Abraham—Mabiskeg so Pananisia To
Abraham—Mabiskeg so Pananisia To
Diad marendeen ya labi et walad paway na tolda si Abraham. Akatangwad maliwliwawa tan mabitewen ya tawen, tan sankanonot to imay sipan na Dios ya say ilalak to et magmaliw a singa karakel na saray bitewen. (Genesis 15:5) Parad si Abraham, ipapanonot na sarayan bitewen imay sipan nen Jehova, tan garantiya met iraya. No sarag nen Jehova ya palsaey maaw-awang ya uniberso tan amin a wadtan, agta sarasarag to met ya ikday anak si Abraham tan Sara? Ontan kabiskeg so pananisia nen Abraham.
ANTO SO PANANISIA? Unong ed Biblia, “say pananisia et panagmatalek a seguradon nagawa iray bengatlan iilaloan, a walaay makakombinsin ebidensya a tua iratan anggano agnanenengneng.” (Hebreos 11:1) Say toon walaay pananisia ed Dios et sankanonot toy pakagawa na saray sipan nen Jehova, tan parad sikato et singa la itan agawa anggano andi ni.
PANON YA IMPANENGNENG NEN ABRAHAM SO PANANISIA? Anisiay Abraham ed saray sipan na Dios. Lapud mabiskeg so pananisia nen Abraham, tinaynan toy binalegan ton lugar, ta matalek ya tooren nen Jehova imay sipan Ton ipanengneng Tod sikato so sananey a dalin. Ontan met, ayarian toy nanalis-alis na ayaman diad Canaan, ta sikatoy segurado a nakayarian met lanlamang na saray ilalak to iyan dalin. Tan sikatoy akaparaan a mangibagat ed si Isaac, ta matalek a no nakaukolan et bilayen lamet nen Jehova si Isaac.—Hebreos 11:8, 9, 17-19.
Say sankanonot nen Abraham et say arapen, aliwan say apalabas. Anggano mas mainaway bilay di Abraham tan Sara diad Ur nen say diad Canaan, “agda la sankanonot imay bansan tinaynan da.” (Hebreos 11:15, Today’s English Version) Imbes, say ninonot da et no panon a sikara tan saray ilalak da et bendisyonan na Dios diad arapen.—Hebreos 11:16.
Kasin walay malet a basiyan na pananisia nen Abraham? On, ta tinoor nen Jehova so amin a sipan to. Kalabas na panaon, dinmakel so ilalak nen Abraham ya anggad nagmaliw a nasyon na Israel. Asabi panaon, nanayam iray Israelita diad Canaan, samay mismon dalin ya insipan nen Jehova ed si Abraham.—Josue 11:23.
ANTORAY NAARALAN TAYO? Makapanmatalek tayon tooren nen Jehova iray sipan to. Anggano parad totoo et singa imposible so arum ed sarayan sipan, kombinsido itayon “diad Dios et posible so amin a bengatla.”—Mateo 19:26.
Naaralan tayo met ed alimbawa nen Abraham a say nonoten tayo et aliwan say apalabas, noag say maabig a nagawad arapen. Ontan so ginawa nen Jason. Walay graben sakit to ya lapud satan et aparalisa so interon laman to. “Aminen ko ya no maminsan et il-iliwen koy apalabas,” so kuan nen Jason. Onia ni imbaga to: “Say talagan il-iliwen ko et saray angkekelag a bengatla, singa say ilakap kod asawak ya si Amanda.”
Balet, mabiskeg so pananisia nen Jason ya tooren nen Jehova iray sipan to, kaiba lay sipan ton magmaliw a paraiso so dalin tan saray totoon walaay pananisia et ikdan toy bilay ya andi-anggaan, a diad satan et anggapo lay sakit tan makmaksil lay laman. * (Salmo 37:10, 11, 29; Isaias 35:5, 6; Apocalipsis 21:3, 4) “Papanonotan koy sarilik ya walay maabig a nagawad arapen,” kuan nen Jason, tan oniay inyarum to: “Magano lan naandi stress, kapagaan, ermen, tan gonigon, anggapo la ‘rayad andi-angga.” Talagan makapadinayew so pananisia nen Jason, singa si Abraham!
[Paimano ed leksab]
^ par. 9 Pian mas naaralan so nipaakar ed paraiso diad dalin, nengnengen so kapitulo 3, 7, tan 8 na libron Anto so Peteg ya Ibabangat na Biblia? ya im-publish na saray Tasi nen Jehova.
