Akin et Ag-akibabali Jesus ed Politika?

IMADYIN mo iyan agawa nen taon 32 C.E. Mansirunget la’d saman. Si Jesus, samay impasakbay na Biblia a Mesias, et kabkabat la ta papaabigen to ray mansasakit tan pabibilayen to ni ingen iray inaatey. Diad sayan agew, apabilib toy nilibon totoo lapud saray ibabangat to nipaakar ed Dios tan makapakelkelaw iran milagro to. Pinankokompog to ray totoo ed angkekelag iran grupo. Nampikasi’d si Jehova tan nanmilagro pian napakan to ran amin. Insan to impakolekta iray kera pian anggapoy nasayang. Antoy reaksion na totoo?​—Juan 6:1-13.

Sanen anengneng da iray milagro nen Jesus tan apaneknekan dan sikatoy maong a lider lapud sarag ton asikasoen tan iter so pankaukolan na dakerakel a totoo, inisip dan marakep no gawaen dan ari. (Juan 6:14) Agla pankelawan itan a reaksion da. Desperado ran nawalaay maong tan maabilidad ya manuley ta diad saman et sikaray uuleyan na arum a bansa, a mamapairap ed sikara. Kanian, pinilit day Jesus ya mila’d politika. Antoy reaksion nen Jesus?

“Lapud atebek nen Jesus a sikatoy ngalngali da la . . . gawaen ya ari ra, sikatoy tinmaynan lamet ya amaarap ed palandey a bukbukor to,” so inkuan na Juan 6:15. Napatnagan ed saya so desisyon nen Jesus. Talagan agto labay so mibabali’d politika. Satan ya desisyon to et agbalot anguman. Imbaga ton ontan met so nepeg ya gawaen na saray papatumbok to. (Juan 17:16) Akin et ontay desisyon to?

Akin et Ag-akibabali Jesus?

Ag-akibabali Jesus ed politika lapud talagan uunoren to iray prinsipyo na Kasulatan. Nia so duara labat ed sarayan prinsipyo.

‘Saray totoon walaay pakayari et maniirap iray totoon uuleyan da.’ (Ecclesiastes 8:9, Maung a Balita) Ontan so impaneskribe na Biblia ed abayag lan rekord na impanuley na too. Tandaan a si Jesus et abayag lan walad tawen bilang espiritu antis a linma diad dalin bilang too. (Juan 17:5) Amta sirin nen Jesus ya anggano maabig so intension na too, agto sarag ya iter so amin ya pankaukolan na katooan, tan talagan agpinalsay Dios so too pian uleyay kapara ton too. (Jeremias 10:23) Amta nen Jesus a walay sananey ya solusyon ed problema na mundo, aliwan say gobiernoy too.

“Say interon mundo et walad pakayari na samay sakey a mauges,” si Satanas a Diablo. (1 Juan 5:19) Dakel so agmakapanisia ed saya. Iisipen dan wala met iray maong ya manuuley ed gobierno a labay dan paabigey kipapasen na mundo. Balet, anggan antoy gawaen na saray sankamaongan lan manuley et agda sarag a labanan so impluensya na samay tinawag nen Jesus a “manuley na sayan mundo.” (Juan 12:31; 14:30) Kanian oniay imbaga nen Jesus ed sakey a politiko: “Say panarian ko et agkabiangan na sayan mundo.” (Juan 18:36) Si Jesus so aturon magmaliw ya Ari na gobiernoy Dios diad tawen. No sikatoy akibabali ed politika, ipapanengneng ton agto susuportaay gobierno nen Ama to.

Agta singa ibabangat sirin nen Jesus ya anggapoy obligasyon na saray patumbok to ed gobiernoy too? Andi. Imbes, imbangat to ran balansien so responsabilidad da ed Dios tan say obligasyon da ed gobiernoy too.

Nirespeto nen Jesus so Autoridad na Gobierno

Aminsan, sanen manbabangat si Jesus ed templo, sikatoy tinepetan na saray onsusumpa no kasin nepeg ya manbayar na buis iray totoo. Ginawa da iya pian ereley Jesus ed salita. No andi so ebat to, ompaway ya singa to kokontraey  gobierno tan nayarin mas onkasil so liknaan na saray totoo a manrebelde, ta laba-labay da lay makabulos ed panamairap na Roma. No on balet so ebat to, isipen na karaklan ya baliwala’d sikato iray nasasagmak dan irap. Onia balet so balansin ebat nen Jesus: “Ibayar yo sirin ed Cesar iray bengatlan kien nen Cesar, balet dia ed Dios iray bengatlan kien na Dios.” (Lucas 20:21-25) Kanian, saray patumbok nen Jesus et walaay obligasyon ed Dios tan ed Cesar, odino gobiernoy too.

Anggan panon et walay deen lapud saray gobierno. Kanian manepeg met labat ya kerewen da ed saray sakop da a magmaliw iran matua, manbayar na buis, tan unoren so ganggan na bansa. Imbayar kasi nen Jesus ed “Cesar iray bengatlan kien nen Cesar?” Saray ateng nen Jesus et maunor ed ganggan, anggan no maminsan et ag-itan mainomay parad sikara. Singa bilang, nambiahe Jose kaibay malukon ya asawa ton si Maria na manga 150 kilometro paonla’d Betlehem pian naunor day ganggan na Roma nipaakar ed census. (Lucas 2:1-5) Maunor ed ganggan si Jesus a singa sikara, a nambayar ni ingey buis anggano diad tua et ag-obligadon manbayar. (Mateo 17:24-27) Maalwar met pian agto napanuleyan iray bengatlan anggapo’d autoridad to. (Lucas 12:13, 14) Nibaga sirin ya nirespeto nen Jesus so sistemay gobierno, anggano ag-akibiang ed satan. Anto balet so labay ya ibaga nen Jesus sanen imbaga ton ibayar “dia ed Dios iray bengatlan kien na Dios”?

No Panon ya Inter nen Jesus “ed Dios Iray Bengatlan Kien na Dios”

Aminsan et walay nantepet ed si Jesus no antoy sankaimportantian ed amin a ganggan na Dios ed too. Oniay ebat to: “‘Arom  si Jehova a Dios mo ed interon pusom tan ed interon kamarerwam tan ed interon nonot mo.’ Saya so sankaimportantian tan unonan ganggan. Say komadua a mipadpara ed saya et, ‘Arom so kaparam a too a singa ed sikan dili.’” (Mateo 22:37-39) Imbangat nen Jesus a no nipaakar ed pambayar ‘ed Dios na saray bengatlan kien na Dios,’ say sankamanunaan ya iter tayo’d Sikato et say aro tayo, say interon puso tan kompleton debosyon tayo.

Sarag to kasin kapaldua labat so iter tayon aro ed Dios a Jehova, tan say kapaldua et iter tayo’d gobiernoy too? Imbagan mismo nen Jesus iyan prinsipyo: “Anggapo so nayarin manpaaripen ed duaran katawan; ta balanglan busolen to imay sakey tan aroen to imay sananey, odino sikatoy mansiansia ed sakey tan mudmoraen to imay sananey.” (Mateo 6:24) Anggaman say tutukoyen dia nen Jesus et agnayarin parehon aroen na too so Dios tan kayamanan, seguradon parad sikato et agmet nayarin aroen na sakey a too so Dios balet ta mibiang ed politika. Tan ontan met so panmoria na saray patumbok to nen inmunan siglo.

Papaneknekan na saray dagdaan lan rekord a saray patumbok nen Jesus nensaman et agbalot akibabali’d politika. Say debosyon da et diad samay Sakey ya dinayew nen Kristo, kanian agda insambay suporta ra ed Roma tan ed emperador to, ag-ira nansundalo, tan ag-ira angawat na posisyon ed gobierno. Lapud satan et asagmak day amin a klase na isusumpa. Inakusaan ni ra ingen na saray onsusumpa ya kabusol da iray totoo. Tua kasi itan ya akusasyon?

Inaro na Saray Tuan Kristiano Iray Totoo

Imbaga nen Jesus a say komaduan sankaimportantian a ganggan na Dios et, “Arom so kaparam a too a singa ed sikan dili.” Malinew sirin ya agnepeg a busolen saray tuan patumbok  nen Kristo iray totoo. Inaro nen Jesus iray totoo, nilingkoran to ira, tan tinulongan to ni ira ingen ed saray problema ra.​—Marcos 5:25-34; Juan 2:1-10.

Balet ta antoy manunan rason no akin ya akabkabat si Jesus? Sikatoy agtinawag bilang Managtambal, Managpakan na Nilibo, nisay Managbilay na Inatey anggano ginawa ton amin irayan makapakelaw a bengatla. Imbes, sikatoy tinawag na totoo ya Managbangat, tan duga met labat itan. (Juan 1:38; 13:13) Imbaga nen Jesus a say manunan rason na inyakar to diad dalin et pian bangatan iray totoo nipaakar ed Panarian na Dios.​—Lucas 4:43.

Satan so rason no akin ya manuna met ed bilay na saray tuan patumbok nen Kristo so kimey ya inyuna na Katawan da sanen wadiad dalin​—say pambangat ed totoo nipaakar ed Panarian na Dios. Inganggan nen Jesu-Kristo so amin a tuan Kristiano a bangatan so totoo ed interon mundo nipaakar ed satan. (Mateo 24:14; 28:19, 20) Satan ya agnaderal a gobierno ed tawen so manuley ed amin a pinalsa na Dios, tan unong ed samay ganggan nipaakar ed aro. Panamegley na satan et nagawa so linaway Dios, tan naandi ni ingen so kairapan tan patey. (Mateo 6:9, 10; Apocalipsis 21:3, 4) Kampegan tinukoy na Biblia so mensahe nen Kristo a “maong a balita”!​—Lucas 8:1.

Kanian panon mon nabidbir iray tuan patumbok nen Jesu-Kristo natan? Kasin mibabali ira’d politika? Odino say misyon da et singa met ed si Jesus, say pampulong tan pangibangat ed Panarian na Dios?

Labay moy makaamta ni nipaakar ed Panarian na Dios tan no panon ya apektaen na satan so bilay mo natan? Maabig no kontaken mo iray Tasi nen Jehova ed lugar yo odino nengnengen so opisyal a Web site da, www.watchtower.org.

[Kahon/Saray litrato ed pahina 24, 25]

Kasin Makakatulong Iray Tasi nen Jehova ed Komunidad?

Agmibabali ed politika iray Tasi nen Jehova. Anggaman ontan, diad komunidad da et talagan ontutulong ira ed totoo, antokaman ni apalabas odino nanlapuan a bansa na saratan. Nia ray pigaran gagawaen da:

▪ Say masulok a pitoran milyon a Tasi nen Jehova et mabulbulos a manguusar na manga 1.5 bilyon ya oras kada taon pian bangatan na Biblia iray totoo, ya ontulong ed sikaran nitunda so makapuy iran bisyo tan kagagawa, napaelet so aroan na pamilya ra, tan magmaliw a mas maliket so bilay da.

▪ Mangiimprinta tan mangibubunog ira na saray libren babasaen ed masulok a 500 a lenguahe, a diad arum ingen a lugar et saratan labat a babasaen so nabasa ed lenguahe ra.

▪ Wala met so programa ra nipaakar ed pansalita’d publiko, a ditan et minilyon lay akaaral no panon so malinew tan marespeton panagsalita

▪ Mangi-isponsor ira na saray programa ya ontutulong ed pigan libon totoo ed interon mundo a makaaral a manbasa tan mansulat.

▪ Angorganisa ira na masulok a 400 ya Regional Building Committee ed interon mundo a mangibabangat ed saray boluntaryo nipaakar ed konstruksion, pian makapampaalagey ira na saray bilding ya usaren parad panaral na Biblia. Diad sayay linmabas a dekada, masulok a 20,000 iran pasen a panagdayewan a tatawagen a Kingdom Hall so nipaalagey.

▪ Ontutulong ira ed saramay apektadoy kalamidad ed interon mundo, Tasi man odino andi. Duay taon kayari na samay nantutumbokan a bagyo ed United States, masulok a 90 Kingdom Hall tan 5,500 a kaabungan so nipaalagey na saray boluntaryon Tasi.

[Litrato ed pahina 23]

Sanen sinalin piliten na totoo si Jesus a mibali’d politika, sikatoy tinmaynan tan “amaarap ed palandey a bukbukor to”