Espisyal a Paliwawa

Iner so Napangalaan Tayoy Tulong Pian Natalonaan Iray Problema Natan?

Dakerakel so napangalaan tayoy simbawa natan. Wadtan iray libro tan programa’d TV ya mangiiter na impormasyon no panon a nasolusyonan iray problema. Balet siansia nin agnasabaan iray problema. Kanian ompan nitepet mo, ‘Wala ni kasi makapangiter na napanmatalkan a simbawa?’ Say ebat et on!

Say Biblia, anggano nilibon taon lan nisulat et walaan na praktikal iran prinsipyo a makapangebat ed sarayan tepet:

▪ Panon kon nasolusyonan iray agpantatalosan pian ondakep so ulopan mi?

▪ Panon ak ya magmaliw a maliket?

▪ Panon kon naarap so problema’d kuarta?

▪ Panon kon napakepa so kapagaan ko?

Naebatan irayan tepet diad paliwawan “Saray Prinsipyo ed Biblia​—Kasin Makatulong ed Sikatayon Natalonaan Iray Problema Natan?” Sayan base ed Biblian diskurso et ipaliwawa ed interon mundo. Maslak ed saraya et nagawa diad Kingdom Hall na saray Tasi nen Jehova no Simba, Mayo 1, 2011.

Saray Tasi ed lugar yo so mangipaamta’d oras tan lugar ya pakagawaan na saya. Tan maliket da kan iimbitaan.