Say Too ya Akapanguman ed Mundo
Say Too ya Akapanguman ed Mundo
Binilyon lan totoo so nambilay tan inatey ed sayan mundo. Maslak ed sikara et agla nanonotan diad inlabas na panaon. Balet, dagdaiset so akaimpluensya ed bilay na totoo—o diad bilay mon mismo.
KABANGON mo’d kabuasan, manpreprepara ka ya onla’d trabaho. Uusaren moy silew legan kan manpaparaan. Mangaawit kay libro odino magasin pian walay basaen mo ed bus. Nanonotan mon wala manayay antibiotic a kaukolan mon tumaren pian agka naimpeksion. Kanian, kagapogapo ni labat na agew mo et dakdakel lay apinabangan mo ed agawaan na pigaran kabkabat a totoo.
Michael Faraday Nianak nen 1791, sayan physicist a taga England so akaimbento na electric motor tan dynamo. Saray imbension to et akatulong pian mas mainomay a nisuplay so koryenti ed totoo.
Ts’ai Lun Sakey ya opisyal diad palasyo na ari ed Tsina. Sikato so bibidbiren ya akapaaligwas ed panaggaway papel sanen manga 105 C.E, a nanresulta ed dakel a produksion na papel.
Johannes Gutenberg Nen manga 1450, sayan taga Germany so akaimbento na sankaunaan ya imprintaan, a manomanon nilira iray letra. Lapud sayan imbension, aliwa lan mabmabli so panag-imprinta, kanian mas dakel lan impormasyon so nababasa na totoo.
Alexander Fleming Nen 1928, sayan researcher a taga Scotland et akadiskobre na sakey ya antibiotic a tinawag ton penicillin. Saray antibiotic et kaslakan lan uusaren natan pian tambalen iray impeksion lapud bakterya.
On, sarayan adiskobre tan naimbento na pigaran totoo et apinabangan tan akatulong ed bilay na binilyon.
Balet, walay sakey a too a nikadkaduma ed sikaran amin. Sikatoy ag-akabkabat lapud imbension ed siensia odino medisina. Simpli labat so impanbilay to manga 2,000 a taon lay apalabas balet sikatoy akabkabat lapud intilak ton mensahe—sakey a mapuersan mensahe a mangiiter na ilalo tan ligliwa. No say pangibasiyan tayo et say epekto na mensahe to ed bilay na totoo diad interon mundo, dakel so mipakna a talagan sayan too so akapanguman ed mundo.
Sayan too et si Jesu-Kristo. Anton mensahe so impulong to? Antoy epekto na mensahe to ed bilay mo?