Posible Kasi Nawalaay Deen na Nonot ed Sayan Magulon Mundo?

MANBIBILAY ka kasi ed kareenan? Parad dakel, say malinew ya ebat et andi. Ta diad lugar da et maguloy politika, mansesebeg iray tribu, walay guerra, odino terorismo. No bilang aliwan ontan ed lugar yo, nayarin agka met makakaliknay deen lapud saray krimen, panangabuso, o walay kolkolan yon sankakaabay o sankakasosyo. Anggan diad loob na abung, a nepeg komon a mareen a pasen et naynay met lay gulo.

Dakdakel so manpirawat a nawalaay deen na nonot. Nayarin anapen da itan ed relihyon, meditation seminar, odino diad panag-yoga. Aanapen met itan na arum diad panagbakasyon ed arawin lugar, ikalab ed palandey, iyakar ed mareen iran pasen odino diad saray hot spring. Nayarin akalikna met iray deen na nonot, balet ag-itan manbabayag.

Iner sirin so pakaromogan moy tuan deen? Say lapuan na deen et say Manamalsa tayon si Jehova a Dios. Akin? Ta sikato so “Dios na kareenan.” (Roma 15:33) Diad uley na Panarian to a magano lan onsabi, niwala so ‘daakan a kareenan.’ (Salmo 72:7; Mateo 6:9, 10) Miduman tuloy itan ed deen a resulta na saray gagawaen na toon paknaan a manetempey labat ed saray gulo. Say deen na Dios et ekalen toy amin a sengegan na guerra tan sebegan. Diad tua, anggapo lay manaral na guerra. (Salmo 46:8, 9) Nalikna tayon siansiay tuan kareenan!

Balet, anggaman alay dakep na sayan ilalo, nayarin pirawat moy anggan panon et makaliknay deen natan. Wala ta’y paraan pian nawalaan kay deen na nonot a makatulong legan na sarayan magulon panaon?  Makapalikliket ta ibabagay Biblia no panon tayon naromog itan. Imanoen pay pigaran giya a walad kapitulo 4 na sulat nen apostol Pablo ed saray taga Filipos. Pibasam pa’d Bibliam so bersikulo 4 anggad 13.

“Say Deen na Dios”

Diad bersikulo 7, nabasa tayo: “Say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” Sayan deen et agnaala ed basta panag-yoga odino pamaaligwas ed personalidad. Manlalapu itan ed Dios. Mabisbiskeg itan ta “talonaan ton amin a pakatalos.” On, daegen toy amin a paga, kakabatan, tan panagkatunongan tayo. Nayarin singa agtayo la makaimwas ed saray problema tayo, balet lapud deen na Dios et nanodnonotan tayoy seguradon ilalo a nasabi panaon, naekal lay amin a problema.

Imposible kasi itan? On, no diad too; balet diad Dios, anggapoy imposible. (Marcos 10:27) Say pananisia tan panagmatalek ed Dios et ontulong pian napaliisay sobran panaburido. Isipen pay sakey ya ugaw a nababalang ed baleg a panaglakoan. Amta to a basta naromog to lay Nanay to et ayos lan amin. Singa samay ugaw a lakapen na nanay sano nalmo to la, makapanmatalek itayon pakalmaen na Dios so liknaan tayo tan ekalen toy amin a paga tayo.

Dakel so managdayew nen Jehova ya akaliknay deen na Dios legan na saray graben subok. Alimbawa, imanoen pay alikna nen Nadine sanen nakalan. Oniay inkuan to: “Nanairapan ak ya itongtong so liknaan ko, tan agko ipapalikas ya apektado ak. Balet diad tua et ansakisakit so pagew ko. Inagew-agew lawarin ibebesngaw koy ami-amin ed si Jehova diad pikakasi, tan onkekerew ak na tulong. Alikliknak so pakayari pikakasi, ta kapagno sobra lay ermen ko tan iisipen kon ‘Agko la’ya nayarian,’ onkakalmado ak. Onliligen so liknaan ko.”

Proteksion ed Nonot tan Pusom

Pawilen tayo pay Filipos 4:7. Unong ed satan, say deen na Dios et bantayan toy kapusoan tan nonot tayo. Singa say sakey a guardian babantayan toy bilding, say deen na Dios et bantayan toy kapusoan tayo, pian ag-itan nalooban na inkamateryalistiko, alabas a panagpaga, tan minumundon ugali. Imanoen iyan alimbawa.

Panisiaan na dakel a too ed sayan magulon mundo a pian magmaliw iran maliket tan maligen, nepeg iran manpayaman. Nayarin manpuonan ira na baleg ed negosyo, a singa say panagsalat na dolyar. Makalikna la ra kasi ed satan na tuan deen? Andi met. Nayarin inagew-agew dan subaybayan so salatan pian amta ra no manlako, manaliw, o manalagar ni ra. No onabebay salat na dolyar, nayarin aburido ran maong. Agmet isesebel na Biblia so panagpuonan, balet oniay maabig ya imbaga to: “No maaro ka’d kuarta agkan balot napenek; no manpilalek kan onyaman agmon balot nagamoran so amin a pilalek to. Sakey met iyan andi-kakanaan. Malet so ugip na toon komikimey, daiset ma’y dakel so kinan to. Balet say toon mayaman dakel so kayarian to, kanian agmakaugip lapud kapagaan to.”​—Eclesiastes 5:10, 12, Maung a Balita.

Diad sampot na Filipos 4:7, nikuan a say deen na Dios et bantayan toy kapusoan tan nonot tayo dia “ed Kristo Jesus.” Antoy pikonektaan nen Kristo Jesus ed deen na Dios? Importante so betang nen Jesus diad pakasumpal ed gagala na Dios. Inter nen Jesus so bilay to pian nibulos itayo manlapud kasalanan tan patey. (Juan 3:16) Sikato met so nitronon Ari ed Panarian na Dios. Say pakaamta ed satan a betang nen Jesus et talagan makatulong pian ondeey liknaan tan nonot tayo. Panon?

No peteg a pagbabawian tayoy kasalanan tayo tan onkerew na panamerdona base ed bagat nen Jesus, perdonaen itayo na Dios, diad ontan et ondeey liknaan tan nonot tayo. (Gawa 3:19) No amta tayon naeksperiensya tayo labat so nagnap a liket diad isabi Panarian nen Kristo, napaliisan tayoy pambilay a singano anggapo lay nabuas. (1 Timoteo 6:19) Siempre, agtayo met libre ed amin a problema, balet  naliligliwa itayo ed seguradon ilalo a magano lan onsabi so sankaabigan a bilay.

No Panon Kan Nawalaay Deen na Dios

Panon ka sirin a nawalaay deen na Dios? Walaray tulong a naromog tayo ed Filipos 4:4, 5, a kuan to: “Manggayaga kayo ed Katawan lawas: kuan ko lamet, Manggayaga kayo. Nakabatan komon na amin a totoo so [“inkamakatunongan,” NW] yo. Say Katawan asingger la.” Sanen insulat iratan nen Pablo, sikatoy nipriso ed Roma, anggaman inosente. (Filipos 1:13) Imbes a manreklamo ed asagmak ton ag-inkahustisya, pinaseseg to ray kapananisiaan a lawas manggayaga ed Katawan. Sirin ag-akadepende ed saray kipapasen to so gayaga to, noag diad relasyon to ed Dios. Nepeg tayo met ya aralen a panliketan so panaglingkor ed Dios antokamay kipapasen tayo. No kapigan tayo nakakabat si Jehova, diman tayo met mas nagaway linawa to, tan mas napanliketan so panaglingkor ed sikato. Tan say resulta et makalikna tayoy inkapnek tan deen.

Papasesegen itayo met a magmaliw a makatunongan. No bayuboan tayo itan, agtayo piliten so inkasikatayon manggaway agtayo nayarian. Amta tayon ag-itayo perpekto; agtayo met sarag so magmaliw a sankamaongan ed amin a bengatla. Kanian, akin et pampilitay magmaliw a perpekto, odino, no andi man, magmaliw a mas maong nen say arum, ya anggad agla itan pakaugipan? Tan agtayo met aanapay inkaperpekto so arum pian no bilang ta walay ginawa ran agtayo agustoan, kalmado tayo nin siansia. Samay orihinal a Griegon salita parad “inkamakatunongan” et nipatalos met ya “inkamapalugar.” No diad saray pamaakaran a mangilalanor ed personal a panlabayan et mapalugar tayo, napaliisan tayoy makapikolkol, a kaslakan et anggapoy iter ton maabig, tan maneral ni ingen ed maong a relasyon ed arum tan ed deen na nonot tayo.

Samay sinmublay a balikas a walad Filipos 4:5 a “say Katawan asingger la” et singa insalet labat. Ingen, say punto na satan et magano lan onsabi so Dios pian umanen so aliwliwan kipapasen na mundo panamegley na uley na Panarian to. Balet, anggan natan ni labat, sikatoy onaasingger ed siopaman ya onaapit ed sikato. (Gawa 17:27; Santiago 4:8) Lapud amta tayon sikatoy maapit ed sikatayo, natutulongan tayon magmaliw a magayaga, makatunongan, tan agpampagaan iray problema natan odino say arapen, a singa ibabagay bersikulo 6.

No basaen tayoy bersikulo 6 tan 7, naimano tayon say deen na Dios et direktan resulta na pikakasi. Parad arum, say pikakasi et singa labat panag-yoga, ya iisipen dan nalikna ray inkakalma diad anggan anton klase na pikakasi. Balet, ibabagay Biblia a say pikakasi et peteg a komunikasyon ed si Jehova, a singa pitotongtong na anak ed maaron ateng, ya ibebesngaw toy liket tan kapagaan to. Makapaliket a naamtaan a niyasingger tayo ed Dios so amin a “ganagana.” Nibaga tayo ed Ama tayo’d tawen so antokaman a walad nonot odino utel na puso tayo.

Say bersikulo 8 so mamapaseseg ed sikatayon nodnonoten iray positibon bengatla. Balet aliwa labat ya angangga’d satan. Unong ed bersikulo 9, nepeg tayo met ya iyaplika iray maabig a bilin ed Biblia pian nawalaan tayoy malinis a konsiensia. Talagan tua imay proverbion, Say malinis a konsiensia et singa anlemek a danganan!

On, sarag moy nawalaay deen na nonot. Manlalapu itan ed si Jehova a Dios, ya iiter to ed saray onaapit ed sikato tan malabay a manumbok ed panangigiya to. No aralen moy Salita to, say Biblia, naamtaan moy kanonotan to. Tua, kaukolay sagpot pian niyaplika iratan, balet nabawbawim itan ta “say Dios na kareenan miulop-ulop ed [sika].”​—Filipos 4:9.

[Blurb ed pahina 10]

“Say deen na Dios . . . bantayan to so kapusoan yo.”

FILIPOS 4:7

[Blurb ed pahina 12]

Makapaliket a naamtaan a niyasingger tayo ed Dios so amin a “ganagana”