Sakey ya Asiano a Walad Italya Nensaman
Sakey ya Asiano a Walad Italya Nensaman
PANON ya akasabi ed Empiryo na Roma so sakey ya toon walay lahi ton Asiano ed bandad Bukig, 2,000 taon lay apalabas? Ontan so tepet na saray archaeologist sanen walay makapainteres ya adiskobre da ed bandad abalaten na Italya nen 2009.
Satan a lugar et sementeryo nensaman na Roma diad Vagnari, 60 kilometro ed sagur na Bari. Walay 75 ya akotkot ya eskeleton na totoo. Ipapanengneng na impansuri ed saray pukepukel a maslak ed saratan a totoo et taga’d asingger a lugar. Balet pankelawan na saray manag-research imay eskeleton na sakey a too. Base ed impansuri ed mitochondrial DNA to, apatnagan a say ina to et walay lahi ton Asiano ed bandad Bukig. * Napatnagan met a say eskeleton et nen inmuna odino komaduan siglo C.E. ni. Base ed report, “ompatnag a saya so pilimeron adiskobre ya eskeleton a walay lahi ton Asiano ed bandad Bukig diad Empiryo na Roma.” Siopa kasi iyan too?
“Diad primero, singa walay pikonektaan to iya diad panaglakoy seda ya inmaligwas diad baetan na Tsina tan Roma,” so inkuan ni na report. Balet isipen na dakel a satan ya negosyo et ginawa na saray pigapigaran ahente ya anggapo met so talagan nanbiahe na diretson 8,000 kilometro diad baetan na Tsina tan Italya.
Antoy naamtaan tayo ed lugar ya akadiskobrian na saray eskeleton? Nensaman, say Vagnari et lugar a kontrolado na empiryo a saray trabahador et mantutunaw na balatyang tan manggagaway laryon tiles. Dakel ed saray trabahador ditan et ariripen, tan nayarin sayan taga Bukig et aripen met ta napatnagan ed ponpon to a sikatoy aliwan mayaman. Say akeran kagawaan to, ya inkotkot a kaiba to et saksakey ya banga, tan walay akatapew ed sikaton imponpon met.
Akin a makapainteres iya? Say asabi na mensahe na Kristiano nen inmunan siglo C.E. et akadepende ed kaarawi abiahe na totoo nensaman. Ibabaga na Biblia ya kayari Pentecostes 33 C.E., nipasabi so maong a balita diad ararawin pasen panamegley na saray ombibisita’d Jerusalem. (Gawa 2:1-12, 37-41) Napatnagan ed sayan eskeleton a posiblin walaray totoo ed saman a manbiabiahe manlapud Bukig na Asia anggad rehyon na Mediteraneo. *
[Saray paimano ed leksab]
^ par. 3 Agnitarya na panagaral ed mitochondrial DNA iray impormasyon nipaakar inmuunan atateng na ama.
^ par. 6 Wala met so ebidensya a saray taga Sagur et oonla’d Bukig na Asia. Nengnengen so artikulon “Anggad Iner ed Bukig so Asabi na Saray Misionero?” diad Enero 1, 2009 ya isyu na Say Panag-Bantayan.
[Mapa ed pahina 29]
(Parad aktual a format, nengnengen so publikasyon)
ROMA
Vagnari
Dayat na Mediteraneo
BUKIG NA ASIA
PACIFIC OCEAN
[Litrato ed pahina 29]
Eskeleton na Sakey ya Asiano ed Bandad bukig ya adiskobre ed sementeryo na Roma nensaman
[Credit Line]
© Su concessione del Ministero per i Beni e le Attività Culturali - Direzione Regionale per i Beni Culturali e Paesaggistici della Puglia - Soprintendenza per i Beni Archeologici della Puglia