Tepet na Saray Manbabasa

Aabobonan Kasi na Dios so Poligamya?

Andi, ta diad samay panangasawan inletneg na Dios ed Eden, say inyuksoy to et monogamya (sakey labat ya asawa). Kalabas na panaon, indanet itan nen Jesu-Kristo ed saray papatumbok to.​—Genesis 2:18-24; Mateo 19:4-6.

Agta saray lalaki a singa di Abraham, Jacob, David, tan Solomon a nambilay antis nen Kristo et awalaan na dakel ya asawa? On, balet anto kasi ibabaga na Biblia nipaakar ed satan? Nabasa tayo a say poligamya so sengegay gulo tan kolkol ed saray pamilya di Abraham tan Jacob. (Genesis 16:1-4; 29:18–30:24) Asabi panaon, diad Ganggan na Dios et onia so instruksion parad kada ari: “Agto . . . parakelen so bibii ya asawa to, pian say puso to agkomon onsian.” (Deuteronomio 17:15, 17) Imbaliwala nen Solomon itan a ganggan ta sikatoy angasawa na 700! Makapaermen ta sinmian so puso nen Solomon ed si Jehova lapud mauges ya impluensya na kaasawaan to. (1 Arari 11:1-4) Malinew sirin ya unong ed Biblia, makapuy so resulta na poligamya.

Balet nayarin mankelaw so arum no akin ya inyabuloy na Dios so poligamya ed saray totoo to. Nonot yo pa iya: Asali yo ta lan inanosan so sakey a trabahon agyo labay lapud iisipen yon aliwan praktikal odino nairapay pamilya yo no onekal kayo odino mananap na arum a trabaho? Siempre, saray paraan tan kanonotan na Dios et mas atagtagey nen say sikatayo. (Isaias 55:8, 9) Anggaman ontan, nayarin walaray nanengneng tayon praktikal a rason no akin ya inyabuloy toy poligamya nensaman.

Tandaan a diad Eden et insipan nen Jehova so sakey ya “ilalak” a maneral ed si Satanas. Kalabas na panaon, imbaga to’d si Abraham a sikatoy magmaliw ya ama na baleg a nasyon tan diad poli to so panlapuan na samay insipan ya Ilalak. (Genesis 3:15; 22:18) Determinado si Satanas ya amperen so isabi na satan ya Ilalak, kanian labalabay ton deralen so nasyon na Israel nensaman. Mabetbet to ran sasagyaten a mankasalanan pian agla ra bendisyonan tan iyagel na Dios.

Pian natulongan ira, aminpigapigan imbaki nen Jehova iray propeta to pian pasakbayan iray Israelita sano onggagapo la ran agmanumbok ed saray ganggan to. Balet, amta ton mabetbet ya agda natutumbok so anggan sankasimplian iran ganggan, a singa say agpandayew ed talintao. (Exodo 32:9) No diad sayan simplin ganggan et nairapan la ra, agkasi mas nairapan ira no ag-iyabuloy nen Jehova so poligamya? Lapud kabkabat nen Jehova so too, amta ton aliwa nin panaon pian isebel iyan abaybayag lan kagagawa ra. No diad saman et insebel to la itan, main-inomay la parad si Satanas so pakalmoy paraan pian sagyaten so Israel a mankasalanan.

Say temporaryon impangiyabuloy na Dios ed poligamya et walaan na arum nin gunggona. Tinmulong itan pian maples so idakel na populasyon ed Israel. Tan tinmulong met itan pian naseguron mansiansia so nasyon na Israel anggad isabi na Mesias. Ontan met, diad mapeligron panaon et aprotektaan so arum a bibii ta walaan iray napanayaman tan pamilya.

Tandaan balet ya aliwan si Jehova so nanlapuan na satan a kagagawa. Inyabuloy to itan nensaman, balet ta inikdan toy restriksion pian napaliisay panaglames. (Exodo 21:10, 11; Deuteronomio 21:15-17) Sanen panaon lan panganggaen nen Jehova so poligamya ed saray mandadayew ed sikato, say Anak ton mismo so inusar ton mamekder ed ganggan nipaakar ed panangasawa ya inletneg ed Eden. Kanian, insebel nen Jesus so poligamya ed saray papatumbok to. (Marcos 10:8) Diad ontan et lalon linminew ya anggaman maabig nensaman imay Ganggan ya inter panamegley nen Moises, mas maabig so “ganggan nen Kristo.”​—Galacia 6:2.