Natulongan Kasi na Inaatey Iray Mabilay?

SAKEY a balolakin taga West Africa a manngaran na Tamba so asingger lan man-eksamin ed eskuelaan da. * Ipipilit nen nanay to a kaukolan toy tulong na saray inaatey lan kakanayon da pian makapasa. Diad Palermo, Sicily, walaray turistan ompapasyar ed saray underground a sementeryo ya akapreserbaan na nilasus iran aka-displey a bangkay. Papanisiaan na arum a saratan a nipreserban bangkay et makapangiter na proteksion ed saray mabilay. Kada taon, ombibisita iray totoo ed Lily Dale, sakey a baley ed western New York State, U.S.A. Bantog iman a lugar lapud karakel na saray espiritistan manaayam diman. Iilaloan na saramay oonla’d man a nakatongtong da iray inatey lan kakanayon odino kakaaro ra pian onkerew na tulong.

Diad interon mundo, siansia nin papanisiaan a natulongan na inaatey iray mabilay. Antoy padesir yo? Nayarin nibangat met ed sikayo iray ontan a sisiaen odino maapit kayo ed sakey a manisia ed satan. Natural labat so pakailiw tayo ed saray inad-aron inaatey la. Isisipan na saray espiritista a sarag da tayo kunon tulongan ed pakakailiw tayo. Oniay akasulat ed Time magazine ya inkomento na sakey ya espiritista: Saray ayaman na espiritu et “lawas akaparaan ya ontulong.” Tua kasi itan? Kasin natulongan na inaatey iray mabilay? Nayarin nasurprisa kayo ed malinew ya ebat na Biblia.

Kasin Manbibilay ed Arum a Pasen Iray Inaatey?

Simpli tan mainomay a talosan so impangipaliwawa na Biblia ed kipapasen na inaatey. Imanoen so ibabaga na Eclesiastes 9:5: ‘Saray mabilay amta ra ya ompatey ira, balet saray inaatey agda amta so bengatla.’ Posible kasi a wala ni liknaan na saray inaatey? Onia so ebat na bersikulo 6: ‘Say aro ra, gula ra, tan siblet da et atawtaw ya abayag la, andian la ra na betang lawas ed anggan anto a nagawa ed leksab na banwa.’ Imanoen ya ibabaga met na satan a kapitulo ed bersikulo 10 ya “anggapo so gawa, no kanonotan, no pakaamta, no kakabatan, dia ed Sheol, a laen mo.” Say Hebreon salitan nipatalos a “Sheol” ya inusar dia et kabaliksan toy “kaslakan a lubok na katooan.” Makapainteres ta say kapetekan na Griegon salitan nipatalos a “Hades” et inusar ed Kasulatan pian ipaamta no iner so kawalaan nen Jesu-Kristo sanen sikatoy inatey.​—Gawa 2:31.

Dakel so tinulongan nen Jesus sanen sikatoy mabilay ni, balet amta to a sikatoy kaukolan ya ompatey. Kasin inisip to a natulongan to ni iray totoo sano sikatoy wala la’d lubok? Andi. Inkompara to so manasingger ya ipapatey to ed labi a no iner et imposible so mankimey. (Juan 9:4) Amta nen Jesus a no ompatey la ray totoo, ‘anggapoy lay nagawaan da.’​—Isaias 26:14, NW.

Angusar met si Jesus na panangikompara pian nidanet so miparan punto nipaakar ed patey. Sanen inatey si kaaro ton Lazaro, inyaliling nen Jesus so patey ed ugip. (Juan 11:11-13) Nailaloan tayo kasin natulongan itayo na sakey a toon naugip? Ag-amta na naugip iray nagagawa, tan agto met natulongan so anggan siopa.

No Ompatey so Too, Kasin Mabilay ni Kamarerwa to?

Dakel so nibangat a say kamarerwa et sakey a bengatlan mansiansia nin mabilay kayari ipapatey. Balet midumaan so ibabangat na Biblia. Say unonan libro na Biblia a Genesis et manutukoy ed sikatayo bilang kamarerwa. Isasalaysay na Genesis 2:7, New World Translation, a samay inmunan too a pinalsa na Dios et nagmaliw a “mabilay  a kamarerwa.” Diad interamenti, say too et kamarerwa; anggan saray ayayep et kamarerwa met. (Genesis 1:20-25) Kanian, makatunongan sirin a sano ompatey so sakey a too odino ayep, ompatey so kamarerwa. Papaneknekan iya na Biblia.​—Ezequiel 18:4.

Balet, nayarin itepet na arum, ‘Panon to iramay istorya na totoo a nakakatongtong da kunoy inaatey, narerengel day boses da tan nanengneng da ni ra ingen?’ Kabkabat ed dakerakel iran pasen na mundo so ontan iran istorya. Mangiiter kuno iratan na ilalo ed saramay naulilan kakanayon tan maapit a kakaaro. Kanian saya so amakiwas ed sikaran onkerew na tulong ed saray espiritista a kuandan makapitongtong ed saray inaatey.

Kasin tua iratan ya istorya? No on, agkasi sumlang iya ed ibabaga na Biblia? Deniskribe nen Jesus so Salita na Dios bilang katuaan. (Juan 17:17) Agbalot susumlangen na katuaan so inkasikato. Diad tua, malinlinew ya ibabaga na Biblia no anto so nepeg a panmoria tayo ed pananisia ra a natulongan na inaatey iray mabilay. Isasalaysay na Biblia so nipaakar ed sakey a too ya analin onkerew na tulong ed saray inatey. Say maalwar a pangonsidera ed sayan salaysay so ontulong ed sikatayon nakabatan so katuaan.

Kinmerew na Tulong so Ari ed Inatey

Sayan eksena et agawa’d bakalan diad amianen a pasen na Israel. Si Arin Saul tan saray sundalo to so inataki na makapataktakot ya armada na saray Filisteo. Sanen anengneng nen Saul so kampo na saray Filisteo, “say puso to ginmiwgiw na baleg.” Diad sayan panaon na uley nen Saul, inkaindan to lay tuan panagdayew. Bilang resulta, agla eebatan nen Jehova iray pikakasi to. Siopa kasi kerewan nen Saul na tulong, anta inatey lay Samuel a propeta na Dios?​—1 Samuel 28:3, 5, 6.

Kinmerew na tulong si Saul ed espiritista a walad En-dor. Sikatoy akikasin “iyakar ed sikato si Samuel,” manlapud saray inaatey. Tinawag na espiritista iray mauges ya espiritu. Imbaga na sayan “Samuel” ed si Saul a manalo iray Filisteo, tan sikato so ompatey ed guerra a pati saray anak to. (1 Samuel 28:7-19) Talaga kasin si Samuel imay akatongtong ton nanlapud inaatey?

Nonoten pa iya. Ibabaga na Biblia a say inatey a too et “ompawil ed dalin” tan “saray nonot to natawtaw ira.” (Salmo 146:4) Amta nen Saul tan Samuel ya aglabay na Dios so ikerew na tulong ed saray espiritista. Agta si Saul nensaman so angidaulo ed impangekal na saray espiritistikon gawagawa diad dalin a nasasakopan to!​—Levitico 19:31.

Sakey ni, no mabilay ni Samuel bilang espiritu, kasin sumlangen toy ganggan na Dios tan manpausar ed espiritista pian makapitongtong ed si Saul? Agmet la labay nen Jehova so mitongtong ed si Saul. No ontan sirin so kipapasen, sarag kasin piliten na espiritista so Makapanyarin-amin a Dios pian mitongtong ed si Saul panamegley na inatey lan Samuel? Andi. Malinlinew a sayan “Samuel” et aliwan samay matoor a propeta na Dios. Sakey iyan marelmeng ya espiritu a mangaalig ed inatey lan Samuel.

Saray demonyo et saramay anghel a nanrebelde ed autoridad na Dios diad gapoy awaran na too. (Genesis 6:1-4; Judas 6) Naoobserbaan na sarayan demonyo iray totoo legan iran mabilay, kanian amta da no panon so panagsalita, itsura, tan kakikiwas na sakey a too. Panggugunaetan dan ikayat so ideya a tila so ibabaga na Biblia. Agla sirin pankelawan no akin a mamapasakbay so Biblia  sumpad antokaman a nengneng na ikerew na tulong ed sarayan espiritun puersa! (Deuteronomio 18:10-12) Sarayan marelmeng ya espiritu et aktibo ni anggad sayan panaon tayo.

Natan et amta tayo la no akin a dakel iray mangibabagan “makakarengel” odino “makakanengneng” ed saray inad-aro ran inatey la. Anggaman no maminsan et singa makatulong irayan nagagawa, determinado iray marelmeng ya espiritun pinalsa a mamalikdo ed saray totoo. * (Efeso 6:12) Nonot yo pa met iya: Si Jehova a Dios et maaron Dios a mangaasikaso ed sikatayo. No manbibilay iray inaatey ed arum a pasen tan sarag dan tulongan iray kakaaro tan pamilya ra, isebel kasi na Dios so pitongtong ed saray inaatey tan ipasen to itan a ‘makapadimla’? Siempre andi! (1 Pedro 5:7) No ontan sirin, wala ni kasi napanmatalkan a lapuan na tulong?

Peteg a Tulong Parad Saray Mabilay tan Inaatey

Natan sirin et atalosan tayo lan saray inaatey et andian na pakayari ya ontulong ed saray mabilay. Kaaruman ni, say ikerew na tulong ed saray inaatey et agla lanti epektibo, sankaugesan ni itan; mapeligro itan a maong ta susumlangen na satan so ganggan na Dios tan iiyan itayo na satan ed impluensya na saray demonyo.

Igigiya itayo na Biblia ed sankaabigan a Lapuan na tulong, say Manamalsa tayo, si Jehova. Nayarian to itayon iliktar manlapud patey. (Salmo 33:19, 20) Sikatoy lawas akaparaan ya ontulong ed sikatayo, tan mangitatarya na peteg ya ilalo, aliwan singa saray espiritista a mangitatarya na palson ilalo.

Naaralan a mismo nen Tamba ya abitla ed gapo na sayan artikulo so pandumaan na palson ilalo ya iyoopresi na saray espiritista tan say katuaan ya iyoopresi nen Jehova ed sikatayo. Imbaga ed sikato na saray espiritista a no sikatoy agmangiyapay ed saray inaatey lan laki tan bai to, sikatoy agmakapasa ed eksamin. Nigapo la nen Tamba so manaral na Biblia a kaiba iray Tasi nen Jehova. Naaralan toy peteg a kipapasen na inaatey tan say mauges a lapuan na saramay kunwarin mangaalig ed inaatey lan kakanayon to. Anggaman sikatoy pipiliten nen nanay to ya onkerew na tulong ed espiritista, ag-inmabuloy so Tamba. Tan oniay inkuan to’d nanay to: “No agak makapasa, di mas lalon pasyaen ko’d ontumbok a taon.”

Anto so resulta? Sikatoy sankatageyan ed eksamin! Nikelawan si nanay to, agla manisia ed saray espiritista, tan agto lan balot impilit so ontan a gawan panangiyapay. Naaralan nen Tamba a papasakbayan itayo nen Jehova ya ompaliis sumpad ‘ipanon na saray mabilay ed saray inaatey.’ (Isaias 8:19, Maung a Balita) Say panagaral na Biblia so angiter ed si Tamba na panamaseguro a no pablien toy ganggan na Dios, maabig so pansumpalan to.​—Salmo 1:1-3.

Panon to balet iramay inad-aro tayo a naandi la’d bilay? Anggapo la kasi ilalo ra? Nilikud ed panutulong nen Jehova ed saray mabilay, insipan to a tulongan to met iramay walad lubok. Kayari impaneskribe nen propetan Isaias ed agmakayarin kipapasen na inaatey, oniay inkuan to a walad kapitulo 26, bersikulo 19: ‘Saray inatey mo ombilay ira, liing tan mankanta kayo, sikayo a manayam dia ed dabok!’ Ibabaga ni na propesiya a saramay “inaatey” et nabilay lamet.

Ilitrato yo pa’d nonot itan! Saray binilyon ya agmakayarin inaatey a nanaugip ed lubok et bilayen! Diad tua, ipapaamta na Biblia a ‘pilalek’ nen Jehova a bilayen iramay inaatey. (Job 14:14, 15) Kasin singa imposible itan a sipan? Papanisiaan nen Jesu-Kristo iyan ilalo tan deniskribe to iray inaatey a mabilay la ed imaton nen Jehova.​—Lucas 20:37, 38.

Labay yo met kasi so nawalaan na ontan ya ilalo? * Itultuloy yo so pangala na suston pikakabat a manlapud Biblia. Legan na panaaral yo, nakombinse kayo a nayarian nen Jehova a tulongan iray mabilay tan inaatey, tan saray sipan to et “matoor tan matua.”​—Apocalipsis 21:4, 5.

[Saray paimano ed leksab]

[Blurb ed pahina 19]

Natural labat so pakailiw tayo ed saray inad-aron inaatey la

[Litrato ed pahina 20]

Kasin binmangon si propetan Samuel manlapud saray inaatey pian mitongtong ed si Arin Saul?