Tepet na Saray Manbabasa . . .

Wala kasi gapoan na Dios?

▪ Ibabaga na Biblia ya anggapoy gapoan na Dios. Say Dios et lawas lan wala. Tua, sayan ideya et mairap a talosan, balet, aliwan daput no mairap a talosan et agtayo la panisiaan.

Diad tua, agtayo nepeg ya isipen a natalosan tayon amin so nipaakar ed Dios. Oniay binidbir nen apostol Pablo: “O agaylay kaaralem na kaykayamanan tan karunongan tan pikakabat na Dios! Agaylan agnausisa iray panangukom to tan agnatonton iray dalan to!” (Roma 11:33) Talagan agnatukor na isip tayo so kaaralem na karunongan tan pikakabat na Dios, no panon ya agmet natalosan na sakey ya melag ya ugaw so amin ya nipaakar ed ateng to. Say manunan tutukoyen nen Pablo ed sayan imbaga to et say agnaparaan ya karunongan tan panangasi nen Jehova. Balet naaralan tayo met ed saya ya walaray bengatlan nipaakar ed Dios a Jehova ya agtayo natalo-talosan. Say sakey ed saratan et say ideya a say Dios et anggapoy gapoan to. Anggano agtayo itan natalosan a maong, makapanmatalek itayo ed ibabangat na Biblia nipaakar ed Dios. Oniay imbaga nen Jesu-Kristo nipaakar ed saray masanton sulat: “Say salitam et katuaan.”​—Juan 17:17.

Diad pikakasi et oniay imbaga nen Moises ed si Jehova: “Manlapu ed andi-anggaan ya angga ed andi-anggaan, Dios ka la.” (Salmo 90:2) Dia et angusar si Moises na duaran direksion pian deskribien so kiwawala na Dios. Say sakey et paonla’d arapen. Si Jehova ‘imay Sakey ya mabilay lawas ed andi-anggaan.’ (Apocalipsis 4:10) Kanian, say kiwawala na Dios et mantultuloy ed andi-anggaan ya arapen. Say sakey nin direksion ya inusar nen Moises et papawil ed apalabas. Imbaga ton wala lay Dios “manlapu ed andi-anggaan.” Diad arum a salita, say Dios et agpinalsa odino linmesa.

Walaray ideyan aliwan mainomay a talosan balet ta papanisiaan tayo. Say sakey ya alimbawa et say nipaakar ed positive tan negative iran numero. Anggapoy anggaan na saray numero, balanglan patagey odino paleksab. Agta makatulong iyan alimbawa pian natalosan tayo met so ideya a say Amalsa et anggapoy gapoan tan anggaan to?

Say Dios labat sirin so manepeg a tawagen ed nikabkabiig a titulon “Ari ed andi-anggaan.” (1 Timoteo 1:17) Isipen pa: Si Jesu-Kristo, saray minilyon ya anghel ed tawen, tan amin a totoo ed dalin et pinalsa, kanian walay gapoan da. (Colosas 1:15, 16) Anggapo balet so amalsa ed Dios. No ipilit tayon pinalsa so Dios, say sakey lamet ya onlesan tepet ya anggapon talagay ebat to et no siopay amalsa ed Amalsa. On, si Jehova labat so lawas lan wala “manlapu ed andi-anggaan ya angga ed andi-anggaan.” Diad arum a salita, say kiwawala nen Jehova et diad “ami’ panaon.”​—Judas 25, Say Biblia.

Walay naaralan tayo’d sayan katuaan ya anggapoy gapoan tan anggaan na Dios. Ipapanengneng na samay pikakasi nen Moises a lapud andi-anggaan so Dios, garantiya itan a tooren to imay maaron sipan to ya ikdan itayo na andi-anggaan a bilay. Say bilay na too natan et antiktikey, balet say Dios et deneskribe bilang ‘panag-ayaman tayo leleg na amin a kailalakan.’ Si Jehova so maaron Ama tayo, tan sikatoy lawas wadtan parad totoo to, nensaman, natan, tan ed andi-anggaan. Talagan makapalikliket iyan katuaan!​—Salmo 90:1.