Ibangat Yo Iray Anak Yo

Anengneng nen Sem so Kaugsan na Duaran Mundo

SAY anak nen Noe a si Sem et aliktar nen dineral so sakey a henerasyon, tan nantultuloy nin nambilay kaibay sakey a balon henerasyon. Antam no akin ya aderal imay unaan a mundon nambilayan nen Sem tan panon a sikato tan say pamilya to et akapambilay ni anggad ontumbok a henerasyon?​— * Saya so pantongtongan ta.

Sanen ugaw ni Sem, pinasyay “kabaglan na too,” so kuan na Biblia. Amin a pinonot da et “mauges labat a lanang.” Kanian antam no antoy ginawa na Dios?​— Dinelap to iman a mauges a mundo odino henerasyon, kanian aderal. Oniay insulat nen apostol Pedro: “Diad panamegley na danum, say danum na Delap, aderal so daan a mundo.”​—Genesis 6:5; 2 Pedro 3:6, Maung a Balita.

Nalam no akin a dineral na Dios itan a mundo?​— On ta saray totoo et mauges, tan say pinonot da et “mauges labat a lanang.” Intongtong iya nen Jesus. Say kuan to: “Diad saraman ya agew ed arapen na delap,” saray totoo et nanliliket ira a “nankakakan ira tan naninum ira,” tan “angaasawa ra tan akiaasawa ra.” Inyarum to ni: “Angga ed sinmabi delap, et inyanor to ra ya amin.”​—Mateo 24:37-39.

Akin et inyanor na delap iraman a totoo?​— Onia ay, say tatay nen Sem a si Noe et “sakey a managpulong na katunongan,” balet agdinengel na saraman a totoo so imbaga to. Dinengel nen Noe so Dios tan nanggawa na arka, sakey a barko, a luganan to tan say pamilya to pian nisalba ira ed Delap. Say nanimano labat ed pagagawa na Dios et si Noe, say asawa to, saray anak dan si Sem, Ham, tan Jafet tan saray kaasawaan da. Saramay arum ni et ginawa da labat no antoy labay da, kanian inatey ira ed samay Delap.​—2 Pedro 2:5; 1 Pedro 3:20.

Manga sakey taon manlapud insabi na Delap, si Sem tan say pamilya to et pinmaway ed arka. Anggapo la’d satan so amin a mauges a totoo, balet ag-itan nambayag. Si Canaan ya anak na agi nen Sem a si Ham, et walay ginawa ton mauges kanian inkuan nen Noe: “Nisamba komon [si] Canaan.” Si Nimrod ya apo nen Ham et mauges met. Kinontra to so tuan Dios a si Jehova, tan binagaan to ray totoo  a manggawa na atagtagey a tori ya atawag a Babel, pian onsikat ira. Antoy padesir mon alikna nen Sem tan say ama to ed saya?​—Genesis 9:25; 10:6-10; 11:4, 5.

Naermenan ira, tan pati si Jehova. Antam no antoy ginawa nen Jehova?​— Ginulo toy lenguahe na totoo pian ag-ira makapantatalosan. Kanian tinundaan day panggawa na tori tan linma ra’d nambabangil a pasen kaiba iramay kapareho ray lenguahe. (Genesis 11:6-9) Balet ag-inuman na Dios so lenguahe nen Sem tan say pamilya to. Kanian ag-ira akapansisian tan akapantutulongan iran manlingkor ed Dios. Naisip mo la kasi no panon kabayag so impanlingkor nen Sem ed si Jehova?​—

Nambilay si Sem na 600 a taon. Sakbay na Delap et 98 años to la tan kayari na satan et nambilay ni 502 taon. Seguradon tinulongan toy Noe a manggaway arka tan pasakbayan iray totoo ed onsabin Delap. Balet antoy padesir mon ginawa nen Sem ed loob na masulok a 500 taon ya impanbilay to kayari Delap?​— Imbaga nen Noe a si Jehova et “Dios nen Sem.” Sirin, seguradon intultuloy toy nanlingkor ed si Jehova tan tinulongan to ray kapamilyaan ton gawaen met so ontan. Diad tua, si Sem so laki ed pueg di Abraham, Sara, tan Isaac.​—Genesis 9:26; 11:10-31; 21:1-3.

Nonoten pa met so mundo natan, ya onuuges lan onuuges manlapud panaon nen Sem. Anto kasi nagawa ed saya?​— Ibabaga na Biblia a “mangangga” iya. Balet imanoen iyan sipan: “Sabalet so mangunor ed linawa na Dios onsiansia lawas.” Kanian no gawaen tayo ray labay na Dios, nayarin nakaiba tayo’d saramay manayam ed balon mundo na Dios. Insan, diad tulong to maliket itayon makapambilay na andi-anggaan diad dalin!​—1 Juan 2:17; Salmo 37:29; Isaias 65:17.

[Paimano ed leksab]

Saray Tepet:

○ Anton mundo so primeron nambilayan nen Sem, tan dineral itan na Dios lapud anton duaran rason?

○ Panon kabayag nambilay si Sem, tan anton klase na too si Sem?

○ Antoy magano lan nagawa ed sayan mundo?

○ Antoy nepeg tayon gawaen pian nabilay tayo sano onsabi anggaan na sayan mundo?