No Antoy Imbangat nen Jesus Nipaakar ed Inkasikato

“Amta nen Jesus so katuaan nipaakar ed inkasikato, no iner so nanlapuan to, no akin a linma’d dalin, tan antoy nagawa’d sikato diad arapen.”​—AUTOR A SI HERBERT LOCKYER.

PIAN nakombinse tan makapanmatalek itayo ed saray imbangat nen Jesus, walaray nepeg tayon amtaen nipaakar ed sikato. Siopan talaga si Jesus? Iner so nanlapuan to? Antoy gagala to ed bilay? Diad Ebanghelyo nen Mateo, Marcos, Lucas, tan Juan, narengel tayon mismo ed si Jesus iray ebat, a singa panangibaga.

Sikatoy nambilay la antis a nianak diad dalin Aminsan et oniay inkuan nen Jesus: “Anggapo ni Abraham, wala ak la.” (Juan 8:58) Si Abraham et nambilay manga 2,000 a taon antis a nianak si Jesus. Ingen, anggapo ni iyan matoor a patriarka et wala lay Jesus. Iner balet nambilay si Jesus? “Linmeksab ak manlapud tawen,” so inkuan to.​—Juan 6:38.

Anak na Dios Saray anghel ya ananak nen Jehova et dakdakel, balet nikadkadumay Jesus. Imbaga ton sikato so “bogbogtong ya Anak na Dios.” (Juan 3:18) Say kabaliksan na saya et sikato labat so direktan pinalsa na Dios. Diad panamegley na sayan bogbogtong ya Anak et pinalsa na Dios so amin ni ran bengatla.​—Colosas 1:16.

“Say Anak na too” Sayan balikas et aminpigapigan inusar nen Jesus pian ipakabat toy inkasikato. (Mateo 8:20) Sirin, impatnag ton sikatoy aliwan sakey labat ya anghel odino espiritu a nansulong na laman na too, noagta talagan sakey a too. Manlapud tawen et inyalis na Dios so bilay na Anak to ed dalin diad panamegley na masanton espiritu kanian si Jesus et inlukon na sakey a birhen a si Maria. Diad ontan, nianak si Jesus bilang perpekton too tan andiay kasalanan.​—Mateo 1:18; Lucas 1:35; Juan 8:46.

Say insipan a Mesias Sanen imbaga na sakey a Samaritana ya, “Amtak ya onsabi so Mesias” et inkuan nen Jesus, “Siak a mitotongtong ed sika et siak itan.” (Juan 4:25, 26) Say kabaliksan na salitan “Mesias,” odino “Kristo” et “Samay Nilanaan.” Si Jesus et nilanaan, odino pinili na Dios, pian sumpalen toy nikabkabiig a betang to diad pakagawa na saray sipan na Dios.

Say manunan gagala to Aminsan et oniay inkuan nen Jesus: “Kaukolan ko met [ya] iyabawag so maong a balita na panarian na Dios, ta saya so angibakian ed siak.” (Lucas 4:43) Anggaman dakel so maabig a ginawa to ed saray mankaukolan, say akasentroan na bilay to et say pangipulong ed Panarian na Dios. Pantongtongan tayo ed ontumbok iran pahina no antoy imbangat to nipaakar ed satan a Panarian.

Malinew sirin, aliwan ordinaryon too si Jesus. * Say impanbilay to’d tawen et angarum na puersa ed saray imbalikas to sanen sikatoy wadiad dalin. Agtayo la sirin pankelawan no akin a say bilay na minilyon a totoo ed interon mundo et naapektoan ed mensahen impulong to.

[Paimano ed leksab]