Aligen so Pananisia Ra

“Manisia Ak”

SINGA nanenengneng ni nen Marta so angiponponan ed agi to, sakey ya ungib ya asaraan na baleg a bato. Ngalngali agto naanosay ermen to. Agmakapanisia ya inatey lay inad-aro ton si Lazaro. Say apat agew ya linmabas sanen nauyos so linawa na agi to et singa andukerukey ya kugip na impanermen, insasabi bisita, tan impiambegya ra.

Tan natan, kaarap nen Marta so toon papablien nen Lazaro. Lalon nipanonot ed sikato so ermen sanen anengneng toy Jesus, ta sikato labat so toon makapaabig komon ed agi to. Ingen ta medyo alemewan so liknaan to sanen akatongtong toy Jesus diad asingger ed Betania a baley ya mapalandey. Agano labat so impantongtong da, balet nainawaan la lapud maaro, makasin lupa, tan agnaaandin pililikna nen Jesus. Tinepetan nen Jesus si Marta pian nisentroy imano to’d pananisia to ed kikioli ed bilay. Diad saman ya impantongtong da, nibalikas nen Marta so sakey ed saray sankaimportantian ya imbaga to: “Manisia ak a sika so Kristo ya Anak na Dios, samay onsabi ed mundo.”​—Juan 11:27.

Agaylay biskeg na pananisia nen Marta! Anggaman daiset labat so nabasa’d Biblia nipaakar ed sikato, dakel balet so naaralan tayon mamabiskeg ed pananisia tayo. Pian naamtaan iratan, pawilen tayo pay sankaunaan ya salaysay na Biblia nipaakar ed si Marta.

‘Mapaga tan Aburido’

Diad saman et maligligsa ni Lazaro. Tatalaranan day isabi na sankaimportantian ya bisita ra, si Jesu-Kristo, diad ayaman da ed Betania. Anggaman adulto lay sanaagin Lazaro, Marta, tan Maria, siansia nin saniiba ra’d abung. Ibabaga na arum ya researcher a si Marta so panguloan ed sikaran talo ta sikaton lanang so manasangkaili, tan no maminsan et unonan bibitlaen. (Juan 11:5) Agtayo amta no kasin awalaan iray kaasawaan. Say amta tayo et malmalet iran kaaro nen Jesus. Akiayam si Jesus ed sikara legan na ministeryo to  ed Judea, a ditan et sikatoy sinumpa tan binusol. Seguradon pisalsalamatan toy mareen ya ayaman tan suporta ra.

Pian naasikaso tan naparawes iray bisita, si Marta so mangiyuulo ed kimey ed abung. Lapud makulikuli, singa lanang a manaapura. Lalo la ed sayan pankanawnawa ta ombisitay Jesus. Implano toy mangitarya na pigapigaran putahe parad importantin bisita ra, tan nayarin para met ed saray kaiba To. Nensaman et importantin maong so panagsangkaili. No walay onsabin bisita, sikatoy aangoban, eekalay sandalyas, uurasay salisali, tan pupuyokan na ambalingit a larak ed ulo. (Lucas 7:44-47) Ipaparaan met so napampainawaan tan naakan to.

Dakel so kaukolan a gawaen di Marta tan Maria. Seguradon nen inmuna, si Maria ya ipapasen na arum a mas sensitibo tan seryoso nen say si Marta, et tinmulong ed atsi to. Balet kasabi nen Jesus et agla tinmulong. Parad si Jesus, satan ya okasyon et pankanawnawan manbangat, tan talagan nambangat! Aliwan singa saray lider na relihyon nen panaon to, nirespeto to ray bibii tan maliket ton imbangat ed sikara so Panarian na Dios, ya akasentroan na ministeryo to. Aglabay a napalampas nen Maria iyan pankanawnawa kanian yinmurong tan dinmengel a maong.

Anganko et naiimadyin moy panaaburido nen Marta. Dakel ni kaukolan ton lutoen tan iparaan parad saray bisita ra, kanian mapagpaga tan agmakareen. Legay pantatalikarkar ton mankikimey, say agi to balet et wadman ya akayurong tan aglabat mangiba. Kasin manpappabalanga’d syodot to, maningas na aralem, odino mansibangot? Agtayo la itan pankelawan, ta agto met sarag a gawaen ya amin so kimey.

Kabebekta et agla apigilan nen Marta so syodot to. Biglan sinmalet tan imbaga to’d Jesus ya: “Katawan, anggapo labat ed sika a papaulyanan to ak nen agik a mankikimey a bukor? Ibagam pa ed sikato a tulongan to ak.” (Lucas 10:40) Medyo ambelat iraman a salita. Diad arum a bersion na Biblia et singa oniay imbaga nen Marta: “Katawan, anggapoy pibabalim  . . . ?” Insan to ni kinerew ed si Jesus ya bagaan si Maria a mangiba’d sikato.

Nayarin abiglay Marta ed inyebat nen Jesus, a singa met ed saray dakel ya akabasa ed satan diad Biblia. Mauy-uyamo ton imbaga: “Marta, Marta, dakdakel so pampapagaan tan pakakaaburidoan mo. Ingen ta daiset odino sakey labat so nakaukolan. Balet si Maria et pinili toy sankaabigan a bengatla, tan ag-itan naandi ed sikato.” (Lucas 10:41, 42) Antoy labay ya ibaga nen Jesus? Inisip to kasin say importanti’d si Marta et saray materyal a bengatla? Baliwala kasi’d sikato so pansasagpot nen Marta?

Andi. Amta nen Jesus ya maong so motibo nen Marta. Sakey ni, agto impasen a makapuy so pamparaan na dakel. Ta sakbay na saya et namparaan na “baleg a ponsia” si Mateo parad sikato. (Lucas 5:29) Aliwan say imparaan nen Marta sirin so isyu ed saya, noagta no antoy mas inyuna to. Lapud mapagpaga ed pangitarya na pigapigaran putahe, alingwanan to no antoy mas importante. Anto itan ey?

Si Jesus, say alenleneg ya Anak nen Jehova a Dios, et walad abung da pian ibangat so katuaan. Anggapo lay mas importante nen say saya, anggan say mananam a naakan. Seguradon ag-aliketan si Jesus ta asayang nen Marta so mataltalag a pankanawnawan napabiskeg so pananisia to, ingen ta agto pinilit ya ondengel. Balet, no ipibali ni nen Marta si Maria ya agmakadngel ed bangat nen Jesus, duma lan tongtongan itan.

Kanian maar-aro ton sinimbaway Marta, ya amidua ton binitlay ngaran to pian napakalma, tan pinaseguroan to ya agla kaukolan a ‘pampagaan tan panaburidoay dakel a bengatla.’ Duga lay sakey o duaran simplin putahe, lalo la no walay intaryan espiritual a ponsia. Anggapo sirin so rason pian ekalen nen Jesus so “sankaabigan a bengatla” ya pinili nen Maria, say pakaaral ed sikato!

Saray patumbok nen Kristo natan et makaaral na dakel ed sayan eksena. Nepeg ya agtayon balot aabuloyan so antokaman a mangalay oras tayo a para komon ed “espiritual a pankaukolan.” (Mateo 5:3) Anggaman labay tayon aligen so inkamaiter tan inkakuli nen Marta, agtayon balot labay so magmaliw a masyadon ‘mapaga tan aburido’ ed saray agtanton importante a kabiangan na panagparawes tan napaulyanan la ray talagan importante. Mililimog tayo ed saray kapananisiaan, aliwa labat a pian mamakan odino mangan, noagta pian manpapabiskegan na pananisia. (Roma 1:11, 12) Anggan simsimpli so panangan, makapanpapabiskegan tayo nin siansia.

Say Inad-aron Agi ya Inatey tan Abilay

Kasin inawat nen Marta so maaron simbawa nen Jesus tan akaaral ed satan? Segurado. Sanen insulat nen apostol Juan so marakdakep ya istorya na agi nen Marta, imbaga to: “Inar-aro nen Jesus ira di Marta tan say yugtan ton bii tan si Lazaro.” (Juan 11:5) Apalabas lay pigaran bulan manlapu la’d samay imbisita nen Jesus ed Betania. Mapatpatnag ya agnansinti si Marta ed si Jesus; sikatoy agbinmarong. Impapuso toy maaron bilin nen Jesus. Diad saya et maabig lamet ya alimbawa na pananisia si Marta, ta siopa’d sikatayo so agmankaukolay panangipetek sagpaminsan?

Sanen nansakit so agi nen Marta, talagan kinomponi to. Ginawa toy amin a nayarian to pian anggan panon et nainawaan tan onabig so agi to. Balet, linmoor so sakit nen Lazaro. Inoras-oras, inagew-agew, dan inasikaso so agi ra, agdan balot pinaulyanan. Aminpiga kasin ninengneng nen Marta so naiirapan lan lupa nen agi to, legan ton sankanonot so impanulop dan sanaagi diad irap tan inawa?

Sanen singa anggapo lay ilalo di Marta tan Maria ya onabig ni Lazaro, impatawag day Jesus. Diad saman et sikatoy manpupulong ed lugar a say kaarawi to et manga duay agew ya  akaren. Antikey labat so mensahe ra’d sikato: “Katawan, nengneng mo! samay pinabpablim a kaaro et mansasakit.” (Juan 11:1, 3) Amta ran inar-aro nen Jesus so agi ra, tan matalek iran gawaen toy anggaay nayarian ton tulongan so kaaro to. Kasin nanilalo iran makasabi Jesus antis ya ompatey si Lazaro? No ontay inilaloan da, seguradon adismaya ra. Ta inatey si Lazaro.

Agaylay impanermen di Marta tan Maria ed impatey na agi ra. Imparaan day ponpon to tan inasikaso da ray bisitan taga’d sikara tan arum niran lugar. Balet anggapo nin siansiay balita’d si Jesus. Diad ilalabas na agew et seguradon mankelaw lay Marta. Insan, apat agew kayari impatey nen Lazaro, nadngelan nen Marta ya asingger la’d baley da si Jesus. Lapud aliston onkiwas, anggano maneermen et sikatoy nanapuran inmabet ed si Jesus ya agto la imbaga’d si Maria.​—Juan 11:20.

Sanen anengneng toy Katawan to, imbaga toy pigay agew lan mamapaermen ed sikato tan ed si Maria: “Katawan, no wadia ka labat, agkomon inatey so agik.” Balet, agnin siansia naandiay ilalo tan pananisia si Marta. Oniay inyarum to: “Balet natan et amtak ya anggan panon karakel so kerewen mo ed Dios, iter iratan ed sika na Dios.” Tampol ya inmebat ed sikato si Jesus pian pabiskegey pananisia to: “Say agim et onoli.”​—Juan 11:21-23.

Abaloan nen Marta a say kikioli ni ed arapen so tutukoyen nen Jesus, kanian imbaga ton: “Amtak a sikatoy onoli diad kaunoran ya agew.” (Juan 11:24) Agaylay pananisia to ed satan a bangat. Ibabaga na arum ya Judion lider na relihyon, a tatawagen a Saduceo, ya anggapoy kikioli ed bilay anggan malinlinew ya ibabangat itan na Salitay Dios. (Daniel 12:13; Marcos 12:18) Amta balet nen Marta ya imbangat nen Jesus so ilalon kikioli tan amaoli ni ingen na inaatey​—balet anggapo’d saratan so singa kabayag na impatey nen Lazaro. Ag-inilaloan nen Marta so onsublay a nagawa.

Walay imbaga nen Jesus ya agnalinglingwanan: “Siak so kioli tan say bilay.” On, inikdan nen Jehova a Dios so Anak to na pakayari pian diad arapen et bilayen to iray inaatey diad interon mundo. Tinepetan nen Jesus si Marta: “Manisia ka ed saya?” Say ebat to et samay walad gapo na sayan artikulo. Panisiaan ton si Jesus so Kristo odino Mesias, Anak nen Jehova a Dios, tan say impasakbay na saray propeta ya onsabi’d mundo.​—Juan 5:28, 29; 11:25-27.

Papablien kasi nen Jehova a Dios tan say Anak ton si Jesu-Kristo so ontan a pananisia? Say onsublay ya anengneng nen Marta so malinlinew a mangebat ed satan. Tinawag ton tampol so agi to. Kayari na satan, naimano ton atenyeg so liknaan nen Jesus legan a mitotongtong ed si Maria tan arum ni ran wadman ya maneermen. Anengneng ton tinmedter so lua nen Jesus, ya ag-angiyamot ed ermen To ya resultay ipapatey. Nadngel ton ingganggan nen Jesus ya ekalen so baton akasara ed ponponan nen agi to.​—Juan 11:28-39.

Lapud realistiko si Marta, sikatoy kinmontra ta apat agew lan inatey si Lazaro tan ambanget la. Impanonot nen Jesus ed sikato: “Agta imbagak ed sika a no manisia ka et nanengneng moy gloria na Dios?” Sikatoy anisia tan anengneng to so gloria nen Jehova a Dios. Diad saman a mismon oras, inikdan na Dios na pakapanyari so Anak to pian bilayen si Lazaro! Nonoten pa ray agawgawan tinmatak ed isip nen Marta sanlegay bilay to: say intawag nen Jesus ya, “Lazaro, paway ka!”; say makalnan ungol ed ungib ya angiponponan ed si Lazaro legan ya ompapaway ya apotipotan ni na bendan uusaren ed saray inaatey; say ganggan nen Jesus ya “ukbaran yo tan paulyan yo”; tan seguradon pati say malmalet ya lakapan dan sanaagi. (Juan 11:40-44) Nakal so ermen nen Marta!

 Ipapanengneng na saya a say kioli na inaatey et aliwan is-istorya labat. Sakey iyan makapalikliket a bangat na Biblia tan tuan agawa. Labalabay nen Jehova tan na Anak ton bendisyonan iray walaan na pananisia a singa di Marta, Maria, tan Lazaro. Bendisyonan da ka met no pabiskegen moy pananisiam a singa si Marta. *

“Si Marta so Manseserbi”

Say sampot ya impamitla na Biblia ed si Marta et diad samay unor lan simba nen Jesus bilang too diad dalin. Lapud amta nen Jesus a magano lay panirap to, pinili toy miayam lamet ed abung di Marta diad Betania. Manlapu ditan et manakar na taloran kilometro paonla’d Jerusalem. Sanen akirungo si Jesus tan Lazaro ed abung nen Simon a datin akating, satan lay unor ya impamitla na Biblia ed si Marta. Oniay nabasa: “Si Marta so manseserbi.”​—Juan 12:2.

Talagan sikatoy makulikuli! Nen unonan binitla ed Biblia, mankikimey la. Tan nen unor a binitla ed Biblia, mankikimey nin siansia, a mansasagpot pian serbiay arum. Bendisyon ed saray kongregasyon nen Kristo natan so bibii a singa si Marta a makpel tan maiter, ya ipapanengneng day pananisia ra diad panutulong ed arum. Nayarin intultuloy a ginawa itan nen Marta. Duga labat itan ta wala ni ray irap a dalanen to.

Kayari pigay agew, kaukolan ya itepel nen Marta so teriblin ipatey na inar-aro ton Katawan, si Jesus. Likud ni ed satan, saray amatey ed si Jesus et determinado met a mamatey ed si Lazaro ta dinmakel so anisia lapud inkioli to. (Juan 12:9-11) Sakey ni, pinultot met lanlamang na ipapatey so ulopan dan sanaagi. Agtayo amta no panon tan kapigan itan agawa, balet say segurado tayo et: say pananisia nen Marta so tinmulong ed sikaton makapansungdo sanlegay bilay. Kanian maabig no aligen na saray Kristiano natan so pananisia nen Marta.

[Paimano ed leksab]

[Litrato ed pahina 11]

Anggano maneermen, inabuloyan nen Marta si Jesus ya isentroy nonot to ed saray makapabiskeg na pananisia

[Litrato ed pahina 12]

Anggano ‘napapagaan tan naaaburido’ si Marta, mapaabeba ton inawat so panangipetek

[Litrato ed pahina 15]

Abendisyonay pananisia nen Marta ed si Jesus sanen apaoli so agi to