Onapit ed Dios

“Inanap To si Jehova a Dios To”

“ANGGAPO lay kanak,” so inkuan na sakey a laki ya angikaindan ed makadios ya impamabaleg ed sikato. Sanen manpasimbalo la, natatakot ta ompan agla naperdona na Dios. Balet ta sayan magbabawin nankasalanan so awalaan na ilalo ed salaysay na Biblia ya agawa’d si Manases, a nabasa ed 2 Awaran 33:1-17. No naliliknam ya anggapoy kanam lapud agawaan mon kasalanan diad apalabas, nainawaan met so liknaan mo ed agawa’d si Manases.

Binmaleg si Manases ed makadios a pamilya. Say ama ton si Ezekias et sakey ed saray sankamaongan ya ari ed Juda. Inyanak si Manases manga taloy taon kayarin sinuldongan ni na Dios so bilay nen ama to. (2 Arari 20:1-11) Seguradon impasen nen Ezekias iyan anak to a regalo a resulta na panangasi na Dios, tan impurek ed sikato so panamabli ed malinis a panagdayew. Balet aliwan amin ya ananak na makadios ya atateng et mangalig ed sikara. Ontan so agawa ed si Manases.

Si Manases et 12 años ni labat sanen inatey so ama to. Makapaermen ta “ginawa to so mauges dia ed pakanengneng nen Jehova.” (Bersikulo 1, 2) Kasin sayan ugaw nin ari et naimpluensyaan na saray managsimbawan manleleglemew ed tuan panagdayew? Anggapoy nabasa’d Biblia. Say nabasa tayo et nanggaway Manases na graben panagdayew ed idolo tan inkaruksa. Sikatoy angipaalagey na saray altar parad palson dirios, insakripisyo to ray anak to, nanggaway espiritismo, tan angiyan na inukit ya idolo ed templo nen Jehova diad Jerusalem. Bangar si Manases lapud agto dinengel so aminpigan pasakbay manlapud si Jehova, anta no aliwan lapud milagro na Dios et sikatoy agnianak.​—Bersikulo 3-10.

Inabuloyan nen Jehova a si Manases et naawit ed Babilonia ya akagolonggolong, tan legan ya akapriso diman, anonotan to ray ginawgawa to. Kasin aliwawaan lay nonot to a sikatoy ag-aprotektaan na saray andiay-pakayari tan andiay-bilay ya idolo to? Kasin ninonot to ray imbabangat ed sikato na matakot ed Dios ya ama to? Antokaman so agawa, nampasimbalo si Manases. Ibabaga na Biblia: “Inanap to si Jehova a Dios to, tan nampaabeba na balbaleg . . . Et nampikasi ed sikato.” * (Bersikulo 12, 13) Balet talaga kasin perdonaen na Dios so toon akagawa na ontan iran graben kasalanan?

Atenyeg so liknaan nen Jehova ed masimoon ya impagbabawi nen Manases. Dinengel na Dios iray kerew to parad panangasi “tan inyakar [na Dios] lamet ed Jerusalem ed nanarian to.” (Bersikulo 13) Pian nipanengneng ton magbabawi, ginawa nen Manases so anggaay nayarian to ya ipetek iray lingo to, inekal toy idolatriya ed sakop to tan pinakiwas to ray totoo “a manlingkor ed Jehova.”​—Bersikulo 15-17.

No liknaen mon agka manepeg ed panamerdona na Dios lapud apalabas iran kasalanan, napabiskeg komon so liknaan mo ed alimbawa nen Manases. Sayan salaysay et kabiangan na impuyan a Salitay Dios. (Roma 15:4) Malinew ya labay nen Jehova ya naamtaan tayon sikatoy ‘akaparaan a mamerdona.’ (Salmo 86:5) Aliwan say kasalanan so nenengnengen to, noagta say walad puso na akagaway kasalanan. No sikatoy manpikasi tekep na magbabawin puso, taynan to lay datin mauges ya kagagawa, tan panseetan ton gawaen so duga, nayarin napakalma to so lupa nen Jehova, a singa ginawa nen Manases.​—Isaias 1:18; 55:6, 7.

Suhestion a Basaen ed Biblia Legay Enero:

▪ 2 Awaran 29-36–Esdras 1-10

[Paimano ed leksab]