Paibangat ed Salita na Dios

Kasin Ipapaamta na Biblia so Nagawa ed Arapen?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na saray Tasi nen Jehova irayan ebat.

1. Kasin espisipiko iray propesiyad Biblia?

Say Makapanyarin Amin a Dios labat so makaamta no antoy detalyadon nagawa ed arapen. (Amos 3:7) Alimbawa, nensaman ni et impasakbay to lay isabi na Mesias, odino Kristo. Say Mesias et manlapud poli na matoor a toon si Abraham. Sikatoy magmaliw a manuley ya manggawan posible parad matulok a totoon nagamoran so bendisyon na perpekton bilay ya anggapoy sakit. (Genesis 22:18; Isaias 53:4, 5) Sayan Insipan a Sakey et iyanak ed Betlehem.​—Basaen so Miqueas 5:2.

Apaneknekan a si Jesus so Mesias. Masulok ya 700 a taon antis ya nagawa, impasakbay na Biblia a say Mesias et iyanak na sakey a birhen tan sikatoy mudmoraen. Iter toy bilay to parad kasalanan na dakel, tan niponpon ed lubok na saray mayayaman. (Isaias 7:14; 53:3, 9, 12) Impasakbay met na Biblia, masulok ya 500 a taon antis ya nagawa, a sikatoy onsabid Jerusalem ya akalugan ed asno tan sikatoy traidoren parad 30 piraso na pilak. Amin a detalye et tinmua.​—Basaen so Zacarias 9:9; 11:12.

2. Kasin mangipapasakbay na petsa so Dios?

Masulok ya 500 a taon antis a nagawa, impropesiya na Biblia so eksakton taon ya napatnagan so Mesias. Nakalkula so panaon anggad isabi to panamegley na simbolikon simba na taotaon, a kada “simba” et pitoran taon so karukey to. Walay 7 tan 62 a simba, odino 69 a simba na taotaon. Ami-amin et walay 483 a taon. Kapigan itan ginmapo? Unong ed Biblia, ginmapo iya sanen sinmabid Jerusalem si Nehemias tan inggapo ton ipaalagey lamet so syudad. Pruebaan na history na Persia a satan et nen 455 B.C.E. (Nehemias 2:1-5) Kalabas na 483 a taon, abautismoan si Jesus bilang say Mesias. Satan et nen taon 29 C.E., eksaktod samay propesiya.​—Basaen so Daniel 9:25.

 3. Kasin nagagawa la natan iray propesiya ed Biblia?

Impropesiya nen Jesus iray importantin nagawa ed panaon tayo. Binitla tod propesiya to so maong a balita na Panarian, ya mangiter na inawa ed totoon mangaaro ed Dios diad interon mundo. Panampoten na Panarian so mauges a sistema a pambibilayan tayo.​—Basaen so Mateo 24:14, 21, 22.

Detalyadon idedeskribe na Biblia so nakekeraan a panaon na sayan mauges a sistema na mundo. Ipapanengneng na Biblia ya deralen na totoo so dalin, duma iya ed iilaloan a nagawa diad panaon na iyaaligwas. Onloor iray problema lapud guerra, kakulangay naakan, yegyeg, tan makaalis iran sakit. (Lucas 21:11; Apocalipsis 11:18) Onabeba so moral na totoo. Diad sarayan mairap a panaon, ipulong na saray papatumbok nen Jesus so maong a balita na Panarian na Dios ed interon dalin.​—Basaen so Mateo 24:3, 7, 8; 2 Timoteo 3:1-5.

4. Antoy nagawad totoo diad arapen?

Dakel a maabig iran bengatla so itarya na Makapanyarin Amin a Dios parad matoor a totoo. Diad tawen, si Jesu-Kristo, say Mesias, kaiba iray 144,000 a pinili et manuley ed saray totoo diad dalin. Sikaray manuley ed Panarian diad loob na sanlibon taon. Napaoli iray inaatey tan nawalaan iray pankanawnawan nibilang a makanepegan ed bilay ya andi-anggaan. Ontan met, paabigen na Panarian so amin a totoon mabilay ed satan a panaon. Anggapo lay sakit tan patey.​—Basaen so Apocalipsis 5:10; 20:6, 12; 21:4, 5.

Parad kaaruman ya impormasyon, nengnengen so pahina 23-25 tan 197-201 na libron Anto so Peteg ya Ibabangat na Biblia? walad litrato.