‘Labay Ko Ni Oninum’

ALABLABAS lay kakainum nen Allen sanen onse años to ni labat. * Sikato tan saray kaaro to et oonlan manggalaw diad kakiewan, ya aaligen da iramay nanenengneng da ed pelikula. Anggaman aliwan tudtua iramay aaligen da, say alak ya iinumen di Allen tan saray kaaro to et tudtua.

Kalkalnan kinmasil so kakainum nen Tony sanen 40 años to, dati et sakey odino duara labat ed kada labi ya anggad nagmaliw lan limara odino anemira. Bangnen kien et agto la amta no kaunongan karakel so naiinum to ed sanagew.

Kinmerew na tulong si Allen lapud sayan problema to ed panag-inum, kanian sikatoy mabilay ni natan a mangistorya’d eksperiensya to. Balet, si Tony et agto inawat so tulong na pamilya tan kakaaro ton mangiyaansakit ed sikato, kanian sikatoy inatey pigay taon lay apalabas diad aksidente’d luganan lapud dakel so nainum ton alak.

No alablabas so kakainum na sakey anggano bukbukor to, seguradon apektado so arum, tan mabetbet a makapuy iray resulta. Say sobran kakainum et maslak a sengegan na ansakit a panagsalita, panagkabil, panagpatey, aksidente ed panagmaneho tan ed trabaho, ontan met ed nanduruman sakit. Lapud satan et baleg so nagagastos na totoo ed kada taon, tan aapektaen met na satan so bilay tan emosyon na saray indibidual, pamilya, tan ananak.

Anggaman ontan, “aliwan amin a naynay ya oniinum et walaay problema ed kakainum,” so kuan na U.S. National Institutes of Health, “tan aliwan amin a walaan na problema’d kakainum et inagew-agew ya oniinum.” Ag-aliklikas na dakel a totoo ya alablabas la manayay kakainum da. Wala met iramay sagpaminsan labat ya oniinum balet ta sandarakel.

No oniinum kay alak, panon a nibagan alablabas la so kakainum mo? Panon mon naamtaan no kapigan so nepeg ya itundam anggano ‘labay mo ni oninum’? (Uliran 23:29, 30, 35, Maung a Balita) Nabasa ed onsublay iran artikulo so makatulong ya impormasyon nipaakar ed saya.

[Paimano ed leksab]