Tepet na Saray Manbabasa

Wala Kasi Nigeter a Kapalaran Tayo?

Walaray mangibabagan inggeter la na kapalaran so agew na ipatey tayo. Ipipilit met na arum a say Dios so mandedesisyon no kapigan tayo ompatey. Niarum ni, ibabaga na sarayan totoo a saray makatantandan ebento ed bilay et agla napaliisan. Ontan met kasi panmoriam?

Tepetan mo pay inkasika: ‘No talagan anggapo lay nagawaan tayo pian nasalatay kapalaran tayo, tan inggeter lay Dios odino na kapalaran so pansumpalan na bengabengatla, anto ni gunggona na panagpikasi ey? Tan no talagan nigeter lay kapalaran tayo, akin et kaukolan tayo ni manalwar? Akin et man-seat belt tayo ni? Anto ni gagalay ipapaliis tayo’d iyinum na alak antis a man-drayb?’

Agkokonsintien na Biblia so ontan iran palpalaran a kiwas. Imbes ya ipalima ed kapalaran so amin a bengatla, ipapaseseg na satan so pagmaliw a maalwar. Singa bilang, ditan et niganggan iray Israelita a paliberan day barandilyas so plastadon atep na kaabungan da. Say gagala et pian napaliisay aksidentin pakaplag. Iter ni kasi na Dios itan a ganggan no inggeter to la manayay kapelag na sakey a too manlapud atep tan ompatey?​—Deuteronomio 22:8.

Komusta met iramay inatey lapud agnakontrol iran kipapasen, a singa say natural a kalamidad o graben aksidente? Nibaga kasin inatey ira lapud satan la’may nigeter a petsa na ipatey da? Andi, ipapaseguro ed sikatayo na managsulat na Biblia a si Arin Solomon ya “onsabi’d [sikatayon] amin so panaon tan kibanbana.” (Ecclesiastes 9:11, King James Version) Kanian, anggano singa imposible o makapakelaw so inkagawa na saray bengatla, saray makapasinagem ya ebento et agnigeter.

Wala balet iramay maniisip a kontraen na satan imay akadkaunan imbaga nen Solomon: “Nipaakar ed amin a bengatla wala so sakey a panaon, tan sakey a panaon nipaakar ed balang pegdat ed leksab na tawen. Panaon a kianak, tan panaon ya ipatey.” (Eclesiastes 3:1, 2) Labay kasin ibaga na saya a manisia si Solomon ed kapalaran? Aralen tayo pan maong iray imbaga to.

Ag-ibabaga nen Solomon a nigeter lay kianak tan ipatey na sakey. Say punto to et, say kianak tan ipatey et normal labat lan dalan na bilay, a singa met ed arum niran bengatla. On, diad bilay et walay panaon na inawa tan panaon na irap. “Wala so . . . panaon a pannangis, tan panaon a panelek,” So inkuan nen Solomon. Ipapanengneng ton satan a dalan na bilay tan saray ag-iilaloan a kalamidad et normal labat a nagagawa diad “balang pegdat ed leksab na tawen.” (Eclesiastes 3:1-8; 9:12) Kanian say konklusyon to et agtayo nepeg a magmaliw ya okupado ed inagew-agew a kimkimey, anggad punton nalingwanan tayo lay Manamalsa.​—Eclesiastes 12:1, 13.

Anggaman say Manamalsa tayo et walay autoridad to ed bilay tan patey, agto itayo gegeteran na kapalaran. Ibabangat na Biblia ya amin tayo et oopresiay Dios na ilalon makapambilay na andi-anggaan. Balet agto itan ipipilit ed sikatayo. Noagta, oniay ibabaga na Salita to: “Say malabay, mangala ed danum na bilay ya andi bayar.”​—Apocalipsis 22:17.

On, nepeg a labayen tayoy “mangala ed danum na bilay.” Kanian, anggapo itay kapalaran a mangokontrol ed arapen tayo. Noagta akadepende so pansumpalan tayo ed saray personal a desisyon, ugali, tan kiwas tayo.