Ompasyar Tayo ed Sakey a Nikadkaduman Imprintaan

SAYAN magasin a babasaen mo et nayarin aliwan sikatoy sankaunaan ya anengneng mon isyu na sayan dyurnal. Nayarin wala la ray Tasi nen Jehova ya akakar ed abung yo tan angiyopresi na Say Panag-Bantayan tan Awake! pian natulongan kan mas natalosay Biblia. Odino nayarin anengneng mo la ran walad karsada odino tindaan a mangiyoopresi na oniaran literaturan base’d Biblia. Diad tua, kada bulan et masulok a 35 milyon na sayan magasin so nibubunog, kanian nibagan saya so sankarakelan a niiimprintan relihyoson magasin ed interon mundo.

Balet naisip mo la kasi no iner tan panon a napapawala irayan literatura? Pian naebatan iya, nengnengen tayo pay sakey labat ed amayamay ya imprintaan na saray Tasi nen Jehova ya uusaren da ed nanduruman bansa​—say imprintaan ed Wallkill, New York, U.S.A. Dakel a managbasa na sayan magasin ed interon mundo so agbastabasta makakar ed imprintaan na saray Tasi nen Jehova ed Estados Unidos, kanian ompasyar tayo pa ditan panamegley na sayan artikulo tan litlitrato.

Siempre, say panag-imprinta et onggapo ed insulat iran salita. Saray materyal ya iyimprinta a manlalapud Writing Department, diad Brooklyn, New York, et ipapawit ed Graphics Department panamegley na Internet. Uusaren irayan impawit a files diad panggawa na printing plates (maimpis iran aluminum parad pan-imprinta). Diad Wallkill, manga 1,400 a rolyo na papel so binulan ya onsasabi’d imprintaan a manguusar na manga 80 anggad 100 toniladan papel kada agew. Sarayan rolyo, a say arum et manbelat na masulok a 1,300 kilo, so isusubo ed limaran angkakabaleg ya imprintaan a walaay printing plates. Say papel so imprintaan, putoten, insan itupi pian magmaliw a sakey a seksion a walaay 32 a pahina. Sayan magasin a babasaen mo et sakey a seksion. Saray libro ey? Diad bindery, saray seksion et pantutuopen pian magmaliw a libro. Sakey ed saray duaran linya na bindery et makagawa ed sanagew na 50,000 a libron makapal so apis odino 75,000 a maimpis so apis. Samay sakey a linya et makagawa’d sanagew na manga 100,000 a libron maimpis so apis.

Legay 2008, sayan imprintaan et akapawalay masulok a 28,000,000 a libro, tan masulok a 2.6 milyon ed saratan et Biblia. Akapawala met iya na 243,317,564 magasin. Walaan iya na literaturan base’d Biblia ed manga 380 lenguahe. Natan, no agawa lay literatura, antoy onsublay ey?

Walay 12,754 a kongregasyon ed interon Estados Unidos tan 1,369 ed Caribbean tan  Hawaii, a manoorder ed sayan imprintaan. Say Shipping Department so mangiimpake tan mangipapatulor ed saratan ya order. Kada taon, manga 14 milyon a kilo na literatura so nipapatulor ed saray kongregasyon diad Estados Unidos.

Say sankaimportantian ed sarayan imprintaan et aliwan saray makina noagta saray totoo. Masulok a 300 so mankikimey ed saray departamento na imprintaan​—Graphics, Scheduling, Pressroom, Bindery, tan Shipping Department. Amin da, a manedad na manlapud 19 anggad 92, et boluntaryo tan anggapoy sueldo.

Interesado iran maong ed totoo​—saramay maliket a mangawat na sarayan literatura tan labay day nabangatan, napabiskeg, tan nigiya na saray prinsipyo ed Biblia a karga na saraya. Komon ta sakey ka’d sikara, tan natulongan ka na saray literaturan inimprinta dia pian mantultuloy a nakabat si Jehova a Dios tan si Jesu-Kristo, a mankabaliksay andi-anggaan a bilay.​—Juan 17:3.

[Saray litrato ed pahina 16]

 [Interon-pahina a litrato ed pahina 17]