Aligen so Pananisia Ra

Sikatoy ‘Binmaleg a Manlilingkor ed si Jehova’

DIAD saman et ginmapo lay panaoy tiagew diad bansan Israel, manga Mayo odino Hunyo diad kalendaryo tayo natan. Panaon lay panagani trigo. Sankanengneng nen Samuel so kalupaan na saray kabaleyan to. Sayan matoor a laki et pigaran dekada lan manlilingkor bilang propeta tan ukom. Tan diad sayan pankanawnawa et impantitipon to ray totoo diad baley na Gilgal. Bigla ran dinmeen. Anto kasi ibaga nen Samuel pian nasabi puso ra?

Agnamomoria na saray totoo ya seryoso so ginawa ran kasalanan. Impilit day nawalaan na toon manari ed sikara. Agda amorian diad sayan ginawa ra et ipapanengneng da a talagan agda rerespetoen so Dios dan si Jehova tan say propeta to. Singa da papapawayen ya agda labay si Jehova bilang Ari da! Anto kasi gawaen nen Samuel pian magbabawi ira?

Nansalitan siansiay Samuel. “Masiken tan ubanan ak la,” so kuan to. Say amputi la ran buek to so angarum na puersa ed saray salita to. Insan to imbagan: ‘Nanakar ak ed arap yo a nanlapu ed inkaugaw ko anggad sayan agew.’ (1 Samuel 11:14, 15; 12:2) Anggano masiken lay Samuel, agto alingwanay impanugaw to. Malinlinew ni’d isip to iray agawgawa’d saraman a panaon. Tinmulong iray desisyon to nen ugaw ni pian diad interon bilay to et napansiansia toy pananisia tan debosyon ed Dios ton si Jehova.

Lawas ya pinabiskeg nen Samuel so pananisia to anggano saray totoo diad panaon to et andiay pananisia tan agmatoor. Diad panaon tayo, mairap met so nawalaay mabiskeg a pananisia ta manbibilay itayo ed mundon mauge-uges tan andiay pananisia. Nengnengen tayo pa sirin no antoy naaralan tayo’d alimbawa nen Samuel manlapud inkaugaw to.

‘Nanlingkor ed Jehova, Anggano Ugaw Ni’

Nikadkaduma so impanugaw nen Samuel. Sanen sikatoy apakso la, manga apat taon to odino onsulok ni, nanlingkor la diad sagradon tabernakulo nen Jehova ed Silo, a masulok a 30 kilometro so kaarawi to ed abung da diad Rama. Saray atateng ton si Elkana tan Hana so angipresenta’d sikato pian manlingkor ed si Jehova bilang Nazareo legay bilay to. * Labay kasin ibaga na saya a si Samuel et inabandona ra tan agda inaro?

Andi! Amta ran naasikasoy anak da diman ed Silo. Seguradon say Atagey a Saserdoten si Eli so akauley, ta kakkaiba toy Samuel ed panaglingkor. Tan wala met iray bibiin manlilingkor dima’d tabernakulo.​—Exodo 38:8.

Sakey ni, agbalot nilingwanan di Elkana tan Hana si Samuel. Diad tua, sayan inad-aro dan panguloan et ebat na Dios ed pikakasi nen Hana. Kinmerew si Hana ed Dios na sakey ya anak a laki tan insipan ton iter to so ugaw ya manlingkor ed Dios diad interon bilay to. Diad tinaon ya ibibisita di Hana ed Silo et iyaawitan toy Samuel na balon kawes ya nausar to’d panagserbi’d tabernakulo. Seguradon pabpablien nen Samuel iraman ya imbisita ra. Napapabiskeg so liknaan to lapud panamaseseg tan tulong na atateng to, tan diad pangipupurek da’d sikato ya baleg a pribilehyo so panlingkor ed si Jehova diad tabernakulo.

 Dakel so naaralan na atateng natan ed si Elkana tan Hana. Say maslak ya pampapagaan na atateng et no panon dan niiter so materyal ya pankaukolan na ananak da kanian napapaulyan da laingey espiritualidad da. Balet say iyuuna na atateng nen Samuel et say espiritualidad na pamilya, tan baleg so impluensya na satan ed no anton klase na too so nagmaliwan to.​—Uliran 22:6.

Imadyin yo pan diad ibabaleg nen Samuel et sikatoy ompapasyar ed saray kapalandeyan ya akapaliber ed Silo. Nayarin sankanengneng to iramay patar ya lugar diad kaliberliber, tan seguradon malikeliket sano nabantag to la imay tabernakulo nen Jehova. Sagradon lugar itan. * Nipaalagey itan diad impangidaulo nen Moises, tan nen panaon nen Samuel et ngalngali 400 a taon lan uusaren bilang sentro na tuan panagdayew ed si Jehova ed interon mundo.

Naad-aro nen Samuel so tabernakulo. Diad samay salaysay ya insulat to et oniay nabasa tayo: ‘Si Samuel et nanlingkor ed Jehova, anggano ugaw ni, ya akasulong na lienzo ya efod.’ (1 Samuel 2:18) Mapatnag ya satan a simplin kawes et pakabidbiran ya si Samuel et ontutulong ed saray saserdote ed tabernakulo. Anggaman agkabiangan si Samuel ed pamilya na saray saserdote, walaray niiter ed sikaton kimey. Nayarin sikato so mangilulukas ed puerta na sular na tabernakulo kada kabuasan tan mangaasisti ed maedad lan Eli. Nanliketan to irayan pribilehyo, balet ta sinmabi panaon et agonigon iyan it-inosentin ugaw. Walay mauge-uges a nagagawa diad abung nen Jehova.

Ag-arutakay Puso To

Makapaermen ta diad inkaugaw nen Samuel et atasian ton mismo so graben kaugsan. Walay duaran anak a laki nen Eli, si Hopni tan Finehas. Oniay nabasa ed salaysay nen Samuel: “Mauges iray lalakin anak nen Eli. Agda italtalek so Katawan.” (1 Samuel 2:12, Maung a Balita) Mankonektaan so duaran punto ed sayan bersikulo. Diad orihinal a Hebreon lenguahe, say salitan impatalos ed sayan bersikulo a “mauges” et sarag to met ya ipatalos a literal bilang “ananak na andi-kakanaan.” Tan duga met labat iyan deskripsion ed si Hopni tan Finehas ta anggapoy respeto ra’d si Jehova. Ibabaliwala da iray ganggan to. Tan lapud saya et akagawa ni ray arum a kasalanan.

Detalyado so Ganggan na Dios nipaakar ed saray kimey na saserdote tan no panon dan iyapay iray bagat diad tabernakulo. Manepeg labat itan, ta saraman ya bagat so paraan pian perdonaen na Dios iray kasalanan na totoo, diad ontan et moriaen to iran malinis tan makanepegan a mangawat na bendisyon tan tulong to. Balet ta agbalot nirespeto nen Hopni tan Finehas irayan bagat tan inimpluensyaan da ray kapara dan saserdote ya ontan met so gawaen da. *

Imadyin yo pa labat so ugaw tan inosentin si Samuel a naoobserbaan to irayan kaugsan diad tabernakulo, balet ta ag-iraya naaaksionan. Anto kasi nalilikna to sano nanenengneng to ray ordinaryo tan mairap a totoon oonla’d sagradon tabernakulo ya imbes a naligliwa tan napabiskeg komon ed espiritual et nadidismaya, nimemedmer, tan nalalames laingen? Tan anto met kasi alikna to sanen naamtaan ton sinumlang di Hopni tan Finehas iray ganggan nen Jehova nipaakar ed seksual a moralidad, ta akiakdol ira’d saray bibii a manlilingkor ed tabernakulo? (1 Samuel 2:22) Seguro labalabay nen Samuel ya aksionan la nen Eli iyan situasyon.

Si Eli so walad sankaabigan a posisyon pian solbaren iyan onloloor ya problema. Bilang atagey ya saserdote, responsabilidad to so antokaman a nagagawa’d tabernakulo. Tan bilang ama, obligasyon ton disiplinaen iray anak to. Amta ton  aliway pansumpalan na gagawaen da, tan aliwan sikara labat so apektado, noagta pati saray kabaleyan da. Balet ta agto agawaan irayan responsabilidad to bilang ama tan atagey a saserdote. Tua, pinampasnokan to met ira, balet ta angangga labat ed saman. (1 Samuel 2:23-25) Say kaukolan na ananak to et ambelat a disiplina. Say manepeg ingen a dusa na saray kasalanan da et patey!

Ontan lay inloor na situasyon kanian angibaki si Jehova na propeta ya agla abitlay ngaran to pian ipasabi’d si Eli so mensahe na panangukom. Oniay imbaga nen Jehova ed si Eli: ‘Igagalang mo ray anak mo nen say siak.’ Impasakbay na Dios ya diad saksakey ya agew et ompatey iray mauges ya anak nen Eli tan manirap a maong so pamilya to, ya naandi ni ingen ed sikara so pribilehyo na inkasaserdote. Wala kasi angumanan na pamilya nen Eli lapud sayan pasakbay? Anggapoy nabasa’d Biblia ya ontan so agawa.​—1 Samuel 2:27–3:1.

Anto kasi epekto na sarayan kaugsan ed ugaw nin si Samuel? Anggan diad saraman a mauges a situasyon et walay nabasa tayon marakep ya impormasyon nipaakar ed ibabaleg tan iyaaligwas nen Samuel. Nabasa tayo’d 1 Samuel 2:18 ya sikatoy matoor a ‘nanlingkor ed Jehova, anggano ugaw ni.’ Kanian anggano uga-ugaw ni Samuel et inyuna to la’d bilay to so panaglingkor ed Dios. Diad bersikulo 21 na satan met lanlamang a kapitulo et oniay makapaliket nin nabasa tayo: “Binmaleg a manlilingkor ed Katawan si ugaw a Samuel.” (MB) Diad ibabaleg nen Samuel et lalon apaapit ed Ama to ed tawen. On, say maapit a relasyon ed si Jehova so sankaseguradoan a proteksion ed antokaman a kaugsan.

Sarag met komon ya irason nen Samuel ya no say atagey a saserdote tan ananak to et manggagaway kasalanan, ompan sarag to met a gawaen so antokaman a labayen to. Balet tandaan tayon say kaugsan na arum, anggan saramay walad atagey a posisyon, et agtayo sarag ya ibaraan pian manggawa tayo met lay mauges. Diad panaon tayo, dakel a Kristianon kalangweran so mangaalig ed alimbawa nen Samuel tan ‘binmaleg iran manlilingkor ed Jehova,’ anggano makapuy so gagawaen na totoo’d kaliberliber da.

Antoy resulta na impanmatoor nen Samuel? Oniay nabasa tayo: “Binmaleg si ugaw a Samuel, tan binmaleg met so panangaroy Katawan tan saray totoo ed sikato.” (1 Samuel 2:26, MB) Kanian nanengneng tayo dia a si Samuel et inad-aro na saramay parad sikato et importante so opinyon da. Si Jehova a mismo et mamapabli ed sayan ugaw lapud katooran to. Tan seguradon amta nen Samuel ya walan-walay gawaen na Dios to pian manampot lay kaugsan diad Silo. Balet ta ompan inisip to no kapigan kasi.

“Mansalita Ka, Ta say Aripen Mo Ondengel”

Aminsan et naebatan met lanlamang itan a tepet to. Palbangon la’d saman, balet ta ambilunget ni. Makuykuyep la imay apuy na baleg a lamparaan na tabernakulo. Marendeen so kaliberliber. Kabekta et walay nadngel nen Samuel a boses ya manatawag ed sikato. Say abaloan to et si Eli, a masikesiken la’d saman tan ngalngali la bulag. Binmangon si Samuel tan “binmatik” ed si Eli. Naiimadyin yo ta si Samuel ya akasalisalin ombabatik pian amtaen no antoy kaukolan nen Eli? Makapadinayew ta siansian marespeto tan maabig so panagtrato nen Samuel ed si Eli. Anggano walaray kasalanan to, sikato nin siansiay atagey a saserdote nen Jehova.​—1 Samuel 3:2-5.

Binangon nen Samuel si Eli, a kuan ton: “Wadia ak, tinawag mo ak.” Imbaga balet nen Eli ya agto tinawag, tan pinapawil to’d dukolan so ugaw. Amidua nin onia so agawa! Amorian siansia nen Eli no antoy nagagawa. Lapud kaugsan ya nagagawa’d Silo et matalag lan mangipasabi si Jehova na pasingawey odino pasakbay ed saray totoo to. Balet ta amta nen Eli ya diad sayan pankanawnawa et walay labay ya ibaga nen Jehova​—panamegley na sayan ugaw! Ingganggan nen Eli si Samuel ya ompawil ed dukolan to tan imbangat to no antoy iyebat to sano narengel to lamet imay boses. Tinmulok si Samuel. Ag-abayag et nadngel to lamet imay boses: “Samuel, Samuel”! Inmebat so ugaw: “Mansalita ka, ta say aripen mo ondengel.”​—1 Samuel 3:1, 5-10.

Walan siansiay lingkor nen Jehova ed Silo ya ondedengel ed sikato. Dinengel tan tinulok nen Samuel si Jehova legay bilay to. Kasin ontan ka met? Agtayo la aalagaren ya narengel tayo ni boses  na Dios. Natan et nibagan mitotongtong so Dios ed sikatayo panamegley na kompleton Salita to, say Biblia. No lanang tayon dedengelen tan uunoren so Dios, ditan met lalon ombiskeg so pananisia tayo. Apaneknekan itan a mismo nen Samuel.

Agnalinglingwanan iman ya agawa diad bilay nen Samuel, ta diad saman ginmapo so espisyal a relasyon to ed si Jehova, a sikatoy nagmaliw ya propeta tan pinagkasangiyan na Dios. Nen unaan et natatakot so ugaw ya ipasabi’d si Eli so mensahe nen Jehova, ta pinekderan nen Jehova ya asingger lan nagawa imay panangukom ed pamilya nen Eli. Balet ta nampakpel si Samuel pian nipasabi to itan ed si Eli​—tan mapaabeban inawat nen Eli so panangukom na Dios. Ag-abayag et tinmuan amin so imbaga nen Jehova. Sanen aki-guerra iray Israelita ed saray Filisteo, inatey ira di Hopni tan Finehas diad saksakey ya agew. Tan anggan si Eli et inatey met sanen naamtaan ton inala na saray Filisteo so sagradon Kaban nen Jehova.​—1 Samuel 3:10-18; 4:1-18.

No nipaakar balet ed si Samuel, akabatan na interon Israel a sikatoy matoor ya propeta na Dios. “Si Jehova wala ed sikato,” so kuan na salaysay, kanian amin ya propesiya nen Samuel et tinmua.​—1 Samuel 3:19.

“Si Samuel Tinmawag ed Jehova”

Balet, labay kasin ibaga na saya a nampasakop iray Israelita ed panangidaulo nen Samuel, tan nanmatoor ira’d Dios? Andi. Asabi panaon et nandesisyon iran mas ni nen say sakey a propeta so labay dan mangidaulo’d sikara. Labay day onalig ed arum a bansa, a walay toon manari ed sikara. Imbaga nen Jehova ya unoren nen Samuel iyan kerew da. Balet ta kaukolan ton ipamoria’d sikara a grabe iyan kasalanan. Aliwan too so impulisay da, noagta mismon si Jehova! Kanian impantitipon ira nen Samuel ed Gilgal.

Pawilen tayo pa imay agawa sanen kinatongtong nen Samuel iray Israelita diad Gilgal.  Impanonot nen masiken lan Samuel ed saray Israelita so abayag lan matoor a panlilingkor to. Insan oniay nabasa tayo: “Si Samuel tinmawag ed Jehova.” Sikatoy nampikasi a mangibaki bagyo si Jehova.​—1 Samuel 12:17, 18.

Bagyo? Diad panaoy tiagew? Anggapo nin balot so agawan ontan! Ompan walaray Israelitan manduaruwa, odino abaloan da et manlulurey labat si Samuel. Balet ta ag-abayag et binmilunget so tawen. Makmaksil so dagem, kanian dinmedepes iray trigo ed kaalogan. Mantutumbokan la ray karol. Tan pinmelag so uran. Antoy reaksion na totoo? “Tinmakot [ira] na balbaleg ed Jehova tan si Samuel.” Amoria dan siansia a grabe so ginawa ran kasalanan.​—1 Samuel 12:18, 19.

Aliwan si Samuel so amakiwas ed sikaran pagbabawiay inkarebelyoso ra, noag say Dios ton si Jehova. Manlapud inkaugaw ya anggad intatken nen Samuel et lawas mabiskeg so pananisia to’d Dios to. Kanian sikatoy benendisyonan nen Jehova. Agbalot manguuman si Jehova. Siansia nin tutulongan to iramay mangaalig ed pananisia nen Samuel.

[Saray paimano ed leksab]

[Litrato ed pahina 17]

Anggano natatakot si Samuel, nampakpel pian nipasabi to’d Eli so mensahe na pangukom nen Jehova

[Litrato ed pahina 18]

Nampikasi si Samuel tekep na pananisia, tan inmebat si Jehova panamegley na bagyo