Paibangat ed Salita na Dios

Akin et Paibangat Tayo’d Dios?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Sarayan ebat et maliket ya ipaliwawa ed sika na saray Tasi nen Jehova.

1. Akin et paibangat tayo’d Dios?

Walay maong a balita a labay ya ipaamta na Dios ed totoo. Ipapaamta to itan panamegley na Biblia. Say Biblia et aliling toy sulat a nanlapud maaron Ama tayon walad tawen.​—Basaen so Jeremias 29:11.

2. Anto itay maong a balita?

Kaukolan na totoo so maong a gobierno. Anggapo nin balot so toon nanuley ya akaekal ed kaugsan, kairapan, sakit, tan ipapatey. Balet nia ay so maong a balita​—ikdan na Dios iray totoo na maong a gobierno a mangekal ed amin a sengegay kairapan.​—Basaen so Daniel 2:44.

3. Akin et importante ya paibangat tayo’d Dios?

Asingger lan ekalen na Dios ed mundo iray totoon pansesengegay kairapan. Antis to ‘tan balet, ibabangat to ray minilyon a matunong a totoo parad pankaabigan da, tan pian nipanengneng day panangaro’d Dios tan ed kapara dan too. Diad Salita na Dios et nanaaralan na totoo no panon dan nasarag iray problema, no panon iran magmaliw a maliket, tan no panon dan napaliket so Dios.​—Basaen so Sofonias 2:3.

 4. Siopa so Autor na Biblia?

Say Biblia et walaan na 66 ya angkekelag a libro. Manga 40 ya lalaki so angisulat ed satan. Say unonan limaran libro et insulat nen Moises manga 3,500 a taon lay apalabas. Samay sampot ya libro et insulat nen apostol Juan masulok a 1,900 a taon lay apalabas. Balet, say insulat na sarayan lalaki et aliwan say walad kanonotan da, noagta no antoy impaisulat na Dios ed sikara. Kanian say Dios so Autor na Biblia.​—Basaen so 2 Timoteo 3:16; 2 Pedro 1:21.

Amta tayon say Biblia et nanlapud Dios ta tinmua iray impasakbay na satan a nagawa’d arapen, anggan saray angkekelag a detalye. Ag-itan nagawaan na too. (Isaias 46:9, 10) Sakey ni, ipapaamta na Biblia so maaron personalidad na Dios. Walay pakayari na Biblia ya umanen so kabibilay na totoo parad pakagunggonaan da met lanlamang. Saraya so rason no akin ya minilyon so akombinse ya say Biblia et Salitay Dios.​—Basaen so Josue 23:14; 1 Tesalonica 2:13.

5. Panon mon natalosan so Biblia?

Kabkabat si Jesus bilang managbangat na Salitay Dios. Tua, dakel ed saray totoon binangatan to et kabisado da met so Kasulatan, balet ta kaukolan day tulong pian natalosan itan. Pian natulongan ira nen Jesus, aminpigapiga ton tinukoy iray nanduruman parte na Kasulatan tan impaliwawa toy “kabaliksan” na saratan. Usaren met na sayan artikulo ya “Paibangat ed Salita na Dios” so ontan ya paraan pian natulongan kan talosan so Biblia.​—Basaen so Lucas 24:27, 45.

Talagan makapaliket so paibangat ed Dios nipaakar ed gagala na bilay. Balet ompan walaray totoon agmalabay a manaral kay Biblia. Agka padidismaya. Say pakawalaan mo na agmanganggan bilay ed arapen et akadepende ed pakapikabat mo’d Dios.​—Basaen so Mateo 5:10-12; Juan 17:3.

Parad kaaruman nin impormasyon, nengnengen so kapitulo 2 na sayan libro Anto so Peteg ya Ibabangat na Biblia? ya im-publish na saray Tasi nen Jehova.