Kasin Talagan Iyaansakit Ka na Dios?

NALILIKNAM ta a walay mangaaro’d sika? O kasin no maminsan et iisipen mon agka iyaansakit na arum? Natan et busy tan makasarili iray totoo, kanian agmo naiwasay manisip ya aliwa kan importante. Tua imay ibabaga na Biblia a diad sayan panaon tayo, say aaroen labat na dakel a totoo et say sarili da kanian anggapoy panangiyansakit da ed arum.​—2 Timoteo 3:1, 2.

Nisipor ed totoo so pilalek a naaro tan aroen so arum, antokaman ni edad, kultura, lenguahe, odino bansa tayo. Unong ed saray reperensya, say nervous system tayo et adesinyon makaliknay aro. Say talagan makatalos sirin ed sayan pankaukolan tayo parad aro tan panangapresya et say Amalsa ed sikatayo, say Dios a Jehova. Antoy naliknam no ipaseguro to’d sika ya inad-aro to ka? Seguradon satan la so sankaabigan ya panamaseguron naawat mo. Talaga kasin parad si Jehova et importante iray agperpekton totoo? Kasin iyaansakit to so balang sakey ed sikatayo? No ontan sirin, antoray nepeg a gawaen na sakey pian sikatoy pabpablien tan ad-aroen to?

Talagan Mangiyaansakit si Jehova

Manga 3,000 a taon lay apalabas, walay matakot ed Dios a salmista (manag-compose na salmo o kansion parad Dios) a nandinayew a maong ed karakpan na mabitewen a tawen. Amta ton anggapo lay makapipara ed Amalsa na sarayan agnabilang a bitewen. Naisip ton si Jehova so Sankatagyan tan abebbeba so too, kanian pankelawan to akin et ontan lay panangiyansakit nen Jehova. Inkuan ton: “No nengnengen koy tawen a pinalsam, say bulan tan saray bitewen ya inliram ira’d pasen da​—siopa so too, et nononoten mo; say mogmon too, et aasikasoen mo?” (Salmo 8:3, 4, Maung a Balita) Ompan isipen tayon say Sankatagyan et arawi’d sikatayo o masyadon dakel so gagawaen to kanian agto itayo naiimano. Amta balet na salmista ya anggano abebbeba so too tan antikey so bilay tayo, importante itayo ed Dios.

Oniay impaseguro na sakey nin salmista: “Pakaliliketan [nen Jehova] iray mangigagalang ed sikato, saray manmamatalek ed agmanguman a panangaro to.” (Salmo 147:11, MB) Makapabiskeg na liknaan irayan salmo. Anggaman si Jehova so Sankatagyan,  agto labat basta sankanonot iray totoo. Imbes, “aasikasoen” to ra tan ‘naliliketan’ ed sikara.

Lalon apaneknekan iya diad sakey a propesiya’d Biblia a manideskribe ed saray nagawa’d sayan panaon. Panamegley na propetan si Aggeo, impasakbay nen Jehova ya say maong a balita na Panarian na Dios et nipulong ed interon mundo. Antoy resulta? Nia so sakey: “Saray mabli a bengatla na saray amin a nasyon onsabi ra naani; et panoen ko naani so sayan abung ed gayaga.”​—Aggeo 2:7.

Anto irayay “mabli a bengatla” a natipon manlapud amin a nasyon? Seguradon aliwa irayan materyal a kayamanan. (Aggeo 2:8) Aliwan say pilak tan balitok so mamapaliket ed puso nen Jehova. Say panliliketan to et saray totoo, ya anggano agperpekto et mandadayew ed sikato lapud aro. (Uliran 27:11) Sarayan totoo sirin imay “mabli a bengatla” a mangiiter na gayaga ed Dios, tan papablien toy debosyon tan makulin panaglingkor da. Kasin sakey ka ed sarayan totoo?

Ompan singa mairap a panisiaan ya papablien na Amalsa na uniberso iray agperpekton totoo. Balet ta satan so katuaan. Tan satan so mamakiwas ed sikatayon awaten so imbitasyon ton onapit ed sikato.​—Isaias 55:6; Santiago 4:8.

“Inad-aro a Maong”

Sanen masiken lay propetan si Daniel, sakey a labi et sikatoy asurprisa. Legan ton manpipikasi, biglan sinmabi so sakey a kagalgalang a bisita. Say ngaran to et Gabriel. Abidbir nen Daniel ya sikatoy anghel nen Jehova ta antis to ni iya et akatongtong la nen Gabriel si Daniel. Oniay imbaga nen Gabriel ya rason na biglan imbisita to: “O Daniel, . . . ikdan ta ka na kakabatan tan pakatalos . . . ta sika so balbaleg ya inad-aro.”​—Daniel 9:21-23.

Diad sananey ya inkagawa, oniay imbaga na sakey ya anghel nen Jehova ed si Daniel: “O Daniel, sika [so] too ya inad-aro a maong.” Insan pian pabiskegen so liknaan nen Daniel et inkuan na anghel: “O too ya inad-aro a maong, agka [ontatakot]; wala komon ed sika so deen.” (Daniel 10:11, 19) Amitlon deneskribe si Daniel bilang “inad-aro.” Samay orihinal ya Hebreon termino a nipatalos ya “inad-aro” et nayari met ya say labay ton ibaga et “papablien ya maong” odino “paborito.”

Seguradon maapit la so relasyon nen Daniel ed si Jehova tan amta ton naliliketan so Dios ed matoor ya panlilingkor to. Balet, lalon binmiskeg so liknaan to ta panamegley na saray anghel et apaseguroan ya sikatoy inad-aro na Dios. Kampegan onia so inyebat nen Daniel ed samay anghel: “Pinabiskeg mo ak.”​—Daniel 10:19.

Sayan makapaligsay puson salaysay nipaakar ed panangaro nen Jehova ed matoor ya propeta to et nirekord ed Salita na Dios  pian pakaaralan tayo. (Roma 15:4) Maabig no usisaen tayoy alimbawa nen Daniel pian naamtaan tayo no antoray nepeg ya gawaen pian pabpablien tan ad-aroen itayo na Ama tayo ed tawen.

Lanang ya Aralen so Salitay Dios

Makulin inaral nen Daniel so Kasulatan. Ontan so nibaga tayo ta oniay mismon insulat to: “Inaral ko ray masanton libro . . . nipaakar ed pitomploy taon a kaderal na Jerusalem.” (Daniel 9:2, MB) Diad saman a panaon, saray libron walad si Daniel et nayarin saray pinuyanan a sulat nen Moises, David, Solomon, Isaias, Jeremias, Ezequiel, tan arum ni ran propeta. Imadyin mo pay Daniel ya walad arapan to so dakel ya lukot, ya iyuulo toy pamabasa to tan pankokomparaen to ray propesiya nipaakar ed kipawil na tuan panagdayew ed Jerusalem. Nayarin diad kuarto ed tagey na abung to so panaaralan to pian agnadisturbo, diad ontan et nadalepdep ton maong so labay ya ibaga na saratan ya propesiya. Lapud panagaral to, binmiskeg so pananisia to tan inmapit ed si Jehova.

Say impanaral nen Daniel ed Salitay Dios et akaimpluensya met ed personalidad tan ed interon bilay to. Seguradon baleg so nitulong na saray naaralan to ed Kasulatan sanen sikatoy kalangweran ni pian determinado ton unoren so Ganggan na Dios ed saman ya panaon nipaakar ed saray nepeg tan agnepeg ya kanen. (Daniel 1:8) Asabi panaon et makpel ton impakabat so mensahe na Dios ed saray manuley na Babilonia. (Uliran 29:25; Daniel 4:19-25; 5:22-28) Sikatoy kabkabat ya makuli, matua, tan napanmatalkan. (Daniel 6:4) Tan manuna ed amin, baleg so talek nen Daniel ed si Jehova kanian nansiansian matoor anggan ipatey to ni. (Uliran 3:5, 6; Daniel 6:23) Kampegan sikatoy “inad-aro a maong” na Dios!

Mainomay la natan so panaral ed Biblia no ikompara’d panaon nen Daniel. Libro la so uusaren tayo, aliwa lan saray angkabaleg ya lukot. Kompleto la so Biblia, tan nabasa met la ditan so rekord no panon a tinmua so pigaran propesiya nen Daniel. Tan dakel met lay nausar tayon libro ya ontulong ed panaral tan pan-research. * Uusaren mo kasi iratan? Wala kasi regular ya eskedyul mo parad panagbasay Biblia tan panagdalepdep ed abasam? No ontan so gawaen mo, say epekto to’d sika et singa met ed si Daniel. Onelet so pananisiam tan lalo kan onapit ed si Jehova. Legan kan paigigiya ed Salita to, ditan mo napaneknekan ya iyaansakit to ka.

Mantultuloy a Manpikasi

Mapikasin too si Daniel. Saray pikakasi to et unong ed linawa na Dios. Sanen kalangweran ni, sikatoy posiblin napapatey no agto nipatalos so kugip na ari na Babilonia a si Nabucodonosor. Tampol ya akikasi si Daniel ed si Jehova parad tulong tan proteksion. (Daniel 2:17, 18) Kayari pigaran taon, mapaabeban impatua nen Daniel ed si Jehova so kasalanan to tan say kasalanan na saray kabaleyan to, tan kinmerew na perdona. (Daniel 9:3-6, 20) Sano agto natatalosan iray impuyan na Dios ed sikato, kekerewen toy tulong na Dios. Aminsan, oniay imbaga na samay anghel ya imbaki nen Jehova pian ikdan na pakatalos si Daniel: “Dinengel na Dios so pikakasim.”​—Daniel 10:12, MB.

Sano manpipikasi si Daniel, aglabat onkekerew. Oniay ibabaga na Biblia: “Unong [a] gagawaen to lawas, mamitlo’d sanagew . . . a nampikasi tan akisalamat ed Dios to.” (Daniel 6:10, MB) Parad si Daniel, dakel so rason pian pisalamatan tan idayew toy Jehova. Tan gagawaen to itan “lawas.” On, ontan la kaimportante so panagpikasi ed panagdayew to’d Dios kanian agto itan labay ya itunda anggano nipeligro ni so bilay to. Seguradon sikatoy naad-aro nen Jehova ed sayan katooran to.

Talagan baleg ya kagalangan so manpikasi ed Dios! Kanian agmon balot palalabasen so sanagew  ya agka makapitongtong ed Ama tayo’d tawen. Agmo lilingwanan ya pisalamatan tan idayew so Dios ed amin ya kamaongan to. Ipaamtam labat ed sikato iray pakakaaburidoan tan pampapagaan mo. Nodnonot moy impangebat to ed saray kerew mo tan ibalikas moy apresasyon mo. Sano manpipikasi ka, agka manaapura, ibesngaw mo labat ed si Jehova no antoy walad pusom. No ontan so gawaen mo, talagan naliknam so panangaro nen Jehova ed sika. Maabig itan a rason pian ‘mantultuloy a manpikasi’!​—Roma 12:12.

Igloria so Ngaran nen Jehova

Ag-onelet so pikakaaro tayo ed sakey a too no sarili tayo labat so iisipen tayo. Ontan met ed pikakaaro tayo’d si Jehova. Amta itan nen Daniel, kanian say sankanonot ton lanang et say kigloria na ngaran nen Jehova.

Sanen say pikakasi nen Daniel et inebatan na Dios diad impangipaamta To’d sikato no anto imay kugip nen Nabucodonosor tan say interpretasyon na satan, oniay imbaga nen Daniel: “Bendito komon so ngaran na Dios ed ando lan ando lawas; ta say kakabatan tan pakapanyari kayarian to ra.” (Daniel 2:20) Sanen impasabi la nen Daniel ed si Nabucodonosor imay kugip tan say interpretasyon na satan, aminpiga ton binidbir ya si Jehova so lapuan na satan ya impormasyon, a Sikato labat so ‘makapangipaamta’d saray misteryo.’ (Daniel 2:28, MB) Ontan met, sanen akikasi si Daniel parad panamerdona tan panangilaban na Dios, oniay imbaga ton rason: “Lapud dili a kakanaan mo, O Dios ko, lapud say syudad mo tan say baley mo atawag ira unong ed ngaran mo.”​—Daniel 9:19.

Naalig tayoy Daniel ed saya diad dakel a paraan. Sano manpipikasi, ibalikas so panlabay tayo a “napasanto komon so ngaran [na Dios].” (Mateo 6:9, 10) Tan agtayon balot komon manggagaway pakabalawan na masanton ngaran nen Jehova. Imbes, lanang tayon igloriay Jehova diad pangibaga tayo’d arum na saray nanaaralan tayo nipaakar ed maong a balita na Panarian to.

Tua, dakel ed saray totoo natan et anggapoy aro tan panangiyansakit da’d arum. Napapabiskeg balet so liknaan tayo ta amta tayon talagan iyaansakit nen Jehova so balang sakey ed saray mandadayew ed sikato. Imbaga na salmista: “Naliliketay Katawan ed saray totoo to; papagalangan to ray mapaabeba diad pangiiter to’d sikaray pananalo.”​—Salmo 149:4, MB.

[Paimano ed leksab]

[Blurb ed pahina 21]

Impaseguro na Dios so panangaro to’d si Daniel diad impangibaki to’d anghel a si Gabriel pian sikatoy pabiskegen

[Blurb ed pahina 23]

Naad-aro na Dios si Daniel lapud makulin panagaral tan lanang a pampipikasi to, tan maabig so epekto na satan ed personalidad to