabaga na Salita na Dios, say Biblia, nipaakar ed patey.

Si Jehova so inmunan anukoy ed salitan patey. Pinasakbayan toy Adan tan Eva ya ompatey ira no ag-ira ontulok. (Genesis 2:17) Antoy kabaliksan na satan? Oniay imbaga nen Jehova: “Sika et dabok ka, dia ed dabok ompawil ka.” (Genesis 3:19) Diad ipatey, say laman et nabulok ya anggad magmaliw lan dabok, a sikatoy angalaan ed satan. Tan naandi lay bilay.

Sigagalan agtinmulok si Adan tan Eva, kanian asentensiaan ira na patey. Balet, aliwan sikara so inmunan inatey, noagta say anak dan si Abel, a pinatey na kuya ton Cain. (Genesis 4:8) Si Cain et  agtinmakot ya ompan ombales so inatey lan agi to. Noagta, say tinakotan nen Cain et say nayarin gawaen ed sikato na mabilay a totoo.​—Genesis 4:10-16.

Kayari na pigaran siglo, nan-aburidon maong si Arin Herodes sanen imbaga na saray astrologo a walay nianak ed sakop to ya “Ari na saray Judio.” Determinado si Herodes a pateyen iyan ari a posiblin magmaliw a karibal to, kanian impapatey toy amin ya ugugaw a lalaki a mantaon na duara tan manpaleksab. Balet sakey ya anghel so amasakbay ed si Jose ya itakas toy Jesus tan Maria, tan ‘ombatik ira ed Ehipto.’​—Mateo 2:1-16.

Sanen inatey lay Herodes, imbaga na anghel ed si Jose ya ompawil lara’d Israel, “ta inatey la so saray nanaanap ed bilay na ugaw.” (Mateo 2:19, 20) Sayan anghel, a sakey ya espiritu, et amta ton agla sarag nen Herodes a sakitan si Jesus. Agtinakotan nen Jose so inatey lan si Arin Herodes. Balet, say tatakotan nen Jose et say nayarin gawaen na maruksan anak nen Herodes, a si Arquelao. Kanian say nanayaman di Jose et diad Galilea, sakey a syudad ya agla sakop nen Arquelao.​—Mateo 2:22.

Sarayan salaysay so ontulong ed sikatayon natalosan a saray inaatey et andiay pakayari. Anto sirin so eksplinasyon na saramay eksperiensya di Agboola tan saray arum?

“Saray Demonyo,” Odino Saray Mauges ya Espiritu

Nen adulto lay Jesus, sikatoy akapikompronta ed saray mauges ya espiritu. Abidbir day Jesus tan tinawag dan “Anak na Dios.” Amta met nen Jesus no siopa iraya. Aliwa irayan espiritu na inaatey a totoo, noagta, impabidbir nen Jesus iraya bilang “demonyo,” odino mauges ya espiritu.​—Mateo 8:29-31; 10:8; Marcos 5:8.

Walay ibabaga na Biblia nipaakar ed saray espiritun nanmatoor ed Dios tan saray espiritun nanrebelde ed sikato. Ibabaga na libron Genesis a sanen si Jehova et pinataynan to ed hardin na Eden si Adan tan Eva, sikatoy angipasen na saray kerubin, odino anghel, diad bukig na satan pian anggapoy makaloob. (Genesis 3:24) Nayarin saya so inmunan pankanawnawa ya anengneng na totoo iray anghel.

Kalabas na saray panaon, walaray anghel a linmeksab diad dalin tan nansulong na laman na too. Ag-iraya imbaki nen Jehova ed dalin pian gawaen so sakey a kimey. Noagta, “pinaulyan da so nigetar a panaayaman da” diad mundo na saray espiritu. (Judas 6) Makasarili so motibo ra. Angasawa ira na saray bibii, ya angiyanak na angkakabaleg a totoo a tatawagey alan odino Nefilim. Sarayan Nefilim tan saray rebelden ama ra et pinano ra na gulo tan kaugsan so dalin. (Genesis 6:1-5) Impetek nen Jehova iyan situasyon panamegley na sankagloboan a Delap nen panaon nen Noe. Pinatey na delap iray mauges a lalaki tan bibii pati sarayan Nefilim. Anto balet so agawa ed saramay nanrebelden anghel?

Apilitan iran ompawil ed mundo na saray espiritu lapud satan a Delap. Balet, agla iraya inabuloyan nen Jehova a makapawil ed “dilin uley da” odino orihinal ya ayaman da. (Judas 6) Oniay ibabaga na Biblia: “Ag-itepel na Dios so saray anghel nen nankasalanan ira nensaman, noag ingen impelag to ra ed impierno ya asinger ira na golonggolong na kabilungetan, inyawat to ra pian atadia ra ed panangukom.”​—2 Pedro 2:4.

Diad orihinal a Griego, say salitan “impierno” ed sayan bersikulo et Tar·ta·roʹsas. Aliwa iyan literal a pasen, noagta sakey a kipapasen a diad satan et sarayan rebelde et singa akapriso, kanian alimitaan so nagawaan da. Sarayan demonyo et  agla makapansulong na laman na too, balet mabiskeg nin siansia so impluensya ra ed kanonotan tan bilay. Sarag dan kontrolen iray totoo tan ayayep. (Mateo 12:43-45; Lucas 8:27-33) Papalikdoen da met iray totoo, a mankunkunwari iran espiritu na saray inaatey. Akin? Pian iyaarawi so totoo manlapud panagdayew a makapaliket ed si Jehova, ontan met pian wetweten ira nipaakar ed tuan kipapasen na inaatey.

No Panon a Talonaan so Takot

Atalosan nen Agboola a makatunongan iray paliwawa na Biblia nipaakar ed inaatey tan saray espiritu. Amta to a dakel ni kaukolan ton aralen. Kanian ginapoan toy manbasa na Biblia tan saray nibase’d Biblia a publikasyon, kaibay John. Aligliwa si Agboola nen akabatan ton saray anak to et walad lubok, aliwan manaalagar diad mundo na saray espiritu pian magmaliw ya aripen na amatey ed sikara.​—Juan 11:11-13.

Amoria met nen Agboola a sikatoy kaukolan ya ontunda la ed amin ya espiritistikon kagagawa. Pinoolan toy amin a walad sikaton bengatla a mikoneksionan ed okultismo. (Gawa 19:19) Sikatoy tinaktakot na arum ed saray kalugaran to, ya inkuan dan napasanok toray espiritu. Balet agtinmakot si Agboola. Tinumbok toy simbawan nabasa ed Efeso 6:11, 12: “Isulong yo so sankabukel a kinlong na Dios, . . . [lapud] onsumpa itayo ed . . . saray mauges ya espiritu.” Kabiangan ed sayan espiritual a kinlong odino proteksion so katuaan, kaptekan, ebanghelyo na kareenan, pananisia, tan say kampilan na espiritu, salanti, say Salita na Dios. Nanlapud Dios iratan a kinlong tan seguradon mabiskeg!

Si Agboola et binusol na arum ed saray kakaaro tan kakanayon to lapud agla mibibiang ed saray kagagawa a misiglaotan ed espiritismo. Anggaman ontan, diad Kingdom Hall na saray Tasi nen Jehova ed lugar da, sikatoy akaromog na balon kakaaro, a manisia ed saray ibabangat na Biblia.

Amta la natan nen Agboola ya asingger lan ekalen nen Jehova so kaugsan diad dalin tan patundaen toy amin a gawa na saray demonyo. Insan diad kaunoran, deralen to lara. (Apocalipsis 20:1, 2, 10) Diad mismon dalin et bilayen lamet na Dios ‘iray amin a walad lubok.’ (Juan 5:28, 29) Kabiangan ed saraya si Abel, saramay inosentin ugugaw ya impapatey nen Arin Herodes, tan saray minilyon ya arum ni. Matalek si Agboola a pati saray anak to et bilayen met. Nayarin kaiba met ed saraya iray inatey ya inad-aro yo. Pekderan na amin na sarayan bilayen lamet, a manlapud impatey da ya anggad impamilay lamet ed sikara et andian iray pakalikna tan agda amta iray seremonyan ginawa parad sikara.

Anggapoy rason pian takotan moy inaatey. Imbes, nailaloan mon diad arapen et nakaibam lamet iray inaatey ya inad-aro. Legan tayon alagaren itan a panaon, akin ta no salien moy manaral na Biblia pian ombiskeg so pananisiam? Miulop ka ed saray totoon manisia ed no antoy ibabangat na Biblia. No bilang ta mibibiang ka ed antokaman a nengneng na espiritismo, tunda ka lan tampol. Isulong moy “sankabukel a kinlong na Dios” pian naprotektaan moy inkasika sumpad saray demonyo. (Efeso 6:11) Maliket iray Tasi nen Jehova ya ontulong ed sika. Mangiyoopresi ira na libren panangiyaral na Biblia, ya usaren so libron Anto so Peteg ya Ibabangat na Biblia? *

Agla natan antakot si Agboola ed saray inatey, tan naaralan to no panon a resistian iray demonyo. Oniay inkuanto: “Agko amta no siopay makasengeg ed impatey na saray anak ko. Balet, sanen nagmaliw ak a Tasi nen Jehova, awalaan ak ni na pitoran anak. Tan anggapo’d sikara so asakitan na saray mauges ya espiritu.”

[Paimano ed leksab]

[Blurb ed pahina 13]

Agla natan antakot si Agboola ed saray inatey, tan naaralan to no panon a resistian iray demonyo

[Litrato ed pahina 12]

Si Cain et agtinmakot ya ompan ombales so inatey lan agi to