Abraham​—Maar-aro

Agaylay ermen na masiken lan si Abraham ta naandi lad bilay so inad-aro ton asawa ya si Sara. Sankanonot toy malikeliket ya impaniba ra. Lapud agto la napokpokay ermen to, tinmedter iray lua to. (Genesis 23:1, 2) Ag-inisip nen Abraham ya kababaing so onakis. Imbes, saraman a lua et pakapatnagan na sakey ed saray sankaabigan a kualidad to​—say aro.

ANTO SO ARO? Say aro et maapit a liknaan tan panamabli ed arum. Say maaron too et manggagaway paraan pian nipaliknay panangaro tod saray inad-aro to, tan akaparaan ni ingen a mansakripisyo parad sikara.

PANON YA IMPANENGNENG NEN ABRAHAM SO ARO? Impalikna tod pamilya to ya inad-aro to ra. Seguradon dakel so kimey nen Abraham. Balet, agton balot pinaulyan so espiritualidad na pamilya to tan importantid sikato so nalilikna ra. Diad tua, naimanon mismo nen Jehova ya bilang ulo na pamilya, si Abraham so mangidadaulo diad panagdayew ed Dios. (Genesis 18:19) Sakey ni, imbalikas a mismo nen Jehova so nipaakar ed panangaro nen Abraham. Sanen mitotongtong ed si Abraham, indeskribe Toy Isaac bilang “say anak mo a bogbogtong, ya inad-arom.”​—Genesis 22:2.

Lalo tayon nanengneng so panangaro nen Abraham diad samay reaksion to sanen inatey so inad-aro ton si Sara. Talagan nannangis a maong. Makpel a laki si Abraham, balet parad sikato et aliwan kababaing so onakis. On, anggano  makpel si Abraham, aliwan anawet so puso to.

Pinaneknekan nen Abraham ya inad-aro toy Dios. Impatnag to itan a panangaro diad interon bilay to. Panon? Nayarin nanonotan tayo imay ibabagay Biblia diad 1 Juan 5:3: “Saya so aro na Dios, a sumpalen tayo so saray ganggan to.” Base ed satan a teksto, nibaga tayon talagan makapadinayew so panangaro nen Abraham ed Dios.

Kada walay iganggan nen Jehova ed si Abraham, sikatoy tampol ya ontutulok. (Genesis 12:4; 17:22, 23; 21:12-14; 22:1-3) Agla importantid si Abraham no mairap o mainomay itan, tan agmet la importante no akin et pagagawa nen Jehova itan ed sikato. Sikatoy akaparaan ya ontulok anggan antoy iganggan nen Jehova. Parad sikato, kada ganggan et pankanawnawan nipanengneng to so panangaro tod Jehova.

ANTORAY NAARALAN TAYO? Naalig tayoy Abraham diad pangar-aro tayod arum, lalo lad saray kapamilya tayo. Agtayon balot aabuloyan a samsamen na problema tan dakerakel a kimey so panaon ya para komon ed saray pinabpabli tayo.

Maabig no aralen tayo met ya aroen si Jehova. Baleg so epekto na satan ya aro ed bilay tayo. Singa bilang, pakiwasen itayo na satan ya umanen so ugali, panagsalita, tan kagagawa tayo pian napaliket so Dios.​—1 Pedro 1:14-16.

Tua, aliwan lanang ya mainomay ya unoren iray ganggan nen Jehova. Balet, nailaloan tayon samay tinmulong ed si Abraham​—samay anawag ed sikaton “kaarok”​—et wadtan ya ontulong met ed sikatayo. (Isaias 41:8) Isisipan na Salita to, say Biblia: “Gawaen to [kan] mapekder tan pabiskegen to [ka].” (1 Pedro 5:10) Talagan balibali itan a sipan na samay napanmatalkan a Kaaro nen Abraham!

[Kahon ed pahina 11]

Kasin Kababaing ya Onakis so Laki?

Say iyebat na dakel ed satan et on. Ompan agda napanisiaan ya sakey labat si Abraham ed pigaran mabiskeg tan matoor a lalakin adeskribe ed Biblia ya inmakis lapud ermen. Kaibad satan si Jose, David, si apostol Pedro, saray elder ed kongregasyon diad Efeso, tan anggan si Jesus. (Genesis 50:1; 2 Samuel 18:33; Lucas 22:61, 62; Juan 11:35; Gawa 20:36-38) Malinew sirin ya unong ed Biblia, aliwan kababaing ya onakis so sakey a laki.