Kasin Amta La na Dios ya Mankasalanan si Adan tan Eva?

DAKEL so talagan malabay ya mangamta ed ebat na sayan tepet. No say pantotongtongan et no akin ya inyabuloy na Dios so kaugsan, say tampol ya laen na tongtongan et samay kasalanan di Adan tan Eva. Isipen na arum ya no amta na Dios so amin a bengatla, nayarin diad gapo ni labat sirin et amta to la ya mankasalanan ira.

No talagan amta la na Dios ya mankasalanan iyan perpekton sanasawa, ompapaway ya dakel so makapuy ya ugali to, ya sikatoy agmaaro, agmakatunongan, tan agmatua. Ibabaga met na arum ya anggapoy panangasi to, ta inyan toy inmunan sanasawa ed situasyon ya amta ton manresulta met lanlamang ed mauges. No ontan sirin, say Dios kuno so sakey ed saray natetel​—odino sikaton mismo so nepeg a tetelen ed amin ya kaugsan tan kairapan. Parad arum et singa lolokoen labat ingen na Amalsa so sarili to.

Kasin ontan ya talaga so deskripsion na Biblia ed Dios a Jehova? Pian naebatan itan, usisaen tayoy ibabaga na Biblia nipaakar ed saray palsa tan personalidad nen Jehova.

“Maong Iran Tuloy”

Oniay rekord na Genesis nipaakar ed saray palsa na Dios, kaiba lay inmunan totoo: “Say Dios anengneng to so amin a bengatla a ginawa to, et nia maong iran tuloy.” (Genesis 1:31) Perpekto so inkagawa di Adan tan Eva, ya dugaruga ed inter na Dios ya panayaman da. Anggapoy depekto ed inkapalsa ra. Lapud satan, sarasarag dan gawaen iray iilaloan na Dios ed sikara. Pinalsa ira unong ed “indengan na Dios.” (Genesis 1:27) Kanian sarag da met ya aligen so karunongan, aro, hustisya, tan kamaongan nen Jehova. Say pangalig da ed saratan et ontulong pian maong so resulta na saray desisyon da tan napaliket day Ama ra ed tawen.

Inyabuloy na Dios ya sarayan perpekto tan intelihentin palsa to et makapanggawa na sarili dan desisyon. Agto ra pinalsan singa robot, ya agto insipor ed isip da ya sikatoy nepeg dan unoren. Isipen pa, agta mas naapresyam so regalo no samay angiter et inter to itan lapud inaro to ka nen say regalon inter labat ya anggapoy wala? Ontan so situasyon di Adan tan Eva. Mas naapresya na Dios no say pangunor da ed sikato et nanlapud puso. Lapud naabuloyan iran manggawa na sarili dan desisyon, sarag dan pilien so pangunor ed si Jehova lapud panangaro ra’d sikato.​—Deuteronomio 30:19, 20.

Matunong tan Maong

Nabasa tayo’d Biblia so personalidad nen Jehova. Nanengneng tayo’d personalidad to ya talagan imposiblin itetel ed sikato so kasalanan di Adan tan Eva. Ibabaga na Salmo 33:5 ya ‘inaro nen Jehova so katunongan.’ Onia sirin so ipapaimano na Santiago 1:13: “Agnayarin suboken so Dios tan agto suboken so siopaman ed panamegley na mauges iran bengatla.” Lapud mahustisya so Dios tan iyaansakit toy Adan, pinasakbayan ton: “Nayarian mo so mangan na labay mo ed amin a kiew na tanamanan. Ingen ta say kiew na pakaamtaan mo na maong tan mauges, agmo nepeg a panganan; ta dia ed agew a pangan mo ed satan ompatey ka.” (Genesis 2:16, 17) Say pampilian na inmunan sanasawa et say agmanganggan bilay odino say patey. Agta ompaway ya lolokoen ira labat na Dios no pasakbayan to ra balet ta amta to la manayan mauges so pansumpalan da?  ‘Inaro nen Jehova so katunongan’ kanian agto ra opresian na bengatlan agmet lanlamang niwala’d sikara.

Sakey ni, si Jehova et maomaong ya Dios. (Salmo 31:19) Oniay imbaga nen Jesus sanen dedeskribien toy kamaongan na Dios: “Siopan too ed limog yo a no onkekerew na tinapay so anak to et ikdan toy bato? Odino, no sikatoy onkekerew na sira et ikdan toy uleg? Sirin, no sikayo et amta yoy mangiter na maong iran regalo ed saray anak yo anggano mauges kayo, say Ama yon walad tawen et mas lalon mangiter na maong iran bengatla ed saramay onkekerew ed sikato!” (Mateo 7:9-11) Iikdan na Dios iray pinalsa to na “maong iran bengatla.” Say inkapalsa na too tan say Paraiso ya imparaan ton panayaman da et ebidensya na kamaongan na Dios. Ontan la kasi inkaawet na pusoy Dios ya ikdan toy balibalin ayaman si Adan tan Eva anta amta ton pataynanen to met lanlamang ira? Say Dios et maomaong kanian agto itan nitepel ya gawaen. On, say impanrebelde na too et agnepeg ya itetel ed matunong tan maong ya Amalsa ed sikatayo.

“Sikato Labat so Marunong”

Ibabaga na Biblia ya “[si Jehova] labat so marunong.” (Roma 16:27) Atasian na saray anghel ed tawen so dakel ya ebidensya ya anggapoy limitasyon na karunongan na Dios. “Inmeyag ira lapu ed liket” sanen pinalsa nen Jehova so mundo tan amin a wadtan. (Job 38:4-7) Seguradon sinubaybayan na sarayan intelihentin espiritun pinalsa iray agawa’d hardin na Eden. Makatunongan kasi ya kayarin palsaen na marunong a Dios so makapadinayew ya uniberso tan say marakdakep a mundo et manggaway duaran nikadkaduman pinalsa ya amta ton manrebelde ed sikato, anta mamatbantay iray ananak ton anghel? Lapud marunong so Dios, agto manggaway plano ya amta ton mansumpal met lanlamang ed baleg ya problema.

Balet, ompan walaray mangibagan, ‘No marundunong so Dios, akin et agto amta ya mankasalanan si Adan tan Eva?’ Tua, lapud karunongan nen Jehova et walay abilidad ton amtaen ‘manlapu la’d gapo so pansumpalan’ na saray bengatla. (Isaias 46:9, 10, Maung a Balita) Balet, agto ikakanan lanang iyan abilidad to, no panon ya agto met iyuupot ya lanang so pakayari to. Pipilien nen Jehova no kapigan so pangikana to’d abilidad to ya amtaen so nagawa ed arapen. Uusaren to labat itan no duga tan manepeg ed situasyon.

Pian mas natalosan tayo iya, iyalimbawa tayo ed pambantay na nirekord ya sports game. Sarag pa na sakey ya unaen lan bantayan so bandad sampot pian naamtaan to lay pansumpalan na galaw. Balet, gawaen to labat itan no labay to. Ingen ta agmo met nakuestion no mas labay ton bantayan imay interon galaw ya manlapud gapo. Ontan met ed Dios. Mapatnag ya mas nilabay ton ag-amtaen no antoy pansumpalan di Adan tan Eva. Imbes, inabuloyan ton onlabas so panaon pian nanengneng no kasin saray anak to diad mundo et mansiansian matulok ed sikato.

Singa nibaga la, lapud dunong nen Jehova et agto pinalsa so inmunan sanasawa ya singa robot ya unor-unor labat ed sikato. Imbes, inabuloyan to ran manggawa na sarili dan desisyon. No duga iray desisyon da, nipanengneng dan aaroen, pisasalamatan, tan uunoren day Jehova, say Ama ra ed tawen, diad ontan et sikatoy napaliket da tan sikaran mismo et nagunggonaan ed satan.​—Uliran 27:11; Isaias 48:18.

Diad Biblia et dakel iray pankanawnawan ag-inusar na Dios so abilidad ton amtaen so nagawa’d arapen. Alimbawa, sanen say matulok a si Abraham et kuanto lan ibagat so anak to, oniay nibaga nen Jehova: “Natan amtak la a sika et tatakotan mo so Dios, ta sika et agmo inkibot ed siak so anak mo, say bogbogtong ya anak  mo.” (Genesis 22:12) Wala met iramay panaon ya say Dios et ‘sinmanok’ tan asakitan lapud makapuy ya ginawa na pigaran totoo. Nasakitan ni kasi no abayag to lan amta no anto so gawaen da?​—Salmo 78:40, 41; 1 Arari 11:9, 10.

Kanian, nibaga tayo sirin ya ag-inusar na Dios iyan abilidad to pian amtaen manlapu la’d gapo no kasin mankasalanan iray inmunan atateng tayo. Say Dios et marundunong, kanian agto mamalsay too pian labat paiyakto ed sikara iray bengatlan amta ton mansumpal ed makapuy.

“Say Dios et Aro”

Say kalaban na Dios, si Satanas, so angigapo ed rebelyon diad Eden. Talagan mauges so resulta to itan, kaiba lay kasalanan tan patey. Nibaga sirin ya si Satanas et “managpatey.” Tan apaneknekan a sikatoy “matila tan ama na tila.” (Juan 8:44) Papapawayen ton mauges so motibo na maaron Dios, anta sikaton mismo balet so walaan na mauges ya motibo. Labay ton itetel ed si Jehova so impankasalanan na too.

Say aro so manunan rason no akin ya agpinili nen Jehova ya amtaen no kasin mankasalanan si Adan tan Eva. Diad personalidad na Dios, say sankapatnagan et say aro. “Say Dios et aro,” so kuan na 1 Juan 4:8. Lapud aro, say nenengnengen na Dios et say kamaongan tayo. On, inaro na Dios si Adan tan Eva kanian labay ton maabig komon so pansumpalan da.

Anggaman posible ya makapandesisyon na makapuy si Adan tan Eva, agnansuspetsa so Dios ya ontan so gawaen da. Inter toy amin a nakaukolan da tan impaamta to’d sikara so amin a nepeg dan naamtaan. Kanian duga labat ya ilaloan ton sikatoy unoren da, ya ag-ira manrebelde. Amta na Dios ya sarag nen Adan tan Eva so manmatoor. Diad inlabas na panaon, anggan saray agperpekton totoo et asarag da itan, a singa di Abraham, Job, Daniel, tan arum ni.

“Diad Dios et posible so amin a bengatla.” (Mateo 19:26) Satan ya imbaga nen Jesus et makapabiskeg na liknaan. Say aro nen Jehova, ontan met ed hustisya, karunongan, tan pakayari to, so mangagarantiya a sarag ton ekalen so amin ya epekto na kasalanan tan patey, tan talagan gawaen to itan!​—Apocalipsis 21:3-5.

Malinew sirin ya ag-amta nen Jehova ya mankasalanan so inmunan sanasawa. Anggaman asakisakitan so Dios ed impanrebelde na too tan ed irap ya resulta na satan, amta ton temporaryo labat itan, tan aliwa itan a rason pian agto la ituloy so gagala to parad mundo tan parad totoo. Maabig no amtaen mo ni so nipaakar ed satan tan no panon kan minabang sano nagawa la itan. *

[Paimano ed leksab]

[Blurb ed pahina 14]

Agpinalsa nen Jehova so inmunan sanasawa ya singa robot ya unor-unor labat ed sikato

[Blurb ed pahina 15]

Amta na Dios ya sarag nen Adan tan Eva so manmatoor