Onapit ed Dios

Totooren To Iray Sipan To

JOSUE 23:14

KASIN nakal lay panagmatalek mo ed arum? Makapaermen ta natan et naaandi lay talek na totoo ed sakey tan sakey. No bilang ta asakitan ka lapud tinilaan ka na toon pampipiyaan mo, odino agto tinoor so sipan to, nayarin naekalan ka lay talek ed sikato. Balet ta walay sakey a sarag mon panmatalekan, tan agto kan balot dismayaen. “Manmatalek ka ed Jehova ed simoon a pusom,” so ipapaseseg ed sikatayo na Uliran 3:5. Akin et manepeg labat a panmatalekan tayo si Jehova? Pian naebatan iya, nengnengen tayo pa imay imbaga nen Josue, sakey a toon nanmatalek a maong ed si Jehova. Nabasa itan ed Josue 23:14.

Ilitrato pa iya ed nonot. Si Josue, a sinmublay ed si Moises bilang lider na Israel, et mantaon lay 110. Legay bilay to, anengneng ton mismo so dakel a makapakelkelaw a ginawa nen Jehova parad Israel, pati say mamilagron impangisalba to’d sikara diad Ambalangan Dayat, manga 60 taon lay apalabas. Leleg ton sankanonot iratan, tinawag nen Josue ‘iray mamasiken, uloen, ukom, tan makauley’ na Israel. (Josue 23:2) Aglabat napatnagan ed samay imbaga to’d sikara a sikatoy makabat lapud inkatatken, noagta napatnagan met so aralem a panagdalepdep to tekep na pananisia.

“Magano ak lan ontaynan,” so kuan nen Josue. Oniay ibabalikas na sakey a magano lan ompatey. Singa ibabaga nen Josue ya, “Agak la manbayag.” Lapud amta ton asingger lay ipatey to, abayag ton minorekdek iray agawgawa’d bilay to. Anto kasin panamatanir so imbalikas to ed saray kapara ton managdayew ed si Jehova?

Intuloy ni nen Josue: “Say Katawan a Dios yo et inter to’d sikayoy amin iran maabig a bengatla ya insipan to. Asumpal ya amin iray insipan to; anggapoy ag-agawa.” (Maung a Balita) Imbalikas iya na toon nanmatalek a maong ed Dios. Antoy rason? Diad amin ya anengneng nen Josue, apaneknekan to a lanang a totooren nen Jehova iray sipan To. * Malinew so punto: Labay nen Josue a saray kapara ton Israelita et sigpot a manmatalek a nagawa met so amin ya insipan nen Jehova ed sikara.

Oniay inkomento na sakey a reperensya ed Biblia nipaakar ed Josue 23:14: “Iparungtal so kada sipan ed Biblia; insan usisaen iray agawgawa’d mundo; tan tepetan so kada toon wadtan, no walay anggan sakey a sipan ya agtinoor odino nilingwanan na Dios.” No nayari labat komon a gawaen iya, nibaga tayo met imay imbaga nen Josue​—amin ya insipan nen Jehova et nasumpal.​—1 Arari 8:56; Isaias 55:10, 11.

Diad Biblia et nabasa iray sipan na Dios ya asumpal la, pati saramay nanenengneng tayon mismo a nasusumpal la. Nabasa met ditan iray alay abig a sipan nen Jehova a nagawa ed arapen tayo. * Akin ta no usisaen mon mismo iratan? No aralen moy Biblia, nakombinse ka a manepeg labat a panmatalekan si Jehova, lapud totooren to iray sipan to.

[Saray paimano ed leksab]