Ibangat Yo Iray Anak Yo

Joas​—Tinaynan Toy Jehova Lapud Mauges a Kakaaro

ALIWLIWAY situasyon diad Jerusalem ed saman, say syudad a kawalaan na temploy Dios. Kapkapamatey ni labat ed si Arin Ahazia. Ingen ta wala ni mas graben ginawa na nanay ton si Atalia. Impapatey to iray anak nen Ahazia​—saray mismon apo to! Amtan ta no akin?​— * Pian sikato so magmaliw a manuley, imbes a sikara.

Balet, walay sakey ya apo nen Atalia a nisalba, si Joas, a diad saman et kapangiyanak ni labat. Tan ag-iyan balot amta nen bai to. Labay mo ta’n naamtaan no panon?​—Onia ay, walay panginaen nen Joas, a manngaran na Josaba, ya angiyamot ed kinen Joas diad templo na Dios. Sarag to itan a gawaen ta say asawa ton si Joiada et Atagey a Saserdote. Kanian sineguro ran dua ya anggapoy nagawan mauges ed si Joas.

Diad loob na anem taon et inyamot day Joas ed templo, tan ditan et imbangat da’d sikato so amin a nipaakar ed si Jehova tan saray ganggan To. Balet, sanen pitoy taon la nen Joas, nanggaway paraan si Joiada pian magmaliw ya ari si Joas. Labay mo ta’n naamtaan no antoy ginawa nen Joiada, tan no antoy agawa’d mauge-uges a bai nen Joas a si Reyna Atalia?​—

Onia ay, pasekreton tinawag nen Joiada iray sankamaongan iran nagmaliw a guardia na arari ed Jerusalem diad saraman a panaon. Imbaga to ed sikara no antoy ginawa ran sanasawa pian nisalba so sakey ya anak a laki nen Arin Ahazia. Insan inyakar nen Joiada si Joas ed sarayan guardia, tan amoria ran saya so manepeg a manari. Insan ira’d satan nanggawa na plano.

Impaway nen Joiada si Joas ed publiko insan to kinoronaan. Kayari to, ‘nantipak iray totoo tan inkuan da: Maando komon a manbilay so ari!’ Pinaliberan na saray guardia si Joas pian naprotektaan. Et sanen nadngel nen Atalia so panliliket da, sikatoy batik ed paway tan namprotesta. Balet, sikatoy impapatey nen Joiada ed saray guardia.​—2 Arari 11:1-16.

Legan a mabilay si Joiada, dinmengel si Joas ed sikato tan ginawa na sayan ari no antoy duga. Sineguro to ni ingen a makapandonasyon iray totoo parad pangapiger  ed templo na Dios, a pinaulyan nen ama ton si Ahazia, tan nen laki ton si Jehoram. Komusta balet ey nen inatey lay Atagey a Saserdoten si Joiada, intultuloy ni kasi nen Joas so nanggawa na maong?​— Nengnengen tayo.​—2 Arari 12:1-16.

Diad saman et manedad lay 40 si Joas. Imbes a mantultuloy a miulop ed saramay manlilingkor ed si Jehova, akikaaro si Joas ed saray mandadayew ed palson dirios. Say saserdote nen Jehova la’d saman et si Zacarias ya anak nen Joiada. Antoy isipen mon ginawa nen Zacarias sanen naamtaan toray mauges a gagawaen la’d saman nen Joas?​—

Oniay inkuan nen Zacarias ed Joas tan ed saray totoo: ‘Inkaindan yoy Jehova, kanian ikaindan to kayo met.’ Lapud satan et apasnokan a maong si Joas, kanian impatupak toy Zacarias ya anggad inatey. Agay met la awa? Dati, si Joas so insalba ed managpatey, balet natan, sikato lan mismo so managpatey!​—2 Awaran 24:1-3, 15-22.

Nanenengneng mo ta no antoray leksion a naaralan tayo’d sayan istorya?​— Siempre, agtayon balot labay ya aligen si Atalia, a mauges tan maruksa. Imbes, nepeg tayon aroen iray kaparan managdayew tan anggan saray mamubusol ed sikatayo, a singa imbangat nen Jesus. (Mateo 5:44; Juan 13:34, 35) Tandaan tayo met a no ginapoan tayoy manggawa na maong, a singa si Joas, nepeg tayon itultuloy itan, a mikaaro tayo ed saramay mangaaro ed si Jehova tan mamapaseseg ed sikatayon manlingkor ed Sikato.

[Paimano ed leksab]

Tepetepet:

○ Panon a nisalba si Joas, tan manlapud siopa?

○ Panon a nagmaliw ya ari si Joas, tan antoray maong a bengatlan ginawa to?

○ Akin et nagmaliw a mauges si Joas, tan siopay impapatey to?

○ Antoray naaralan tayon leksion ed sayan istorya ed Biblia?

[Litrato ed pahina 25]

Nisalba si Joas