Kasin Antam La?

Siopa imay “kapitan ed templo,” tan antoray responsabilidad to?

Say sakey ed saramay lider na relihyon ya impaerel day apostol Pedro tan Juan legan a manpupulong et samay “kapitan ed templo.” (Gawa 4:1-3) Ag-imbaga na Biblia no antoray responsabilidad na satan a kapitan, balet walaray makatulong a detalyin nanlapud saray historyador.

Ompatnag a nen panaon nen Jesus, say mamebemben ed sayan posisyon et sakey a saserdoten onkokomadua ed atagey a saserdote. Seseguroen na sayan kapitan a napansiansiay uksoy ed loob tan kaliberliber na templo ed Jerusalem. Sikato so mangaasikaso ed panagdayew a gagawaen ed templo tan ed sakey a grupon onaakton pulis ditan. Walara met so kapitan a walad silong to. Say trabaho ra et asikasoen iray bantay a manlulukas ed saray gate na templo no kabuasan tan mansasara no labi, seguroen ya anggapoy makaloob ed saray pasen ya agnepeg a looban, tan guardiaan so kaha de yero na templo.

Saray saserdote tan Levita a mankikimey ed templo et naorganisa ed 24 a grupo. Kada grupo et walay turno ton manlingkor na sakey simba mamidua ed sakey taon, tan nayarin walaan met na sarilin kapitan.​—1 Awaran 24:1-18.

Sarayan kapitan na templo et maimpluensya. Abitla ira a kaiba na saramay manunan saserdoten nankokomplot pian ipapatey si Jesus, tan inusar da met iray totoo ra pian naarestoy Jesus.​—Lucas 22:4, 52.

Ibabaga na Mateo 3:4 a say kakanen nen Juan Bautista et “saray duron tan dilo.” Kasin ordinaryo labat a kakanen so duron ed saman?

Walaray manduaruwa no talagan mangakan si Juan na insekto tan say tutukoyen labat kuno nen Mateo et bunga na sakey a kiew a tatawagen a locust (duron), prutas, odino sakey a klase na sira. Balet, say Griegon salita ya inusar nen Mateo et ontutukoy ed sakey a klase na duron a natan et tatawagen ya Acrididae. Say kabkabat ed Israel et samay tatawagen a duron ed desierto, a managderal ed saray tanem.​—Joel 1:4, 7; Nahum 3:15.

Say duron et sakey a mananam a putahi ed saray Asiryano tan Etiope nensaman tan anggad natan et kakanen ni na saray Judion taga Yemen tan na sakey a tribu ed Arabia. Diad Israel, say duron et ipapasen a kakanen na saray pobri. Kayari dan ekalen so ulo, sali, tan pait, say laman na satan et kakanen dan maeta odino inkalot, odino ipapaagew da. No maminsan et aasinan da odino itatalem ed tuka odino dilo. Inkuan na historyador a si Henri Daniel-Rops a say taway na satan et singa urang.

Diad kalawakan so nampulongan nen Juan, kanian nayarin magmainomay toy makala na duron. (Marcos 1:4) Lapud walaan itan na 75 porsiento a protina, say duron ya inlaok ed dilo et masustansia.

[Litrato ed pahina 28]

Saray Asiryanon lingkor a walay awit dan duron tan prutas a granada

[Credit Line]

Nanlapud libro a Discoveries Among the Ruins of Nineveh and Babylon (1853)