Determinado so Vatican a Patundaen Lay Panangusar ed Madibinon Ngaran

DETERMINADO iray lider na Katolikon simbaan a patundaen lay panangusar ed madibinon ngaran diad saray misa ra. Nen katantaon, say Kongregasyon na Vatican Parad Madibinon Panagdayew tan Estandarte na Saray Sakramento so angipawit na sulat nipaakar ed saya diad saray grupo na Katolikon obispo ed interon mundo. Satan a ginawa ra et “unong ed ganggan” na papa.

Kokontraen na sayan sulat ya apetsaan na Hunyo 29, 2008, so nagagawa ya anggaman wala la ray instruksion da, “diad kaplesan et kalkalnan ompapawil lamet so panguusar ed ngaran na Dios na Israel, a kabkabat bilang say masanto odino madibinon tetragrammaton, tan nisulat ed apatiran letra na alpabeton Hebreo ya יהוה, odino YHWH.” Impaimano na sulat a say madibinon ngaran et walaay nanduruman patalos a singa say “Yahweh,” “Yahwè,” “Jahweh,” “Jahwè,” “Jave,” “Yehovah,” tan arum ni. * Balet, panggugunaetan na Vatican a bilayen lamet imay dati lan direktiba na Katolikon simbaan. Salanti, say Tetragrammaton et salatan na “Katawan” tan “agnayarin usaren odino salambiten so [ngaran na Dios] a YHWH” diad saray Katolikon misa, kanta, tan dasal na simbaan.

Pian suportaan iyan direktiba, impanonot na sayan sulat na Vatican so “abaybayag lan tradisyon” na Katolisismo. Ibabaga na saya ya anggan diad samay Septuagint a patalos na Hebreon Kasulatan a ginawa sakbay ni na panaon na saray Kristiano, say madibinon ngaran et impatalos a Kyʹri·os, say Griegon salita parad “Katawan.” Kanian papapawayen na saya ya anggan “saray Kristiano nensaman ni et agbalot analambit ed madibinon tetragrammaton.” Balet base ed saray malinlinew ya ebidensya, lingo itan ya imbaga ra. Diad saray asasakbay a kopya na Septuagint, aliwan Kyʹri·os so inusar, noagta say madibinon ngaran ya יהוה. Amta tan sasalambiten na saray papatumbok nen Kristo nen inmunan siglo so ngaran na Dios. Oniay imbagan mismo nen Jesus sanen nampikasi ed Ama to: “Impakabat ko ed sikara so ngaran mo.” (Juan 17:26) Tan diad samay kabkabat a modelon pikakasi nen Jesus, imbangat to itayon ipikasi so onia: “Ama min wala ka ed tawen, nagalang komon so ngaran mo.”​—Mateo 6:9.

Nepeg a pilaleken na amin a Kristiano a naseguron napagalangan so ngaran na Dios. Say pansasagpot na Vatican a patundaen so panangusar ed sayan ngaran et agmamapagalang ed si Jehova, ya angibagan: “Sikato ya so ngaran ko ed andi-anggaan, tan sikato ya so pakanodnonotan ed saray amin a kailalakan.”​—Exodo 3:15.

[Paimano ed leksab]

[Blurb ed pahina 30]

“Sikato ya so ngaran ko ed andi-anggaan.”​—Exodo 3:15

[Litrato ed pahina 30]

Piraso na “Septuagint” a sani nen inmunan siglo C.E. Atibukelan so madibinon ngaran ya irerepresenta na apatiran letra na Hebreo, a kaslakan lan YHWH so kapetekan to ed alpabeto tayo

[Credit Line]

Courtesy of the Egypt Exploration Society