Say Espiritu Santo​—Puersan Nakaukolan Mo ed Bilay

“AGMO ak ibantak ed arawi ed arap mo; tan agmo ekalen ed siak so masanto ya espiritum.” (Salmo 51:11) Oniay masimoon ya impikasi nen Arin David sanen akagaway baleg a kasalanan.

Abayag lan naeeksperiensya nen David so pakapanyari na masanton espiritu. Sanen sikatoy tinedyer ni, atalo toy Goliat, sakey a makapataktakot a sundalo. (1 Samuel 17:45-50) Panamegley met na masanton espiritu, sikatoy akapangisulat na saray salmo ya agnaparaan ed dakep. “Say espiritu nen Jehova nansalita ed panamegley ko, tan say salita to wala ed dilak,” so imbaga nen David.​—2 Samuel 23:2.

Mismon si Jesus et pinekderan toy papel na masanton espiritu ed bilay nen David. Aminsan, oniay inkuan nen Jesus ed saray totoo: “Pinuyanan na espiritu santo si David a nankuan: ‘Say Katawan inkuan to’d Katawan ko: Yurong ka ed nikawanan ko, anggad napasukok ed sika iray kalaban mo.’” (Marcos 12:36; Salmo 110:1, Maung a Balita) Amta nen Jesus a sanen insulat nen David iray salmo to, sikatoy inggiya na masanton espiritu. Natulongan itayo met kasi na satan?

 “Mankerew Kayo, et Naikdan Kayo”

Nayarin agmo kaukolan so mansulat na salmo. Balet nayarin nipaarap ka ed saray probleman singa kabaleg nen Goliat. Alimbawa, imanoen pay Isabel. * Sikatoy tinaynan tan insalat nen asawa to ed mas ugaw. Atilak ed sikatoy abalbaleg ya utang tan agsinustentoan nen masiken to kanian ngalngali agto nabilay so duaran anak da. “Say pakaliknak et atraidor ak a maong tan atraton singa basura,” so kuan to. “Balet, manlapu la’d intaynan to, alikliknak so tulong na masanton espiritu na Dios.”

Inilaloan kasi nen Isabel a basta to labat la naawat so masanton espiritu? Andi, sikatoy inagew-agew ya akikasi ed Dios. Amta ton kaukolan toy biskeg na Dios pian mantultuloy a makapanpakpel, pian naasikaso ton maong iray anak to, tan pian napapawil toy kompiyansa to’d sarili to. Impapuso to ray salita nen Jesus: “Mankerew kayo, et naikdan kayo; mananap kayo, et makalmo kayo; ompatok kayo, et nalukasan ed sikayo.”​—Mateo 7:7.

Si Roberto et alikna to met a kaukolan toy espiritu na Dios balet diad duman rason. Sikatoy naadik ed tabako tan drugan hashish, a naynay ton susungapen. Duay taon ton nilabanan itan, balet aminpigan atalo. “No itundam so mandruga, walaray panaon ya agka makareen ed pinasyan aburido,” so kuan nen Roberto. “Anap-anapen na laman moy druga.”

Inyarum ni nen Roberto: “Balet determinado ak ya umanen so bilay ko pian awaten na Dios so panaglingkor ko. Namporsigian kon nonoten a naynay iray positibon bengatla a walad Biblia. Agew-agew a pinasyay panagpikasik, a kekerewen ko’d Dios ya ikdan to ak na biskeg pian nipetek koy panagbilay ko. Amtak ya agko iya nasarag a bukor. Aliknak ya inebatan nen Jehova iray pikakasik, lalo la no natatalo ak, tan singa labay ko lay onsuko. Manisia ak a say amabiskeg ed siak et say masanton espiritu na Dios. No aliwan lapud satan, agkon balot naekal so inkaadik ko.”​—Filipos 4:6-8.

‘Mamaatagey ya Akapayak a Singa Agila’

Singa si Isabel tan Roberto, minilyon lan Tasi nen Jehova so akaeksperiensya ed pakayari na masanton espiritu ed bilay da. Sayan puersa nen Jehova, ya inusar to ed impamalsay uniberso, et makatulong met ed sika no labay mo. Labalabay na Dios ya ikdan kay espiritu no masimoon mon kerewen itan. Balet pian naawat mo itan, kaukolan mon aralen so katuaan nipaakar ed sikato tan panseetan mon gawaen so linawa to.​—Isaias 55:6; Hebreos 11:6.

Diad pakayari na masanton espiritu, nayari kan makaawat na biskeg pian napanlingkoran so Dios ed dugan paraan tan pian nasarag moy antokaman a probleman onsabi. Oniay ipapaseguro na Biblia: “[Si Jehova] mangiter na pakayari ed makapuy; et saman so andian na pakapanyari sikato so parakelen to na biskeg . . . saray manalagar ed Jehova pasimbaloen to so biskeg da; mamaatagey ira naani ya akapayak a singa say agila; ombatik ira naani, tan ag ira nakesawan; manakar ira naani, tan ag ira onkapuy.”​—Isaias 40:28-31.

[Paimano ed leksab]

[Blurb ed pahina 8]

‘Inagew-agew a pinasyay panagpikasik, a kekerewen ko’d Dios ya ikdan to ak na biskeg. Amtak ya agko iya nasarag a bukor. Tan aliknak ya inebatan to iray pikakasik’

 [Kahon/Saray litrato ed pahina 7]

SAY IMPANGUSAR ED MASANTON ESPIRITU

Inusar na Dios so masanton espiritu diad impamalsay dalin tan say interon uniberso. “O Jehova, agayla so kinaraklan na saray gawam! Dia ed karunongan so nanggawaan mo ed saraya ya amin. Say dalin napno na kaykayamanan mo,” so inkelyaw na salmista. “Sika ibakim so espiritum, et napalsa ra.”​—Salmo 104:24, 30; Genesis 1:2; Job 33:4.

Say masanton espiritu et inusar pian puyanan iray matakot ed Dios a lalaki a mangisulat ed Biblia. “Amin a sulat ya impuyan na Dios sikato met so maabig,” so insulat nen apostol Pablo. (2 Timoteo 3:16) Say Griegon salitan impatalos ya “impuyan na Dios” et literal a mankabaliksan na “inyengas na Dios.” Say ingas, odino espiritu nen Jehova, so angigiya ed kanonotan na saramay angisulat ed Biblia, kanian saray insulat da et “say salitay Dios.”​—1 Tesalonica 2:13.

Say masanton espiritu so angiter na pakayari ed saray lingkor na Dios pian dugay nipropesiya ra. Inkuan nen apostol Pedro: “Anggapoy toon makapangipaliwaway antokaman a propesiya’d Masanton Sulat diad pakatalos ton dili. Ta anggapon balot so propesiyan nanlapud linaway too, noag ingen diad impanpulong na saray totoo na salitay Dios, say espiritu santo, so angiwanwan ed sikara.”​—2 Pedro 1:20, 21, MB; Joel 2:28.

Say masanton espiritu et tinmulong ed si Jesus tan ed arum nin matoor a lalaki a mangipulong ed maong a balita na Panarian na Dios tan manggawa na saray milagro. Inkuan nen Jesus: “Say espiritu na Katawan wala ed siak, ta nilanaan to ak a mangipulong na saray maong a balita ed saray duruka. Imbaki to ak a mangipakabat na kawayangan ed saray arakep. Tan say pangipawil na pakanengneng na saray bulag.”​—Lucas 4:18; Mateo 12:28.

 [Kahon/Saray litrato ed pahina 9]

NO PANON ITAYON NATULONGAN NA MASANTON ESPIRITU

Say masanton espiritu et mangiter ed sikay biskeg pian nalabanan iray tukso tan nitunday mauges iran kagagawa. Imbaga nen apostol Pablo: “Matoor so Dios, kanian agto iyabuloy ya onsabi’d sikayoy tukson agyo nayarian a taloen. Ikdan to kayo ingey biskeg no natukso kayo, pian napaliisan yo, et manalo kayo.”​—1 Corinto 10:13, MB.

Say masanton espiritu et ontulong ed sikan nawalaan na saray ugalin makapaliket ed Dios. “Say bungay espiritu et aro, liket, deen, anos, panangasi, kaabigan, katooran, uyamo, tan panag-adya.”​—Galacia 5:22, 23, MB.

Say masanton espiritu et ontulong ed sikan nasarag iray subok. “Nayarian ko a gawaen so ganagana ed saman so mamabiskeg ed siak.”​—Filipos 4:13.