Panon Mon Nalabanay Negatibon Liknaan?

ASALIM ta la imay kinmakkapuy so liknaan mo? Seguradon amin tayo et makakasali na ontan. Diad sayan panaon et mair-irap so bilay, grabe lay kaugsan, tan anggapoy hustisya. Kampega lan dakel natan so maer-ermen, ag-ondeey nonot da, tan liknaen dan anggapoy kana ra.

Makapuy so resulta na onia ran liknaan. Nayarin naekal so talek tayo’d sarili tayo, naapektoay panagdesisyon tayo, tan agtayo la maliket. Onia so kuan na Biblia: “No onkapuy ka ed agew na kasegsegang, say kasil mo sikato so melag.” (Uliran 24:10) Kaukolan tayoy biskeg pian agtayo onsukon manbilay ed sayan mundo. Nepeg tayo sirin a daegen iray negatibon liknaan. *

Baleg so nitulong na Biblia pian nalabanan iray negatibon liknaan. Labay nen Jehova, say Amalsa tan Manusustuni ed bilay, ya nalabanan moy ermen tan nasarag mo ray problemam. (Salmo 36:9) Amtaen tayo pa sirin so taloran paraan a natulongan itayo na Salita ton labanan iray negatibon liknaan.

Tandaan Mon Inad-aro Ka na Dios

Isipen na arum ya dakel so gagawaen na Dios kanian anggapo lay panaon ton imanoen so liknaan na balang sakey ed sikatayo. Kasin naiisip mo met itan? Diad tua, ipapaseguro na Biblia ya interesado so Dios ed saray liknaan tayo. Oniay imbaga na salmista: “Say Katawan maasingger ed saray nanaekalay biskeg na linawa; ilalaban to ray sigpot a naandiay ilalo.” (Salmo 34:18, Maung a Balita) Makapaligsay puso so pakaamtan say makapanyarin-amin a Soberano et asingger ed sikatayo sano nanairapan itayo!

Agtayo iisipen ya anggapoy pibabali na Dios odino agto amtay milikna. Ibabaga na Biblia ya “say Dios et aro.” (1 Juan 4:8) Inaro to ray totoo tan nalilikna toy paniirap da. Singa bilang, sanen naaripen iray Israelita diad Ehipto manga 3,500 a taon lay apalabas, oniay imbaga to: ‘Anengneng ko so ontan lan kairapan na saray totook a wadman ed Ehipto; nadngel koy tagleey da lapud saray maruksan opisyal da. Amtak so kairapan da, kanian linmasur ak, ta iyagel ko ra.’​—Exodo 3:7, 8, MB.

Natatalosan na Dios iray liknaan tayo. Agta “sikato so nanggawa ed sikatayo, ya aliwa a sikatayo a dili”? (Salmo 100:3) Kanian anggano ag-itayo natatalosan na arum, seguradon natatalosan itayo na Dios. Oniay imbaga nen Jehova: “Say too say walad paway so nenengnengen to, balet say puso so nenengnengen ko.” (1 Samuel 16:7, MB) On, anggan saray walad puso tayo et nanenengneng nen Jehova.

Tua, amta nen Jehova iray kakapuyan tan lingo tayo. Balet, pisalamatan tayo ta say maaron Amalsa et akaparaan a mamerdona. Diad impangipuyan na Dios et oniay insulat nen David: “No panoy panangasi na ama ed saray anak to, ontan met so pangakasiy Katawan ed saray mangigagalang ed sikato. Amta to no antoy inkagawa tayo; nanononotan ton dabok itayo.” (Salmo 103:13, 14, MB) Ompan say naiimano tayo labat ed sarili tayo et saray makapuy.  Aliwan ontan balet si Jehova. Say nenengnengen to’d sikatayo et say kamaongan, tan lingwanan to la ray kasalanan tayo daput no magbabawi itayo.​—Salmo 139:1-3, 23, 24.

Kanian sano say pakalikna tayo et anggapoy kana tayo, kaukolan tayon labanan itan. Nepeg tayon tandaan no antoy pakanengneng na Dios ed sikatayo!​—1 Juan 3:20.

Mikaaro ed Dios

Antoy gunggona no say pakanengneng tayo’d sarili tayo et mipara’d pakanengneng na Dios ed sikatayo? Mainomay tayo lan gawaen imay sakey nin paraan pian nalabanay negatibon liknaan​—say pikaaro ed Dios. Talaga kasin posible itan?

Si Jehova et maaron Ama, kanian labalabay to itayon tulongan pian makapikaaro itayo’d sikato. Oniay ibabaga na Biblia: “Onapit kayo ed Dios, tan sikatoy onapit ed sikayo.” (Santiago 4:8) Nonot mo pa: Anggano makasalanan tan walaray kakapuyan tayo, sarag tayon magmaliw a malet a kaaro so Soberano na uniberso.

Panamegley na Biblia et ikakabat na Dios so sarili to, diad ontan et makapikaaro itayo’d sikato. No lanang tayon basaen so Biblia, naaralan tayo ray marakdakep a kualidad na Dios. * Tan no dalepdepen odino nonoten tayon maong irayan nanaaralan tayo, nalikna tayon mas onaapit itayo’d si Jehova. Mas naapresya tayo a sikatoy talagan maaro tan mapangasin Ama.

Wala ni maabig a nagawaan na pandalepdep ed saray nababasa tayo’d Biblia. Diad iyaapit tayo’d Ama tayo’d tawen et nipapaslep ed isip tan puso tayo so Salita to, kanian satan so mangorihe, mamabiskeg na linawa, tan mangigiya’d sikatayo. Lalo tayon nakaukolan itan sano walaray pakakagonigonan odino pakapapagaan tayo. Oniay impangibaga na salmista ed satan: “No mapagpaga tan nagogonigon ak, liligliwaen tan pagagayagaen mo ak.” (Salmo 94:19, MB) Talagan makapabiskeg na liknaan so Salita na Dios. No mapaabeba tayon awaten so mensahe na katuaan a nabasa ditan, kalkalnan naekal iray negatibon liknaan tayo lapud niwala’d sikatayo so biskeg na linawa tan deen na nonot a say Dios labat so makapangiter. Diad satan a paraan et papabiskegen nen Jehova so liknaan tayo, no panon a kukuyongen na maaron ateng so asakitan odino adismayan anak to.

Say sakey nin paraan pian makapikaaro tayo’d Dios et say lanang a pitongtong ed sikato. Ipapaseguro na Biblia ya “antokaman so kerewen tayo unong ed linawa to, dengelen to itayo.” (1 Juan 5:14) Kanian antokaman so pampapagaan tayo, sarag tayo itan ya ipikasi ed Dios tan kerewey tulong to. No ibesngaw tayo’d sikato so walad puso tayo, nawalaan tayoy deen na nonot. Oniay insulat nen apostol Pablo: “Diad amin a bengatla et ipaamta yo ed Dios  iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo diad panamegley nen Kristo Jesus.”​—Filipos 4:6, 7.

No gawaen mon regular so panagbasay Biblia, panagdalepdep, tan panagpikasi, seguradon onelet so relasyon mo ed Ama tayo’d tawen. Baleg so nitulong na satan pian nalabanay negatibon liknaan. Anto ni makatulong?

Nonot Mon Lanang so Marakep ya Arapen

Anggano sankairapan lay situasyon tayo, wala ni ran siansiay maabig ya napangipokusan tayoy nonot tayo. Akin a nibaga tayo itan? On ta ipapaseguro na Dios so marakep a gawaen to ed arapen. Oniay impaneskribe nen apostol Pedro ed satan: “Walay balon katawenan tan balon dalin ya aalagaren tayo unong ed sipan to, tan diad saraya et manayam so inkatunong.” (2 Pedro 3:13) Antoy labay ya ibaga na saya?

Say “balon katawenan” et ontutukoy ed sakey a gobierno​—say Panarian na Dios ed tawen, a say Ari na satan et si Jesu-Kristo. Say “balon dalin” et ontutukoy ed saray totoo diad dalin ya aabobonan na Dios. No say “balon katawenan” la so manuley ed dalin, anggapo lan balot so pansengegan na negatibon liknaan. Ipapaseguro na Biblia ed saray totoon matoor ed Dios ya “punasen to so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot.”​—Apocalipsis 21:4.

Agta makapalikliket tan makapabiskeg na liknaan itan a sipan? Duga labat sirin a satan ya ipaparaan na Dios ed arapen parad saray tuan Kristiano et deneskribe na Biblia a “maliket ya ilalo.” (Tito 2:13) No sankanonot tayon naynay  iray sipan na Dios a gawaen to parad totoo​—tan no akin ya makapanmatalek tan makaseguro tayon ontua iratan​—naekal so inka-negatibo tayo.​—Filipos 4:8.

Ikokompara na Biblia so “ilalo na kilalaban” ed helmet. (1 Tesalonica 5:8) Nensaman, ag-irisga na sakey a sundalo so bilay to diad pi-guerra to ya anggapoy helmet. Amta ton lapud helmet et agtanton nasakitan no walay onkena ed ulo to tan onkudkuddias labat iray pana na kalaban. No panon ya proprotektaan na helmet so ulo, proprotektaan met na ilalo so kanonotan. No say sankanonot tayo et say marakep ya arapen, agtayo magmaliw ya mapagpaga tan negatibo.

Kanian, talagan posible a labanay negatibon liknaan. Sarag mo itan! Tandaan mon inad-aro ka na Dios, mikaaro ka’d sikato, tan nonot mon lanang so marakep ya arapen. No ontan so gawaen mo, maseguron wadman ka sano anggapo lan balot so negatibon liknaan!​—Salmo 37:29.

[Saray paimano ed leksab]

[Blurb ed pahina 19]

“Amtak so kairapan da.”​—EXODO 3:7, 8, MAUNG A BALITA

[Blurb ed pahina 20]

“No mapagpa- ga tan nago- gonigon ak, liligliwaen tan pagagaya- gaen mo ak.”​—SALMO 94:19, MAUNG A BALITA

[Blurb ed pahina 21]

“Say deen na Dios a palumbasan toy amin a kanonotan so manbantay ed saray puso tan nonot yo.”​—FILIPOS 4:7

[Kahon/Litrato ed pahina 20, 21]

Saray Makapaligsay Puson Bersikulo Nipaakar ed si Jehova

“Jehova, Dios a mapangasi tan [maaro], mapalna ya onsanok, tan daakan ed maaro ya abig na linawa, tan katuaan.”​—EXODO 34:6.

“Iimanoen a maong na Katawan so sankamundoan, pian naikdan to na pakayari iray totoon matoor ed sikato so kapusoan da.”​—2 AWARAN 16:9, MB.

“Say Katawan maasingger ed saray nanaekalay biskeg na linawa; ilalaban to ray sigpot a naandiay ilalo.”​—SALMO 34:18, MB.

“Sika, Katawan, maong ka tan [akaparaan] ka a mamerdona.”​—SALMO 86:5.

“[Si Jehova] maong ed amin a too tan mapangasi ed amin a pinalsa to.”​—SALMO 145:9, MB.

“Siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan [ta] ka.”​—ISAIAS 41:13.

“Narayew komon so . . . Ama na maaron panangasi tan say Dios na amin a ligliwa.”​—2 CORINTO 1:3.

“Napaseguroan tayoy kapusoan tayo ed arapan to anggano uukomen itayo na kapusoan tayo, lapud say Dios et babaleg nen say kapusoan tayo tan amta to so amin a bengatla.”​—1 JUAN 3:19, 20.

[Kahon/Saray litrato ed pahina 22]

Nalalabanan Da so Negatibon Liknaan

“Mainum na alak si amak, tan lapud sikato et grabe impanirap ko. Manlapu la nensaman, say pakaliknak et anggapoy kakanaan ko. Balet sanen walay Tasi nen Jehova ya angibangat ed siak na Biblia, naaralan ko so insipan na Dios a bilay ya agmangangga diad dalin. Tan saya so mamapaliket ed siak. Nagmaliw lan kabiangay bilay ko so panagbasay Biblia. Seseguroen kon walan walay Biblian nabasak sano negatibon maong so liknaan ko tan basaen ko ray bersikulon makapaligsay puso. Sano nababasak iray alay-abig a kualidad na Dios, napapaseguroan ak ya importante ak ed sikato.”​—Kátia, 33 años a bii. *

“Mainum ak na alak, adik ed marijuana tan cocaine, tan nansungap ak met na arum ni ran makapaadik. Asimot so amin a kayarian ko, kanian nagmaliw ak a mipapayabol. Balet sanen nanaral ak na Biblia ed saray Tasi nen Jehova, anguma-umay bilay ko. Inmapit ak ed Dios. Anggaman siansia nin lalabanan koy pakakakonsiensiak tan say liknaan ya anggapoy kanak, naaralan ko lay manilalo ed panangasi tan panangaro na Dios. Matalek ak a lawas ak ya ikdan na Dios na biskeg pian nalabanay negatibon liknaan ko. Say impakaamtak ed katuaan a walad Biblia so sankaabigan ya agawa’d bilay ko.”​—Renato, 37 años a laki.

“Nanlapu la nen ugaw ak, lanang kon ikokomparay sarilik ed si kuyak. Say pakaliknak et laos ak. Anggad natan et siansia nin anggapoy talek ko’d sarilik tan ed saray abilidad ko. Balet ta pursigido ak ya labanan iyan liknaan. Lanang ak ya manpipikasi’d Jehova, tan tutulongan to ak ya daegen irayan makapuy a liknaan. Napapabiskeg so liknaan ko ta amtak ya talagan inaro tan iyaansakit ak na Dios!”​—Roberta, 45 años a bii.

[Paimano ed leksab]