Aligen so Pananisia Ra

Sikatoy Nanmatoor Anggaman Walaray Subok

MAPAGPAGA si Pedro legan ton sankanengneng so kalupaan na saramay ondedengel ed si Jesus. Diad saman et walara ed loob na sinagoga diad Capernaum. Diad sayan baley so kawalaan na abung nen Pedro; dia so kawalaan na anapan to, diad gilig na Dayat na Galilea; tan dia met so panaayaman na dakel ed saray kakaaro, kakanayon, tan kapara ton managsigay. Labalabay nen Pedro a panliketan met komon na saray kabaleyan to so makapinengneng ed si Jesus tan makaaral nipaakar ed Panarian na Dios manlapud sayan sankamaongan a managbangat. Balet ta aliwan ontan so agawa.

Dakel so agla ondedengel ed si Jesus. Nguronguro lay arum, ta agda labay so mensahe to. Balet, say pakakaaburidoan nen Pedro et say reaksion na arum ed saray mismon disipulo nen Jesus. Agla napatnagan ed kalupaan da so liket ed pakaaral na saray importantin katuaan tan pakaamta na saray balon bengatla. Natan et adismaya ra tan mansyodot ni ra ingen. Nansalitay arum lapud abigla ra ed imbaga nen Jesus. Agda la labay so ondengel kanian pinmaway ira ed sinagoga tan agla ra tinmumbok ed sikato.

Saya so mairap a kipapasen ed si Pedro tan saray kapara ton apostoles. Ag-atalosan a maong nen Pedro so imbaga nen Jesus ed saman ya agew. Naisip to a talagan makaopendi iray imbaga nen Jesus no agnipaliwawan maong. Anto balet so gawaen nen Pedro? Aliwan saya so primeron inkasubok na katooran to ed Katawan to, tan aliwan saya so sampot. Aralen tayo no panon ya akatulong so pananisia nen Pedro pian sikatoy makapansiansian matoor anggaman ed sarayan subok.

Matoor Sanen Binmeneg Iray Arum

Mabetbet a nabigla si Pedro lapud walaray gagawaen tan ibabaga nen Katawan ton Jesus a midumaan ed iilaloan na totoo. Sakey agew antis na samay inkagawa ed sinagoga, mamilagron pinakan nen Jesus so piganlibon totoo. Kanian sikatoy labay dan gawaen ya ari. Balet abigla ra sanen sikatoy inmalis tan pinalugan to iray disipulo to ed baloto pian onla ra ed Capernaum. Diad saman a labi a walad dayat iray disipulo to, nikelawan lamet ira sanen nanakar si Jesus ed tapew na Dayat na Galilea anggaman ombabagyo. Angiter iya na importantin leksion ed si Pedro nipaakar ed pananisia. *

Kaimbuasan to, naamtaan dan sikara manayay tinumbok na saramay totoo diad basil na dayat. Balet, mapatnag a say labay na sarayan totoo et sikaray mamilagron pakanen lamet nen Jesus, aliwan lapud labay da so makaaral na katuaan. Diretsaan to ran sinimbawa lapud say iisipen da labat  et say naakan da. Sayan pantotongtong et intuloy lamet diad sinagoga ed Capernaum, a ditan et walay importantin katuaan ya imbangat nen Jesus balet mairap a talosan tan ag-inilaloan na sarayan totoo.

Labay komon nen Jesus a sikatoy ipasen na totoo ya aliwa labat a panlapuan na naakan, noagta bilang espiritual a probisyon ya inter na Dios, a say bilay to et onkanan dondon pian magmaliw a posible so bilay ya andi-anggaan parad amin. Kanian sikatoy angiter na ilustrasyon, ya inkompara toy inkasikato ed mana, say tinapay a nanlapud tawen diad panaon nen Moises. Sanen walaray agmipakna, sikatoy angusar na mas direktan ilustrasyon. Imbaga to a nakaukolan dan kanen so laman tan dala to pian nawalaan iray bilay. Sanen imbaga to iya, mas linmoor laingen so agda pipakna. Inkuan na arum: “Makapabigla iyan imbaga to. Siopay makayarin ondengel ed satan?” Kanian dakel ed saray mismon disipulo nen Jesus so agla tinmumbok ed sikato. *​—Juan 6:48-60, 66, NW.

Antoy gawaen nen Pedro? Sikatoy awetwet met ed imbaga nen Jesus. Agto ni atalosan a si Jesus so nepeg ya ompatey pian nasumpal to so linaway Dios. Ingen, kasin asagyat met si Pedro a mangibeneg ed si Jesus a singa saramay disipulo ya agla anisia? Andi. Walay nikabkabiig a kualidad nen Pedro ya anggapo’d saraman a totoo. Anto itan?

Tinepetan natan nen Jesus iray apostoles to: “Labay yo met so ontaynan?” (Juan 6:67) Say 12 so katongtong to, balet si Pedro so inmebat. Mabetbet ya ontan so gagawaen to lapud sikato lagi so sankatatkenan ed saray apostol. Antokaman so kipapasen, sikato so sankaprangkaan a mansalita ed sikara; ompatnag a naynay ton ibabalikas no antoy walad kanonotan to. Diad sayan pankanawnawa, onia so agaylan abig tan agnalingwanan ya imbalikas to: “Katawan, siopa so laen mi? Wala ed sika so saray salita na maando a bilay.”​—Juan 6:68.

Kasin atenyeg so liknaan mo ed sarayan salita? Say pananisia nen Pedro ed si Jesus so tinmulong ed sikaton mangipatnag na alay abig a kualidad​—say katooran. Malinew ed si Pedro ya anggapo lay arum a Manangilaban noagta si Jesus, a sikatoy mangilaban panamegley na saray salita to​—saray bangat to nipaakar ed Panarian na Dios. Amta nen Pedro ya anggaman walaray agto ni natalosan, anggapo lay arum a laen to pian naawat toy pabor na Dios tan say bilay ya andi-anggaan.

Ontan met kasi naliliknam? Makapaermen ta dakel so mangibabagan inaro day Jesus balet ta ag-ira matoor. No talagan matoor tayo’d si Kristo, nepeg a mipara ed si Pedro so pangipasen tayo ed saray bangat nen Jesus. Kaukolan a saratan et aralen, talosan, tan iyaplika tayo, anggaman nayarin duma iratan ed saray iilaloan odino panlabayan tayo. Labay nen Jesus a manbilay itayo ed andi-anggaan, tan naawat tayo labat itan no mansiansia itayon matoor.

Matoor Sanen Sikatoy Impetek

Kayari na sayan agawa, intagar nen Jesus iray apostol tan arum a disipulo to pian manakar ira ya onarap ed norte. Dia labat ed Dayat na Galilea et nanengneng la so manyeyelon toktok na Palandey Hermon, a satan so walad ketegan na Insipan a Dalin diad bandad norte. Legan ya ontatatdang ira a mamaarap ed saray baryo ya asingger ed Cesarea Filipos, mas nanengneng da la so kaatagey na  sayan palandey. * Diad sayan marakdakep a lugar, a sankabantag ed benegan da so Insipan a Dalin, walay importantin intepet nen Jesus ed papatumbok to.

“Siopa ak ed kuan na saray karaklan?” so tepet to. Isip yo pay reaksion nen Pedro legan ton sankanengneng iray maimanon mata nen Jesus, a natetebek to lamet so kaabigan tan say kaaralem na kakabatan na Katawan to. Labay a naamtaan nen Jesus no antoy kuan na saray totoo nipaakar ed anengneng tan nadngel da. Inmebat iray disipulo to, ya inulit da labat so pigara’d saray lingon pakaamta na totoo no siopa si Jesus. Balet ta wala ni labay a naamtaan nen Jesus ed saray maapit a patumbok to. Lingo met kasi so pakaamta ra nipaakar ed sikato? Intepet to: “Balet sikayo siopa ak ed kuan yo?”​—Lucas 9:18-22.

Alisto lamet ya inmebat si Pedro. Malinlinew tan makpel ton imbaga no antoy nononoten met na karaklan ed sikara. Inkuan to: “Sika so Kristo, ya Anak na Dios a mabilay.” Seguradon makakaimis si Jesus legan ton ibabalikas so komendasyon to’d si Pedro. Impanonot nen Jesus ed si Pedro a say angipakabat ed sayan importantin katuaan ed saramay walaan na tuan pananisia et si Jehova a Dios, aliwan say too. Atebek nen Pedro so sakey ed saray sankaimportantian a katuaan ya imparungtal nen Jehova​—say pakabidbiran ed abayag lan insipan a Mesias, odino Kristo!​—Mateo 16:16, 17.

Unong ed propesiya, sayan Kristo et tinawag a bato ya impulisay na saray managpaalagey. (Salmo 118:22; Lucas 20:17) Sankanonot nen Jesus irayan propesiya sanen imbaga to ya ipaalagey nen Jehova so kongregasyon ed saman a mismon bato, odino baton-dampay, ya abidbiran nen Pedro. * Insan inter to ed si Pedro so pigaran importantin pribilehyo ed satan a kongregasyon. Agto inikdan si Pedro na mas atagey a posisyon nen saray arum ya apostol, a singa papanisiaan na arum, noagta inmatalek to ray responsabilidad ed sikato. Inter to’d si Pedro ‘iray tombok na panariay tawen.’ (Mateo 16:19) Si Pedro so mangilukas ed ilalo pian makaloob ed Panarian na Dios so taloran grupo na totoo, unona et saray Judio, insan saray Samaritano, tan kaunoran et saray Gentil odino saray aliwan Judio.

Ingen, imbaga nen Jesus a siopaman a naikdan na dakel et dakel met so eebatan to, tan apaneknekan iya ed kipapasen nen Pedro. (Lucas 12:48) Angiter si Jesus na kaaruman nin importantin katuaan nipaakar ed Mesias, pati say asingger lan panirap tan ipatey to ed Jerusalem. Apagaan si Pedro ed sayan nadngel to. Inyakar toy Jesus ed pireg insan to imbagan: “Kasian moy inkasika, Katawan. Ag-iyan balot nagawa ed sika.”​—Mateo 16:21, 22, NW.

Maabig met so intension nen Pedro, kanian sikatoy abigla ed ebat nen Jesus. Imbeneg nen Jesus si Pedro tan ninengneng toy arum a disipulo to, a nayarin mipara’d si Pedro so nononoten da, tan inkuan to: “Ekal ka’d arap ko, Satanas; sikay sakey a makapagapol ed siak: ta agmo nononoten iray  bengatlan nipaakar ed Dios, noag saray bengatlan nipaakar ed saray totoo.” (Mateo 16:23; Marcos 8:32, 33) Amin tayo et makaaral ed sayan imbaga nen Jesus. Mainomay tayon iyuna so dilin kanonotan tayo nen say kanonotan na Dios. No ontan, anggano say intension tayo et ontulong, agtayo naliklikas a say susuportaan tayo la manaya et si Satanas, aliwan say Dios. Anto balet so reaksion nen Pedro?

Seguradon atalosan to ya aliwan literal so kabaliksan na impanawag nen Jesus ed sikato a Satanas a Diablo. Say paraan na impitongtong nen Jesus ed si Pedro et duma ed si Satanas. Diad si Satanas, oniay imbaga nen Jesus: “Arawi ka dia”; diad si Pedro balet et inkuan to: “Ekal ka’d arap ko.” (Mateo 4:10) Ag-impulisay nen Jesus iyan apostol ya akanengnengan toy maabig iran kualidad, balet impetek To labat so aliwan panagnonot to. Mainomay sirin a natalosan no akin a nakaukolan ya onekal si Pedro ed arap na Katawan to pian agmagmaliw a pakatiroran, noag ingen onla ed benegan to pian onsuporta ed sikato.

Kasin akiebatan, nampasnok, odino sinmyodot si Pedro? Andi; mapaabeba ton inawat so impangipetek ed sikato. Kanian impanengneng to lamet so katooran. On, amin ya ontutumbok ed Kristo et mankaukolan na panangipetek ed panapanaon. No mapaabeba tayon awaten so disiplina tan makaaral ed satan, mas onapit tayo’d si Jesu-Kristo tan ed Ama to, si Jehova a Dios.​—Uliran 4:13.

Abendisyonan Lapud Katooran To

Agnambayag et wala lamet so imbaga nen Jesus ya agda inilaloan: “Tua kuan ko’d sikayo, Wala ray arum ed saray wadia, ya anggan panon agda naani natawayan so patey, anggad pakanengneng da ed Anak na too ya onsabi ed panarian to.” (Mateo 16:28) Seguradon nannonotan lamet a maong nen Pedro irayan salita. Anto kasi labay ya ibaga nen Jesus? Nayarin inisip nen Pedro no kasin samay impanimbawa ed sikato et sengegay agto la pakaawat na antokaman nin nikaduman pribilehyo.

Balet kayari sakey simba, intagar nen Jesus si Santiago, Juan, tan Pedro diad “sakey a palandey ya atagey”​—nayarin diad Palandey Hermon, a pigaran kilometro labat so kaarawi to. Nayarin labi la’d saman ta lalabanan na sarayan taloran lalaki so pantemeg da. Legan a manpipikasi si Jesus, biglan nakal so pantemeg da lapud sakey ya agawa.​—Mateo 17:1; Lucas 9:28, 29, 32.

Anengneng day panguuman na itsura nen Jesus. Nagmaliw a maliwliwawa so lupa to anggad nagmaliw itan a makalaram a singa agew. Tan say kawes to et masmasnag ya amputi. Insan walay anengneng dan duara a kaiba nen Jesus, say sakey et irerepresenta toy Moises tan samay sakey et si Elias. Mitotongtong ira ed sikato nipaakar ed “itaynan to a ngalngali nasumpal ed Jerusalem,” salanti, say ipatey tan kioli to. Malinlinew sirin ya alingoy Pedro sanen binano toy Jesus ya onla’d Jerusalem a ditan manirap tan ompatey.​—Lucas 9:30, 31.

Alikna nen Pedro a nakaukolan toy mibali ed sayan nikadkaduman anengneng da. Sanen ompatnag a singa ontaynan lay Moises tan si Elias, nansalitay Pedro: “Managbangat, maong ed sikatayo so panayam dia; et manggawa itayo na talora ya ayaman; sakey so nipaakar ed sika, tan sakey so nipaakar ed Moises, tan sakey so nipaakar ed si Elias.” Siempre, agla nakaukolan so tolda odino ayaman parad sarayan mangirerepresenta ed duaran abayag lan inatey a lingkor nen Jehova. Diad tua et ag-amta nen Pedro no antoy ibabaga to. Balet, agyo ta pandinayewan so inkaligsa tan panangiyansakit na sayan too?​—Lucas 9:33.

 Wala ni sakey a nikadkaduman naeksperiensya nen Pedro, Santiago, tan Juan ed saman a labi. Walay lurem a sinmakbong ed sikara diman ed palandey. Diad saman a lurem et walay nadngel dan boses​—say boses nen Jehova a Dios! Inkuan to: “Saya sikato so Ana’ko, a pinilik; sikato so denglen yo.” Insan naandi la’d saman imay nikadkaduman nanenengneng da, tan sikara labat la tan si Jesus so walad palandey.​—Lucas 9:34-36.

Agaylan bendisyon iya parad si Pedro tan ed sikatayo! Kayari pigaran dekada, insulat to so nipaakar ed sayan pribilehyo to sanen ‘anengneng toy katagyan’ nen Jesus, ya atasian ton mismo so gloria to sano magmaliw lan Ari ed tawen. Lapud sayan anengneng to, lalon napanmatalkan so dakel a propesiya ed Salitay Dios tan amabiskeg met iya ed pananisia to pian makapanmatoor ed saray subok. (2 Pedro 1:16-19) Ontan met so maabig ya epekto ed sikatayo no aligen tayoy Pedro diad pansiansia tayon matoor ed Katawan a tinuro nen Jehova a manguley ed sikatayo, panaral ed ehemplo to, pangawat ed disiplina tan panangipetek to, tan mapaabeban panumbok ed sikato ed inagew-agew.

[Saray paimano ed leksab]

[Kahon/Litrato ed pahina 28]

 Siopa so Baton-Dampay?

“Kuan ko met ed sika, a sika Pedro ka, et dia ed tapew na sayan baton dampay ipaalagey ko naani so iglesiak [odino kongregasyon ko].” (Mateo 16:18) Say pakatalos na arum ed sayan imbaga nen Jesus et si Pedro kuno so magmaliw a pundasyon na Kristianon kongregasyon. Ibabangat na Katolikon Simbaan ya inikdan nen Jesus si Pedro na mas atagey a posisyon nen say arum ya apostol, a sikato so ibabaga ran unonan papa. Kanian diad loob na Saint Peter’s Basilica diad Roma, nabasa irayan salita nen Jesus diad letran mas baleg nen say too.

Labay kasin ibaga nen Jesus a si Pedro imay baton-dampay a pangipaalageyan to na kongregasyon to? Andi. Nia so taloran rason no akin a segurado itayon andi so ebat. Unona, wadman met iramay arum ya apostol, tan aliwan ontan so impakatalos da ed samay imbaga nen Jesus. No inikdan la nen Jesus si Pedro na mas atagey a posisyon nen say sikara, agla ra komon nansasangsangan no siopay sankamanunaan ed sikara, agta ontan? (Marcos 9:33-35; Lucas 22:24-26) Komadua, imbaga nen apostol Pablo a say baton-dampay et si Jesu-Kristo, aliwan si Pedro. (1 Corinto 3:11; 10:4) Komatlo, napatnagan ed mismon sulat nen Pedro ya agto ipapasen a sikato imay baton-dampay. Imbes, inkuan to a si Jesus imay abayag lan impropesiya a “manuna a bato” a pinili na Dios.​—1 Pedro 2:4-8.

Siansia nin ipipilit na arum a si Pedro imay tutukoyen nen Jesus a baton-dampay lapud say kabaliksan na ngaran to et “Bato.” Balet diad Mateo 16:18, aliwan pareho so kabaliksan na ngaran nen Pedro ed samay salitan inusar parad “baton-dampay.” Say kabaliksan na ngaran nen Pedro et “Sakey a Bato,” tan say salita ya inusar ed saya et parad laki; say salita ya inusar ed “baton-dampay” et parad bii. Panon tayo sirin a talosan imay imbaga nen Jesus? Singa oniay ibabaga to’d si Pedro: “Sika, a tinawag kon Pedro, odino Bato, atebek mo so tuan pakabidbiran na ‘baton-dampay,’ say Kristo, a magmaliw a pundasyon na Kristianon kongregasyon.” Agayla so pribilehyo nen Pedro diad intulong to ed pangiparungtal ed sayan importantin katuaan!

[Litrato ed pahina 24, 25]

Nanmatoor si Pedro anggan sanen sikatoy impetek

[Litrato ed pahina 26]

Lapud katooran nen Pedro, nipanengneng ed sikato so gloria nen Jesus