Kasin Antam La?

Antoray krimen a ginawa nen Barabas?

▪ Abitla ed apatiran Ebanghelyo si Barabas, say lakin imbulos na Romanon manuley a si Poncio Pilato imbes a si Jesus. Si Barabas et priso ya “kabkabat a mauges” tan “matakew.” (Mateo 27:16; Juan 18:40) Sikatoy inkulong na saray Romano diad Jerusalem a “kaiba to ray totoon akapatey nen walay gulon sumpad gobierno.”​—Marcos 15:7, Maung a Balita.

Tua, anggapoy arum a rekord ya pakanengnengan no antoray krimen a ginawa nen Barabas, balet lapud sikatoy impila’d grupo na saray rebelde ed gobierno, ibabaga na arum ya iskolar a sikatoy kaiba’d saray manggugulo’d Israel nen inmunan siglo. Insulat na historian a si Flavius Josephus ya dakdakel iray grupo na kriminal ed saman a panaon; labay na sarayan bandido ya naikday hustisya iray naaabuson Judion mairap bilay. Lapud ipapasen dan panaglames na saray Romano tan mayayaman ya Judio, lalon linmoor so impanrebelde nen kapegleyan na inmunan siglo C.E. Tan kasabi na 66 C.E., maslak ed saramay Judion angusil ed saray Romano diad Judea et grupo na saray bandido.

“Nayarin kaiba si Barabas ed sakey ed saray grupo na bandido diad baryo. Sarayan bandido et kabkabat na maslak a totoo ta say pupuntiryaen da et saray mayayaman ed Israel tan guguloen day gobierno na Roma,” so inkuan na The Anchor Bible Dictionary.

Nen panaon na saray Romano, antoran krimen so ginawa na saray dudusaen na patey a singa ed si Jesus?

▪ Say idudusa na saray Romano ed saray bandido, rebelde, tan arum ni ran kontra ed gobierno et say pangipasak ed sikara diad sakey a panagpairapan tan paulyanan la ditan ya ompatey. Impasen iyan sankabandayan lan klase na ipapatey.

“Satan et parungtalan, makapabaing, tan ansaki-sakit. Tan ginawa itan pian taktakoten iramay manbabalak ya onkontra ed sistema na gobierno,” so inkuan na libron Palestine in the Time of Jesus. Oniay insulat na sakey a Romanon writer nensaman nipaakar ed impamatey ed saray kriminal: “Pipilien day matoon karsada pian dakel so makanengneng tan nataktakot.”

Unong ed si Josephus, legan na panasakop nen Tito ed Jerusalem nen 70 C.E., walay sakey a kalaban a narel na saray tropa to ya impasak da ed padir na syudad pian taktakoten tan pasukoen ira. Sanen asakop day syudad, ontan met so ginawa ra’d arum.

Ibabaga na rekord ya agawa so sankarakelan ya impangipasak kayari rebelyon ya indaulo nen Spartacus (73-71 B.C.E.). Diad saman et 6,000 ya ariripen tan gladiator so pinapatey diad dalan a mamaarap ed Capua anggad Roma.

[Litrato ed pahina 10]

“Give us Barabbas” nen Charles Muller, 1878