2 Anggapoy Pibabali na Dios—Tua Kasi?
2 Anggapoy Pibabali na Dios—Tua Kasi?
No antoy ibabaga ra: “No talagan iyaansakit na Dios so totoo, di inekal to la komon so kaugsan tan irap ed mundo. Tan no bilang ta iyaansakit toy karaklan, seguradon anggapoy pibabali tod siak.”
No antoy ibabangat na Biblia: Aliwan si Jehova a Dios so panlalapuan na kaugsan. (Santiago 1:13) Sarag to pan ekalen itan ed anggan anton oras, balet aabuloyan to ni kaugsan natan pian nasolbar so isyu ya agawa ed gapoy too. Diad dugan panaon, ekalen toy amin a problema na totoo ya iiter na saramay agmalabay a manpasakop ed pananguley to.—Genesis 3:1-6; Isaias 65:17. *
Aglabat iyaansakit na Dios so totoo bilang grupo noagta ipapanengneng to met so panangaro tod sikatayo bilang indibidual. Naiimano to iray detalyin nipaakar ed sikatayo, anggano sikatayon mismo et agtayo iratan naiimano, a singa ibabaga na Mateo 10:29-31: “Agta say duaran anuyaw et manbili labat na sakey a sinsilyo? Ingen ta anggapo anggan sakey ed saratan so napelag ed dalin ya ag-amta na Ama yo. Balet anggan saray buek na ulo yo et abilang ya amin. Agkayo sirin natatakot: Mas mabli kayo ni nen say dakel ya anuyaw.”
No panon a makatulong ed sika so pangamtad katuaan: Normal labat a paliisan tayo ray totoon mapaspasnok odino agmangiyaansakit. Kanian agtayo la pankelawan no akin a say katilaan ya “anggapoy pibabali na Dios” so rason ya agbalot labay na dakel a totoo a kabaten so Dios odino onkerew labat iray tulong ed sikato no kapilitan. Lapud amta tayon iyaansakit itayo nen Jehova a Dios, labay tayon sikatoy nakabat tan nakaaro.
Alimbawa, nayarin asalim lay nampikasid Dios balet agka segurado no kasin dinengel odino ebatan to ka. Ipapaseguro na Biblia ya say Dios a ‘Dumerengel na pikakasi’ et lanang ya akaparaan ya ondengel ed amin a sinseron onasingger ed sikato.—Salmo 65:2.
Iimbitaan ka na Dios ya ‘ipaawit ed sikato so amin a kapagaan mo, lapud iyaansakit to ka.’ (1 Pedro 5:7) Seguradon gawaen to itan lalo la no grabe problema tayo ta imbaga na Salita to: “Si Jehova asingger ed saray wala ed kipapasen na sakey a nabtagan na puso; tan ilaban to so totoo a . . . masakit ed panagbabawi.”—Salmo 34:18.
[Paimano ed leksab]
^ par. 3 Parad kaaruman ya impormasyon no akin ya aabuloyan na Dios so kairapan, nengnengen so kapitulo 11 na libron Anto so Peteg ya Ibabangat na Biblia?
[Blurb ed pahina 5]
No anggapoy pibabali na Dios, akin et kerewen to nin manpikasi tayo ed sikato?
