Uumanen na Biblia so Bilay

Akin a say sakey a bii a nakalay talek ed relihyon et ontutulong la natan ed arum a nakabat so Dios? Akin a say sakey a lakin labalabay toy bayulente iran isport et nagmaliw lan mauy-uyamo? Panon ya akapanguman so laki a datin adik, buanges, tan busangel? Amtaen tayo pay istoryay bilay da.

PERSONAL YA IMPORMASYON

NGARAN: PENELOPE TOPLICESCU

EDAD: 40

BANSA: AUSTRALIA

APALABAS: ADISMAYA’D RELIHYON

ISTORYAY BILAY KO: Inyanak ak ed Sydney, Australia, balet sanen duay taon ko, nanayam lay pamilya mi ed New Guinea. Ngalngali duay taon mi ed Rabaul, insan waloy taon mi ed Bougainville. Diad saman et anggapo ni TV ed New Guinea, kanian dakel so panaon mi nen agik a manlangoy-langoy, man-snorkel, tan mankamping.

Anggapo ni samploy taon ko sanen nagmaliw ak ya interesado ed relihyon. Katoliko si Nanay, kanian imbaga ran mila ak ed samay grupon manaaral na Biblia a babangatan na madre ed lugar mi. Anisia ak ed bangat na saray Katoliko tan abinyagan ak nen samploy taon ko.

Balet sanen tinedyer ak la et pinmawil kami ed Australia, tan diad saman et singa agko la papanisiaan iramay naaralan ko nipaakar ed relihyon. Legay impan-haiskul ko, naaralan koy nipaakar ed ancient history, tan lanang min pantotongtongan nen Tatay so nanlapuan na relihyon, ontan met ed saray istorya ed Biblia ya ipapasen min tongtong basilyo labat. Agnambayag et agak la manisia ed saray bangat na Katoliko.

Nansian iray ateng ko nen 16 años ko. Nairapan si Nanay ed satan ya agawa, tan ag-abayag et akiayam ak ed si Tatay tan samay kaamong to. Atilak balet ed si Nanay imay agik, tan inmalis ira’d arum a lugar ed Australia. Diad saraman a panaon et maer-ermen ak. Duay taon ni apalabas antis min naareglo so problema ed baetan mi nen Nanay ko. Ginmapo ak lan nan-inum, nandruga, tan ayaman ko’d saray  party. Tinmunda ak lan naneskuela, nantrabaho ak, tan pinerdik so inkatobonbalok lapud imoral a panagbilay.

Nen 25 años ko la, pinmawil so interes ko ed Biblia. Diad balon trabahok et akabat koy Liene, sakey a makalakal a biin marespeto ed amo to anggaman aliwan marakep so pitotoo na satan ed sikato. Sanen tinepetan ko no akin ya agto ombabawi, inkuan ton sikatoy iyaaralan na Biblia na saray Tasi nen Jehova tan labay ton iyaplika ed bilay to iray prinsipyo na Biblia. Tan sarag to ak met kunon iyaralan na Biblia. Abaloan ko, say labay ton ibaga et naaralan ko so amin ya amta to ed Biblia diad sakey oras labat a panaral mi. Diad saman a labi et taloy oras ya inebatan nen Liene iray tepet ko nipaakar ed Biblia. Mandinayew ak ta amin ya ebat to et unong ed ibabagay Biblia.

Agko nalinglingwanan iman a labi. Sanen pasempet ak la, makakapasnok ak ed Dios ta agto tampol ya impaamta ed siak irayan katuaan. Amtak a malinis so panagbilay na saray Tasi tan inisip kon mairap ko lan naekal iray bisyok. Inisip ko met ya agko sarag so gagawaen na saray Tasi a pampupulong. Intultuloy koy nampaiyaral na Biblia ed saray Tasi, balet say gagalak et anapan na lingo so bangabangat da pian walay rason kon agla paiyaralan. Ingen ta amoriak lanlamang ya anggapoy naromog kon lingo ed bangat da.

NO PANON YA INUMAN NA BIBLIA SO BILAY KO: Legan ya ondarakel so naaaralan ko ed Biblia, mas lalo ak a nakokonsiensia. Pian anggan panon et nabawasay pakakakonsiensiak, intundak so pandrudrugak. Balet sanen nan-abroad ak, nigapok lamet so panag-inum tan ayaman ko lamet ed saray party. No kapigan panseseetan kon unoren so Biblia, singa diman ko met napapawil iray datin bisyok. Lapud nababaingan ak ed si Jehova, manpipikasi ak ed sikato, balet ta siansian aliwliway liknaan ko.

Sanen naaralan koy panangasi nen Jehova ed si Arin David tan ed si Bat-seba, alemewan ak. Makpel a binidbir nen David so lingo to sanen sikatoy dinisiplina, tan agla nambaraan. Tan mapaabeba ton inawat so disiplina. (2 Samuel 12:1-13) Lanang kon nononoten itan a salaysay kada makakagawa ak na lingo kanian mas mainomay koy onkerew na perdona ed si Jehova. Sakey ni, nandesisyon ak a say pampikasik et antis ak nin natukso, aliwan kayari, tan akatulong itan na baleg ed siak.

MARAKEP IRAN RESULTA: Misasanok ak nensaman. Balet, atulongan ak na Efeso 4:29-31 a manguman tan paliisan so ‘kapaitan, sanok, tan ingongot.’ Inaral kon pokpokay sanok ko, tan pati say dilak. Sakey ni, akatulong ed siak imay simbawa nen Jesus a ‘say On et On,’ pian magmaliw ak a mas mapekder ed saray desisyon ko.​—Mateo 5:37.

Nen unona et kontra si Nanay ed pipiulop ko’d saray Tasi, balet diad inlabas na panaon et inkuan ton sikatoy maliket ed nansumpalan ko. Imbaga to ni ingen ya, “Amtak ya aliwan say impamabaleg ed sika so rason no akin ya ontan so inkatoom natan, noagta say naaralan mo nipaakar ed si Jehova.” Aliketan ak a tuloy sanen nadngel ko itan.

Natan say bilay ko et walaan la na gagala tan kana. Siameran taon kami la nen asawak a manbabangat na Biblia. On, manpupulong ak la natan ed kabkaabungan, tan ipapasen kon saya so sankaabigan lan kimey ya agawaan ko.

 PERSONAL YA IMPORMASYON

NGARAN: DENIS BUSIGIN

EDAD: 30

BANSA: RUSSIA

APALABAS: MAHILIG ED KARATE

ISTORYAY BILAY KO: Inyanak ak ed syudad na Perm’ balet ta diad Furmanov ak binmaleg, sakey a syudad diad rehyon na Ivanovo, Russia, a manga 40,000 so populasyon to. Say Furmanov et marakdakep a syudad. No autumn la et balibali ray kakiewan ta say bulong da et magmamaliw a duyaw tan ambalanga. Legan na dekaday 1980 tan 1990 et dinmakel so krimen ed satan a syudad. Mairap so bilay na pamilya mi. Manaayam kami na saray atateng ko tan say agik a laki ed apartment a saksakey so kuarto, kanian mainget itan parad sikami.

Nen pitoy taon ko, nanaral ak na karate. Labalabay ko itan, tan satan a lanang so aarapen ko. Basta walay bakantin oras ko et oonla ak ed gym, kanian amin a kabarkadak et mahilig ed isport. Nen 15 años ko, naawat koy “red belt” ed karate, tan kayari sakey taon, naawat koy “brown belt.” Membro ak na sakey a team ya akilaban ed saray championship a kompetisyon diad Russia tan Eurasia. Say amtak et balibali lay pansumpalan ko, balet ta angumay bilay ko nen 17 años ko la.

Siak tan saray arum a kabarkadak et akagawa na krimen tan narel kami. Asentensiaan ak na duay taon a kipriso. Mairap so bilay ed prisoan. Balet, ditan ak inmunan akanengneng na Biblia. Binasak so Genesis, Salmos, tan say Balon Sipan. Inkabisadok ni ingen imay Ama Mi tan nilabilabik itan a dadasalen sakbay ak ya onugip. Abaloan kon anggan panon et makatulong itan ed siak.

Nibulos ak ed prisoan nen taon 2000, balet ta anggapoy direksion tan gagala na bilay ko. Ginmapo ak a nandruga. Diad saman met iran panaon et inatey si Nanay ko. Sikato so sankaapitan a kaarok, kanian nanermenan kon maong so impakaandi ra. Ingen ta ayarian kon nitunda so pandrudrugak tan inggapok lamet so man-gym. Nanayam ak met la’d satan diad syudad na Ivanovo, tan akalmo ak na trabaho ed sakey a grocery. Say superbaysor ed satan a panaglakoan et sakey a Tasi nen Jehova. Impaliwawa to ed siak iray pigaran katuaan a manlalapud Biblia tan nananap na sakey a lakin Tasi a regular a mangiyaral ed siak na Biblia.

NO PANON YA INUMAN NA BIBLIA SO BILAY KO: Diad panaaral koy Biblia, atenyeg so pusok sanen naamtaan koy gagala na Dios a pagmaliwen ton paraiso so dalin. Tan labay kon gawaen no antoy nakaukolan pian magmaliw a kabiangan na satan. Amoriak a labay nen Jehova a manbilay iray totoo unong ed atagey iran estandarte to. Nensaman, andi lay pinonot ko noag say sarilik. Balet ta naaralan kon labay nen Jehova a nonoten ko met so arum tan niwalad siak iray ugalin anggapo ed siak nensaman, a singa say kaabigan tan kauyamoan.

Legan kon nonodnonoten so amin a ginawa nen Jehova parad siak, a singa say impangiter to ed Anak to pian nadondon iray kasalanan ko, ontan lay pisalsalamat ko ed panangaro na Dios kanian apakiwas ak ya umaney kabibilay ko. Singa bilang, abasak ed Salmo 11:5 a  kagula nen Jehova so inka-bayulente. Kanian intundak lay manbantay na saray palabas ed TV a puros labanan tan busolan. Anggaman mair-irap, intundak lay karate. Akatulong ed siak so prinsipyon walad 1 Corinto 15:33 pian nalukasay nonot ko a baleg so impluensya ed siak na saray kaulop-ulop ko. Samay mismon inkiprisok et paneknek lan tuay ibabaga na satan. Kanian nandesisyon ak a tundaan lay pilimog ed saray totoon mahilig ed bayulente iran isport.

MARAKEP IRAN RESULTA: Akatulong ed siak so impilimog ed saray Tasi nen Jehova tan say impanaral koy Biblia pian magmaliw ak a toon napanmatalkan. Alimbawa, naamtaan ko ed Hebreos 13:5 a kaukolan so mankontento tan nepeg ya agpinonot so kuarta. Sayan simbawa so akatulong pian agak la mantila tan mantakew.

Makaaro ak a sipor. Nensaman et walaray anengneng kon aderal so pankakaaro ra lapud agum odino takot ed arum a too. Saray Tasi nen Jehova et agmet perpekto, balet ta panggugunaetan dan tutumboken iray estandarte na Dios tan say simbawa to nipaakar ed panagtrato ed arum. Akalmo ak na tuan kakaaro ed sikara.

Agko amta no anto lay nagmaliwan ko no agko tinumbok iray estandarte na Biblia. Ompan apriso ak lamet odino manggagaway pakasakitan na arum. Balet natan et walaan ak na mao-maong ya asawa tan duaran anak a lalaki. Bilang pamilya et malikeliket kamin ontutulong ed arum a naamtaay katuaan nipaakar ed Dios.

PERSONAL YA IMPORMASYON

NGARAN: JOSÉ CARLOS PEREIRA DA SILVA

EDAD: 31

BANSA: BRAZIL

APALABAS: BUSANGEL

SAY ISTORYAY BILAY KO: Say binalegan kon lugar diad Americana, São Paulo et aliwliway kipapasen. Anggapoy napangalaan mi na malinis a danum ya inumen tan marutdutak so kaliberliber. Say lugar mi et balitadon mapeligro tan napnoy krimen.

Nagmaliw ak a bayulente tan busangel. Natatakot ed siak iray kakaabay mi ta no walay gulo, seguradon kaiba ak. Siga so itsurak tan kakikiwas ko. Sobsobray panag-inum ko tan mabetbet ya anggad nabaldak ak la. Nandruga ak met a singa saray kukuyak. Diad tua et inatey so sakey a kuyak lapud sobsobran panagdruga.

NO PANON YA INUMAN NA BIBLIA SO BILAY KO: Sanen apitongtongan ak na saray Tasi nen Jehova, imbasa ra ed siak diad Biblia a pagmaliwen na Dios a paraiso so interon dalin. (Lucas 23:42, 43; Apocalipsis 21:3, 4) Naamtaan ko met ya anggapo la manayay amta na saray inaatey, kanian agdudusaen na Dios iray mauges a totoo ed mangapoy-apoy ya impierno. (Eclesiastes 9:5, 6) Nainawaan ak ed satan. Lapud saray nanaaralan ko nipaakar ed Dios, labay ko lan talagay manguman. Balet ta aliwan mainomay ya itunday pandrudrugak, paniinom ko, panggugulok, panag-ayew tan mabanday a panagsalitak.

 Anggaman ontan, apabiskeg ak a maong na samay imbaga nen apostol Pablo a walad 1 Corinto 6:9-11. Unong ed saya, anggan say arum ed saramay Kristiano nensaman et asali da met so nanggaway makapuy a singa siak. Balet ibabaga met na satan ya, “Ontan so saray arum ed sikayo nensaman, balet naurasan kayo la, balet apasantos kayo la, balet nibilang kayo la a matunong ed ngaran na Katawan a Jesu-Kristo tan dia ed espiritu na Dios tayo.” Lapud sarayan salita, apabiskeg so linawak a sarag ko met so manguman pian napaliket so Dios.

Sanen akilimog ak la ed saray Tasi nen Jehova, apaneknekan kon saya so tuan relihyon. Amta ran busangel ak, balet siansia nin inawat da ak tan impalikna day aro ed siak.

MARAKEP IRAN RESULTA: No agak akapanaral na Biblia tan agko inumay bilay ko, ompan inatey ak la. Balet natan et atulongan koy sakey ed saray kuyak a manaral met na Biblia tan nitunday panagdruga. Wala met iray kakanayon kon atulongan kon manaral na Biblia. Misalsalamat ak a maong ta nanausar ko lay bilay kon manlingkor ed Dios, a mangaaron maong ed sikatayo!

[Blurb ed pahina 24]

“Nandesisyon ak a say pampikasik et antis ak nin natukso, aliwan kayari, tan akatulong itan na baleg ed siak”