Pikakasi

2 Siopa so Pampikasian?

KASIN saksakey so lalaen na amin a pikakasi, anggano nanduruman dios so pampipikasian? Ontan so sisisiaen na dakel a totoo natan, nagkalalo la ed saramay manusuporta ed saray interfaith movement (pankakasakey na totoon nandurumay relihyon da) tan saramay mangibabagan duga so amin a relihyon. Balet, posible kasi ya aliwan tua iyan ideya?

Ibabangat na Biblia ya diad tua et aliway pampipikasian na dakel a totoo. Sanen isusulat ni so Biblia, say maslak a pampipikasian na totoo et saray inukit ya imahen. Balet ta aminpigapigan imbaga na Dios ya agto labay itan a kagagawa. Onia ingen so impaneskribe na Salmo 115:4-6 ed saray imahen: “Wala so layalayag da, balet ag-ira makadngel.” Malinlinew sirin so punto: Anggapoy kana na pampikasi ed dios ya agto kan balot narengel.

Walay detalyadon salaysay ed Biblia a mamaneknek ed sayan punto. Kinompronta na tuan propeta a si Elias iray propeta nen Baal. Imbaga nen Elias a manpikasi ira ed dios da, insan kayari da et manpikasi met si Elias ed Dios to. Tan no siopa so onebat, sikato so tuan Dios, tan palso balet imay ag-onebat. Kanian abaybayag tan impasya so impanpikasi na saramay propeta nen Baal, ya naneyag-eyag ni ra ingen​—balet ta anggapoy gunggona na saratan! Nabasa ed salaysay ya: ‘Anggapoy inmebat nisay dinmengel.’ (1 Arari 18:29) Antoy agawa balet sanen si Elias lay nampikasi?

Kayari pikakasi nen Elias, inmebat a tampol so Dios to, ya angipelag na apoy manlapud tawen pian napoolan imay bagat to. Antoy pidumaan na pikakasi nen Elias? Naamtaan tayoy ebat diad samay mismon pikakasi to, ya nabasa ed 1 Arari 18:36, 37. Antiktikey itan a pikakasi, a manga 30 labat a salita diad orihinal a Hebreon lenguahe. Balet diad sayan antiktikey a pikakasi nen Elias et amitlo ton tinawag so Dios diad ngaran a Jehova.

Baal so ngaran na dios na saray Canaanita, a say labay ton ibaga et “akankayarian” odino “katawan,” tan dakel so bersion na sayan dios, depende ed lugar diad Canaan. Nikadkaduma balet so ngaran a Jehova, ta saksakey so tutukoyen ton Persona ed interon uniberso. Oniay imbaga na sayan Dios ed saray lingkor to: “Siak si Jehova, satan so ngaran ko; et say gloriak agko naani iter ed sananey.”​—Isaias 42:8.

Saksakey kasi so nila na samay pikakasi nen Elias tan samay pikakasi na saray propeta nen Baal? Mabanbanday iray ritual na saray mandadayew ed si Baal tan mangibabagat ni ra ingey too, kanian abebbebay moralidad da. Duma balet iray Israelitan lingkor nen Jehova, ta ingganggan to ran sikatoy dayewen da ed mapagalang a paraan. Kanian singa onia ’tan ay: No bilang et angipawit kay sulat ya akangaran ed respetadon kaarom, isipen mo kasin nideliber  itan ed too a sananey so ngaran to tan mauges so reputasyon to? Siempre andi!

No manpikasi ka ed si Jehova, say pampipikasian mo et say Amalsa, say Ama na amin a totoo. * “Sika O Jehova, sika so Ama mi,” so imbaga nen propeta Isaias diad pikakasi to. (Isaias 63:16) Si Jehova sirin imay tinukoy nen Jesus sanen oniay imbaga to’d saray patumbok to: “Onsegep ak ed kawalaan nen Amak tan Ama yo tan Dios ko tan Dios yo.” (Juan 20:17) Si Jehova so Ama nen Jesus. Sikato so Dios a nampikasian to tan imbangat ton pampikasian met na saray patumbok to.​—Mateo 6:9.

Kasin igaganggan na Biblia a manpikasi itayo ed si Jesus, Maria, saray sasanto, odino ed saray anghel? Andi​—nepeg a diad si Jehova labat. Nia ay so duaran rason. Unona, no siopa so pampipikasian tayo, sikato imay dadayewen tayo, tan ibabaga na Biblia a say nepeg labat a dayewen et si Jehova. (Exodo 20:5) Komadua, ibabaga na Biblia a si Jehova so ‘ondedengel ed pikakasi.’ (Salmo 65:2) Anggaman dakel met so kimey ya iiter nen Jehova ed arum, agton balot inter iyan responsabilidad ed anggan siopa. Isisipan ton sikaton mismo so ondengel ed saray pikakasi tayo.

Kanian no labay mon dengelen na Dios iray pikakasim, tandaan mo iyan ibabaga na Biblia: “Balang sakey ya ontatawag ed ngaran nen Jehova et nilaban.” (Gawa 2:21) Balet, labay kasin ibaga na saya a daput no si Jehova so pampikasian tayo et dengelen to la? Odino wala ni kaukolan tayon naamtaan no labay tayon dengelen nen Jehova iray pikakasi tayo?

[Paimano ed leksab]

[Litrato ed pahina 5]

Papaneknekan na samay agawa’d saray propeta nen Baal ya aliwan saksakey so lalaen na amin a pikakasi