Tepet na Saray Manbabasa . . .

Akin ya Iyoopresi na Dios ed Totoo so Regalon Bilay ya Andi-Anggaan?

▪ Ibabaga na Biblia ya iyoopresi na Dios ed sikatayo so ilalon “bilay ya andi-anggaan.” (Juan 6:40) Balet, akin ya iyoopresi to itan ya ilalo? Kasin lapu labat ed hustisya?

Say labay ya ibaga na hustisya et panagtrato ed totoo diad maptek tan makatunongan a paraan. Talaga kasin makanepegan itayon mangawat na bilay? Andi. Say kuan na Biblia: “Anggapo so maptek a too ed tapew na dalin a manggawa na maong, tan agmankasalanan.” (Eclesiastes 7:20) Walay dusa ed pankasalanan. Pinasakbayan na Dios so inmunan too a si Adan, a diad agew na pankasalanan to et sikatoy ompatey. (Genesis 2:17) Onia met so insulat nen apostol Pablo diad panamegley na masanton espiritu: “Say bayar na kasalanan say patey.” (Roma 6:23) Sirin no makanepegan ya ompatey so amin ya ilalak nen Adan, akin ya iyoopresi na Dios so ilalon pambilay ya andi-anggaan?

Say iyoopresin bilay ya andi-anggaan et “sakey a regalon andi-bayar.” Pakapatnagan itan na kabaleg tan kalaknab na panangaro tan agnaparaan a kaabigan na Dios. Kuan na Biblia: “Amin et nankasalanan tan agmakadampot ed gloria na Dios, tan say kiyaabawag dan matunong lapud agnaparaan a kaabigan to diad panamegley na kibulos lapud dondon a binayaran nen Kristo Jesus et singa sakey a regalon andi-bayar.”​—Roma 3:23, 24, NW.

Anggaman makanepegan itayon ompatey ya amin, labay na Dios ya iter so bilay ya andi-anggaan ed saramay mangaaro ed sikato. Kasin agmakatunongan itan? Kuan na Biblia: “Anto sirin so ikuan tayo? Wala ta’y ag-inkatunong ed Dios? Andin balot. Ta sikato imbaga to ed Moises, Kasian ko so kasian ko, tan sibegan ko so sibegan ko. . . . Siopa ka ta ya onebat a sumpa ed Dios?”​—Roma 9:14-20.

Diad arum a pasen na mundo, sarag a perdonaen na sakey ya atagey ya opisyal na gobierno odino huis so sakey a kriminal ya asentensiaan lay ambelat. No mabulos so sakey a kriminal a manumpal ed sentensia ed sikato tan ipatnag toy pananguman ed ugali tan kagagawa to, nayarin sikatoy perdonaen na huis odino presidente, a palemewen day sentensia to odino sigpot dan perdonaen. Pakapatnagan iya na agnaparaan a kaabigan.

Ontan met, sarag nen Jehova a perdonaen so amin a nankasalanan a makanepegan komon a nadusa. Ingen ta lapud aro, sarag ton iter so bilay ya andi-anggaan ed saramay mangaaro ed sikato tan manguunor ed saray estandarte to. Oniay kuan na Biblia: “Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”​—Gawa 10:34, 35.

Say impangibaki nen Jehova ed Anak to pian manirap tan ompatey parad sikatayo so sankabalgan ya aro ya impatnag to’d sikatayo. Inkuan nen Jesus nipaakar ed Ama to: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.”​—Juan 3:16.

Amin na saramay mangaaro ed si Jehova tan manusumpal ed linawa to et makapaliket ed sikato, antokaman so kipapasen da. Kanian, say ilalon bilay ya andi-anggaan so sakey a pakapatnagan na agnaparaan a kaabigan na Dios, tan paneknek na sankabalgan a panangaro to.

[Blurb ed pahina 29]

Saya so sakey a pakapatnagan na agnaparaan a kaabigan na Dios, tan paneknek na sankabalgan a panangaro to