Aligen so Pananisia Ra

Sikatoy Niligliwa na Dios To

SINUBA nen Elias so uran legan ya ombibilunget so tawen. Arawi ni batiken to pian makasabid Jezreel, sakey ni, makapuy lay pueg to. Balet mapaot ya ombatik si Elias ta “say lima nen Jehova” et walad sikato. Talagan nikadkadumay kasil na laman to. Diad peles to, naunaan to ni ingen iray kabayon manguguyor ed karwahe nen Arin Ahab!​—1 Arari 18:46.

Natan et bukbukor la nen Elias ed dalan. Imadyin mo pay panliklikdem to lapud pulasi na uran legan a sankanonot toy agnalinglingwanan ya agawad bilay to. Talagan analtalo ed saman so Dios to a si Jehova tan nipaamta no dinan so dugan panagdayew. Arawi lay Elias tan lapud bilunget et agto la nanengneng so Palandey Carmel, a ditan nanggawa si Jehova panamegley to na baleg a milagro tan pinmaway a kababaing iray managdayew nen Baal. Apaneknekan ya palso so dios na saray propeta nen Baal kanian duga labat ya pinapatey ira. Kayari na satan, nampikasi Elias ed si Jehova a manampot la komon so talora tan kapalduay taon ya anggapoy uran. Tan inmuran a tua! *​—1 Arari 18:18-45.

Legan a mapalasapas so batik nen Elias paonlad Jezreel, a manga 30 kilometro so kaarawi, say amta to et talagan ondakep lay situasyon. Manguman lay Ahab ed saya! Kayarin anengneng nen Ahab imay milagro, seguradon anggapo lay nagawaan to noag say tundaan so mandayew ed si Baal, disiplinaey asawa ton si Reyna Jezebel, tan agto la pairapen iray lingkor nen Jehova.

No maminsan, no marakep so nagagawad bilay tayo, say amta tayo et tuloy-tuloy la itan. Ompan isipen tayo ni ingen ya onaligwas ni situasyon tan alampasan tayo la ray sankairapan a problema. Agtayo la pankelawan no ontan so ninonot nen Elias, ta sikatoy “toon walaan na liknaan a singa sikatayo.” (Santiago 5:17) Pero, agni asumpal so problema nen Elias. Diad tua, pigay oras labat so onlabas et sikatoy nataktakot, na-depress, tan kerewen ton ompatey la komon. Anto kasi agawa? Tan antoy ginawa nen Jehova pian manpakpel tan ombiskeg so pananisia na propeta to? Nengnengen tayo.

Ag-inilaloan a Nagawa

Kasin anguman lay Ahab kasabi tod palasyo to diad Jezreel? Kasin inunor to lay tuan Dios? Oniay nabasa tayo: “Imbaga nen Ari Ahab ed kinen asawa ton Jezebel iray amin a ginawa nen Elias tan say impamatey tod amin da ray propeta nen Baal.” (1 Arari 19:1, Maung a Balita) Imanoen ya agton balot binitla so Dios nen Elias ya si Jehova. Samay milagron anengneng to et impasen ton ginawa labat na too. Say kuanto et “ginawa nen Elias.” Malinew ya agto nirespeto si Jehova a Dios. Anto balet so reaksion nen Jezebel, ya ugali toy ombawi?

Talagan amasnok! Diad syodot to, impaibaga tod si Elias: “Pateyen ak komon na saray dirios  no diad onian oras nabuas et agko gawaen ed sika so singa ginawam ed saray propeta.” (1 Arari 19:2, MB) Aya la so sankagrabian ya death threat! Insumpa nen Jezebel a sikatoy ompatey no agto napatey si Elias pian ibawian iray propeta to. Imadyin mo pan nanaugip si Elias ed simplin ayaman to diad Jezreel tan ombabagyo ed saman a labi. Kabebekta et abalikwat ed makapataktakot a mensahe na igaganggan na reyna. Antoy reaksion to?

Adisdismaya tan Ataktakot

No say amta nen Elias et anggapo lay mandayew ed si Baal, sikatoy alingo-lingo. Ag-anguman si Jezebel. Pinapatey to ray matoor ya kakaiba nen Elias tan natan et singa sikato lay isublay to. Inkuan na Biblia ya: “Tinmakot si Elias.” Kasin naimadyin nen Elias so maruksan pamatey ed sikato nen Jezebel? No ontan so ninonot to lan ninonot, seguradon ataktakot. Imbaga na salaysay ya ‘batik si Elias pian iyagel so bilay to.’​—1 Arari 18:4; 19:3, MB.

Aliwan si Elias labat so matoor ed Dios ya tinmakot. Alikna met itan nen apostol Pedro. Singa bilang, sanen sikatoy tinawag nen Jesus a manakar ed tapew na danum, “inimano toy maksil a dagem.” Kanian tinmakot tan linmereg. (Mateo 14:30) Walay naaralan tayod si Pedro tan Elias. Pian mansiansia tayon makpel, kaukolan ya ekalen tid nonot tayo iray manataktakot ed sikatayo. Nepeg a say nonoten tayo et say Lapuan na ilalo tan biskeg tayo.

‘Alablabas La Ya!’

Ataranta si Elias tan batik. Manga 150 kilometro so akaren to pian makasabid abalaten-sagur na Beer-sheba, sakey a baley ya asingger ed abalaten a ketegan na Juda. Diman et intilak toy aripen to tan bukor ton linma ed desierto. Ibabaga na rekord ya sikatoy “nanakar na sanagew,” kanian naiimadyin tayon palbangon ni labat et manaakar la tan kalima-lima. Nadedepress tan nanenerbiyos kalamor si Elias. Nakar toy aliwan patag, delikadon lugar, tan mansasnit ni petang. Nen onseselek lay agew tan ombibilunget so kaliberliber, agla nayarian nen Elias so manakar. Lapud kesaw to, inlespak tod silong na sakey a kiew, a napampainawaan to diad desierto.​—1 Arari 19:4, MB.

Lapud desperado lay Elias, impikasi ton ompatey la komon. Imbaga to: “Agak magmaong nen saray ateng ko.” Amta ton inaatey la ray inmuunan atateng to tan anggapo lay nagawaan da. (Eclesiastes 9:10) Say pakalikna to et kapara to ran anggapo lay kana. Kanian  inyugaog to: ‘Alablabas la ya!’ Maong lay ompatey.

Makapabigla kasin naamtaan ya say toon matoor ed Dios et nade-depress met manaya? Andi. Walaray matoor a lalaki tan bibii a binitla na Biblia ya nanermen met a maong tan kinerew dan ompatey la ra komon. Say arum ed sikara et si Rebeca, Jacob, Moises, tan Job.​—Genesis 25:22; 37:35; Numeros 11:13-15; Job 14:13.

Natan, manbibilay itayo ed “nikadkaduma tan mair-irap a panaon,” kanian agtayo la pankelawan no akin a dakel ya totoo, anggan saray matoor a lingkor na Dios, so maer-ermen no maminsan. (2 Timoteo 3:1) No ontan so situasyon mo, alig moy Elias: Ipaamtam ed Dios so naliliknam. Ta si Jehova so “Dios na amin a ligliwa.” (2 Corinto 1:3) Kasin niligliwa toy Elias?

Tinulongan nen Jehova so Propeta To

Anto kasi alikna nen Jehova legan ton banbantagen ed tawen so inar-aro ton propeta ya akarukol kalamor ed silong na kiew tan mikakasin ompatey la komon? Anta lay ebat. Nen abaldak si Elias ed kesaw to, angibaki si Jehova na sakey ya anghel. Kalkalnan sinipeg na anghel si Elias tan imbaga to: “Bangon ka, ta mangan ka.” Binmangon si Elias, ta mapangpangasin angiparaan so anghel na kapanluton tinapay tan danum. Akisalamat kasi ed samay anghel? Say imbaga labat na rekord et angan tan inminum so propeta insan lamet inmugip. Kasin lapud kapuy tan ermen to et aglabat inmesel? Agtayo amta, balet ta sikatoy binangon lamet na anghel tan nayarin palbangon lad saman. Imbaga to lamet, “Bangon ka, ta mangan ka,” insan to inyarum, “no agka mangan nairapan kad panakar mo.”​—1 Arari 19:5-7, MB.

Lapud karunongan ya inter na Dios ed anghel, amta to no iner so laen nen Elias. Amta to met ya agnasarag nen Elias so panakar na andukey, no diad sarilin biskeg to labat. Talagan makapaliket a panlingkoray Dios a mas amta to ray plano tan limitasyon tayo nen say sikatayo! (Salmo 103:13, 14) Panon ya akatulong ed si Elias imay naakan?

Oniay nabasa tayo: “Binmangon si Elias, angan, tan inminum; angiter ed sikato na biskeg imay tagano diad impanakar to na apataplon agew tan apataplon labi ya anggad Sinai [Horeb], say masanton palandey.” (1 Arari 19:8, MB) Singa si Moises a nambilay manga 600 a taon lay apalabas antis to tan singa si Jesus a nambilay ngalngali 1,000 taon kayari to, agbalot angan si Elias ed loob na 40 agew tan 40 labi. (Exodo 34:28; Lucas 4:1, 2) Samay inter a naakan ed sikato et aliwan solusyon ed amin a problema to, balet mamilagron amabiskeg iman ed sikato. Isip mo pay onmamasiken lan Elias ya irap toy manaakar ed anggapoy natonton a dalan na pigay agew, pigay simba, ngalngali sakey tan kapalduan bulan!

Ontan met natan, tutulongan nen Jehova iray lingkor to, balet aliwan diad mamilagron panangan, noagta mas ni nen say satan. Susuportaan to ray lingkor to diad espiritual a paraan. (Mateo 4:4) No nakabat tayoy Dios diad pambasa ed Biblia tan ed arum a publikasyon ya base ed Biblia, ombiskeg so espiritualidad tayo. Anggano mabiskeg tayo ed espiritual et wadtan nin siansia iray problema  tayo, balet makatulong itan pian naanosan tayo iray singa mairap ya anosan. Ompugta met itan ed “bilay ya andi-anggaan.”​—Juan 17:3.

Ngalngali 320 kilometro so inakar nen Elias tan akasabin siansia ed Palandey Horeb. Nensaman, panamegley na sakey ya anghel et ditan nampanengneng si Jehovan Dios ed si Moises diad mandarlang ya abeban kiew tan ditan met inter nen Jehova so Ganggan a sipan ed Israel. Kabebekta et linmoob si Elias ed sakey ya kuweba.

No Panon a Niligliwa tan Pinabiskeg nen Jehova so Propeta To

Diad Horeb, mapatnag ya impasabi na sakey ya anghel so “salita” nen Jehova ed si Elias. Oniay simplin tepet to: ‘Antoy gagawaen mo dia, Elias?’ Seguradon say impitongtong to et maar-aro ta agnatatakot si Elias a mangibagad nalilikna to. Imbaga toy amin a walad puso to! Inkuan to: ‘Nanimon ak a tuloy nipaakar ed Jehova, a Dios na saray ehersito ta saray anak na Israel inkaindan da so sipan mo, tan inggeba ra so saray altar mo, tan pinatey da so saray propetam ed kampilan. Et siak, on siak a bukor so atilak, et seseetan dan ekalen so bilay ko.’ (1 Arari 19:9, 10) Walay taloran imbaga nen Elias a mamapaermen ed sikato.

Unona, say pakalikna nen Elias et anggapoy kana na ginawa to. Tua, abayag lan ‘nanimon a tuloy’ si Elias parad si Jehova. Inyansakit toy sagradon ngaran na Dios tan inyuna toy panagdayew ed Sikato, balet lalo la ingen ya linmoor so situasyon. Siansia nin anggapoy pananisia na totoo tan rebelde ira, ondarakel met iray mandadayew ed aliwan tuan dirios. Komadua, begtebegtew si Elias. “Siak a bukor so atilak,” so imbaga to, a singa no sikato labat lay akeran manlilingkor ed si Jehova ed interon nasyon. Komatlo, natatakot si Elias. Dakel lay pinapatey ya kapara ton propeta, tan aluto-lutod isip to ya sikato lay onsublay. Nayarin aliwan mainomay ed si Elias ya aminen so nalilikna to, balet agto inabuloyan so pride odino baing pian ipatua itan. Sikatoy uliran na amin a matoor ya totoo lapud impikasi tod Dios to so amin a walad puso to.​—Salmo 62:8.

Panon a pinakepa nen Jehova so takot tan paga nen Elias? Ingganggan na anghel si Elias ya onalagey ed lolooban na kuweba. Sikatoy tinmulok anggan agto amtay nagawa. Biglan walay alimbusabos! Anganko et manasibengbeng ta diad kakasil to, atebag-tebag iray palandey tan angkakabaleg a bato. Isip mo pay Elias ya pepepetan toy mata to tan inakop toy makapal, simplin  bago a kawes to ta isisiplog na maksil a dagem. Insan, kaukolan ton balansiey laman to ta manbuaboy dalin lapud yegyeg! Kabebekta et nitan lay mansasnit ya pool, kanian sinmener pian agnapuldakan.​—1 Arari 19:11, 12.

Ibabaga na Biblia ya anggapod pegley na saratan a makapakelkelaw ya agawa si Jehova. Amta nen Elias a si Jehova et aliwan alamat a dios na palsa, a singa si Baal ya indayew na saray atilaan ya totoo bilang “Akalugan ed Lurelurem” odino mangiiter na uran. Si Jehova so tuan Lapuan na amin ya makapadinayew a pakayari na palsa, balet ag-iratan makakiking a balot ed sikato. Anggan say uniberso et agto nakargay Jehova! (1 Arari 8:27) Panon irayan akatulong ed si Elias? Tua, sikatoy natatakot. Balet lapud walad abay to so Dios to a si Jehova, ya agaylay kabaleg na pakayari To, agkaukolan ya takotan nen Elias si Ahab tan Jezebel!​—Salmo 118:6.

Kayari pool, biglan dinmeen tan nadngel nen Elias so ‘makalnan boses.’ Kinerew na satan lamet ed si Elias ya ibagay nalilikna to, kanian pinidua ton imbaga so pakakaaburidoan to. * Nayarin mas nainawaan ed satan si Elias. Balet seguradon sikatoy lalon aligliwa ed sinmublay ya imbaga na ‘makalnan boses.’ Impaseguro nen Jehova ya pinabpabli toy Elias. Panon? Imbaga na Dios ed sikato so gawaen To sumpad saray mandadayew ed si Baal diad Israel. Malinew ya ag-asayang so impansagpot nen Elias ta anggapoy makaamper ed gagala na Dios. Insan, kaiba nin siansiay Elias ed satan a gagala, ta sikatoy imbaki lamet nen Jehova ya gawaen so sakey a kimey.​—1 Arari 19:12-17.

Say naliliknan ermen nen Elias ey? Walay duaran ginawa nen Jehova ed satan. Unona, ingganggan toy Elias ya lanaan si Eliseo pian magmaliw a kasalat ton propeta. Ibaan na sayan mas ugaw a laki si Elias tan magmaliw ya katulongan to ed loob na pigay taon. Talagan praktikal itan a tulong! Komadua, impaamta nen Jehova iyan makapaliket a balita: “Mangitilak ak ed siak na pitonlibo dia ed Israel, amin so saray pueg ya agtinmalimukor ed Baal, tan amin a sangi ya ag-inmangob ed sikato.” (1 Arari 19:18) Agmanaya bukbukor nen Elias. Seguradon sikatoy manlikliket sanen naamtaan ton walay pitonlibon matoor a totoo ya agnandayew ed si Baal. Kaukolan day matoor a serbisyo to tan say ehemplo na agmanguuman a katooran tod si Jehova legan na saraman a mairap a panaon. Talagan sikatoy apabiskeg ed imbaga na mensahero nen Jehova, say ‘makalnan boses.’ Parad si Elias, say Dios a mismo so akitongtong ed sikato.

Singa si Elias, nayarin mandinayew tayod mabisbiskeg a puersa na palsa, tan aliwa met itan a mauges. Malinlinew ya ipapanengneng na saray pinalsa so pakayari na Amalsa. (Roma 1:20) Labalabay nin siansia nen Jehova ya usaren so andiay limitasyon ya pakayari to pian tulongan iray matoor a lingkor to. (2 Awaran 16:9) Balet, mas uusaren toy Salita to, say Biblia pian mitongtong ed sikatayo. (Isaias 30:21) Natan, say Biblia et singa ‘makalnan boses’ pian nitonton, nipetek, napabiskeg, tan napaseguroan tayod panangaro to.

Kasin inawat nen Elias so tulong nen Jehova ed Palandey Horeb? On! Ag-abayag nankimey lamet si Elias. Nagmaliw lamet ya makpel, matoor a propeta ya sinmumpad mauges a palson panagdayew. No ipapapuso tayo met natan so pinuyanan a Salita na Dios, say “panagligliwa na Kasulatan,” naalig tayoy pananisia nen Elias.​—Roma 15:4.

[Saray paimano ed leksab]

[Litrato ed pahina 19]

Benendisyonan nen Jehova si Elias, diad marakep tan mairap a panaon

[Litrato ed pahina 20]

Lapud pinasyan ermen nen Elias, imbaga toy amin a walad puso to ed si Jehova

[Litrato ed pahina 21]

Inusar nen Jehova so makapadinayew a pakayari to pian ligliwaen tan pabiskegen si Elias