Say Espiritu Santo​—Akin et Makapawetwet?

ANTO so espiritu santo? Singa simpli labat itan a tepet, balet nayarin mairap ya anapen so ebat. Oniay imbaga nen Papa Benedict XVI ed arap na dakel a totoo ed Australia: “Singa imposiblin natalosan no anton talaga ita’y Espiritu.”

On, talagan dakdakel so opinyon tan pakawetwetan kasabi’d tepet ya, Anto so espiritu santo? Onia ray kaslakan ya ebat na totoo:

• Sakey a peteg a personan manaayam ed saray disipulo nen Kristo.

• Pakapatnagay presensia na Dios ed dalin.

• Say komatlon persona ed Trinidad.

Akin et nandurumay ebat da? Nen komapat a siglo C.E., imbaga na arum a teologo a say espiritu santo et sakey kunon persona a kaparehas na Dios. Balet, aliwan ontan so ibabangat na Biblia odino na saramay papatumbok nen Kristo nensaman. Oniay imbaga na New Catholic Encyclopedia: “Agbalot deneskribe na Daan a Sipan so espiritu na Dios bilang persona . . . Say espiritu na Dios et say pakapanyari na Dios.” Inyarum ni na satan: “Dakel so teksto ed Balon Sipan a mangipapanengneng a say espiritu na Dios et aliwan sakey a persona noagta sakey a bengatla; lalo la no imanoen iramay pampadparaan na espiritu tan say pakapanyari na Dios.”

Diad tua, mairap parad saray totoo ya isipen a say pakapanyari et sakey a persona. Ontan so ipapatnag na sakey ya agano nin surbi ed United States. Unong ed satan, maslak a totoo et agmanisia a say espiritu santo et sakey a persona odino sakey a bengatlan walay sarili ton isip. Duga kasi ira? Odino nepeg tayon panisiaan iray teologo a mangipipilit a “say Espiritu Santo et sakey a Persona a talagan biig ed Ama tan ed Anak”?

Pian naamtaan tayoy napanmatalkan ya ebat, kaukolan tayon konsultaen so Salita na Dios, say Biblia, a detalyadon manideskribe ed espiritu santo. Oniay insulat nen apostol Pablo: “Amin a Masanton Sulat et impuyan ira na Dios, tan makana ra ed pangibangat na katuaan, panimbawa, pametek.”​—2 Timoteo 3:16, Maung a Balita.

Akin a nepeg mon seetan ya amtaen so katuaan nipaakar ed espiritu santo? On, ta no naamtaan moy katuaan, nayarin manresulta itan ed pakaawat moy tulong na Dios. Kasin say pakaliknam no maminsan et anggapo lay biskeg mon makapan-anos? Oniay insipan nen Jesus ed saray disipulo to: “Kerew kayo, et naikdan kayo; . . . No . . . amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?”​—Lucas 11:9, 13.

Diad ontumbok iran artikulo, paulyan tayon say Biblia so mangipaamta ed sikatayo no anto ita’y espiritu santo. Tan nengnengen tayo no panon itan a makatulong ed sikatayo.

[Blurb ed pahina 3]

Say Biblia so mangipaamta ed sikatayo no anto ita’y espiritu santo