Uumanen na Biblia so Bilay

PANON ya aromog na sakey a kalangweran a bii ya walaan na maer-ermen ya impanugaw so tuan liket ed bilay? Antoy amakiwas ed sakey a bayolenti tan rebelde ed gobierno a magmaliw ya mareen a ministro? Basaen tayoy istorya da.

“Pirpirawat Koy Naaro.”​—INNA LEZHNINA

TAON NA INKIANAK: 1981

BANSA: RUSSIA

APALABAS: MAER-ERMEN YA IMPANUGAW

ISTORYAY BILAY KO: Nianak ak lan emel, tan emel met iray ateng ko. Maliket so bilay ko manlapu nen inyanak ak ya anggad anemiran taon ko. Balet ta nandiborsyo iray ateng ko. Anggaman uga-ugaw ak ni, natatalosan ko la no antoy labay ya ibaga na diborsyo tan ansakisakit itan ed siak. Kayari ran nandiborsyo, nanayam ed Troitsk si tatay ko tan si kuyak, impila ak balet nen nanay ko diad Chelyabinsk. Ag-abayag akiasawa lamet si nanay ko. Buanges so stepfather ko, tan mabetbet ton bugbogen si nanay ko tan anggan siak.

Nen 1993, nalner so inad-arok ya kuya. Lapud satan et naermenan a maong so pamilya mi. Manlapu lad saman et mainum lay nanay, tan bubugbogen to ak met la a singa gagawaen na stepfather ko. Labay koy nawalaan na maliket a bilay. Pirpirawat koy naaro. Kanian inmatendi ak ed nanduruman relihyon pian naligliwa, balet ta anggapoy agawa.

NO PANON YA INUMAN NA BIBLIA SO BILAY KO: Sanen 13 años ko la, walay kaklasek ya Tasi nen Jehova, ibabaga tod siak iray istoryad Biblia. Manliket ak nen naamtaan koy nipaakar ed saray karakter ed Biblia a singa si Noe tan Job ya nanlingkor ed Dios anggan diad mairap iran situasyon. Ag-abayag et inyaralan ak na saray Tasi tan onaatendi ak met lad saray aral da.

Diad panaaral ko na Biblia, alukasay nonot ko ed dakel iran marakdakep a katuaan. Atenyeg so pusok nen naamtaan kon walay ngaran na Dios. (Salmo 83:18) Pandinayewan koy suston impangipasakbay na Biblia ed saray nagawa diad “kaunoran iran agew.” (2 Timoteo 3:1-5) Aliketan ak met nen naamtaan koy ilalon kioli ed bilay. Imadyin, nanengneng ko lamet si kuyak!​—Juan 5:28, 29.

Balet, aliwan amin et akiliket ed balon naaaralan ko. Kabusol nen nanay ko tan na  stepfather ko iray Tasi nen Jehova. Kanian pipiliten da ak ya ontundad panaaral koy Biblia. Balet ta labalabay koy nanaaralan ko, tan agko labay so ontunda.

Aliwan mainomay a sungdoan so isusumpa na pamilyak. Insan wala lamet so makapaermen ya agawa, say agik a mimilad siak diad saray aral na Tasi nen Jehova et nalner met. Balet, naynay ya akaparaan iray Tasi ya ontulong ed siak. Aromog kod sikara so panangaro ya abaybayag ko lan pipirawaten. Amtak ya saya so tuan relihyon. Nen 1996, abautismoan ak bilang sakey a Tasi nen Jehova.

MARAKEP IRAN RESULTA: Natan et anem taon ak lan kasal ed si Dmitry, sakey a maomaong a laki. Manlilingkor kamin dua ed branch office na saray Tasi nen Jehova diad St. Petersburg. Asabi panaon, angumay panmoria na saray ateng ko ed pananisiak.

Misalsalamat ak ta akabat koy Jehova! Diad panlilingkor kod sikato, aromog koy tuan liket ed bilay.

“Dakel a Tepet so Mangogonigon ed Siak.”​—RAUDEL RODRÍGUEZ RODRÍGUEZ

TAON NA INKIANAK: 1959

BANSA: CUBA

APALABAS: REBELDE ED GOBIERNO

ISTORYAY BILAY KO: Inyanak ak ed Havana, Cuba, tan binmaleg ak ed lugar ya mabetbet so gulo. Diad ibabaleg ko, nagmaliw ak ya interesado ed judo tan arum iran isport ya walay laban.

Maong ak ya estudyante, tan pinaseseg ak na atateng ko ya manaral ed sakey ya unibersidad. Legan kon wadman, naisip kon kaukolan ya umanen so sistema na politika diad bansa mi. Kanian nanrebelde  ak. Kaibak so kaklasek ya linmusob ed sakey a pulis ta labay min samsamen so paltog to. Lapud saman ya impanlaban apuroan so ulo to. Akulong kamin dua ’may kaklasek tan asentensiaan kami ya pateyen diad firing squad. Diad saman et 20 años ko ni labat, balet ompatey ak la!

Diad prisoan, ipapasal ko la no panoy ikiwas ko diad arap na firing squad. Agko labay ya ipanengneng ya natatakot ak. Tan diad saman met et dakel a tepet so mangogonigon ed siak. Naisip kon: ‘Akin et anggapoy hustisya ed sayan mundo? Onia labat la kasi bilay?’

NO PANON YA INUMAN NA BIBLIA SO BILAY KO: Diad saginonor, linmemew so sentensia mi ta nagmaliw labat lan 30 taon a kipriso. Diad saya et akabat ko ray Tasi nen Jehova ya apriso lapud pananisia ra. Pandinayewan ko ray Tasi ta makmakpel balet ta mareen ira. Anggano agmakatunongay impakapriso ra, ag-ira sinmanok tan anggapoy sakit na linawa ra.

Imbangat ed siak na saray Tasi ya walay gagala na Dios parad totoo. Impanengneng dad siak ed Biblia a say dalin et gawaen na Dios a paraiso ya anggapo lay krimen tan ag-inkahustisya. Imbangat dad siak a say dalin et panayaman na maong a totoon walaay pankanawnawan manbilay ed andi-angga diad sankaabigan iran kipapasen.​—Salmo 37:29.

Naliliketan ak ed saray nanaaralan ko, balet ta dumay personalidad kod sikara. Naisip kon imposiblin magmaliw ak ya neutral ed politika odino agak ombawi no walay man-agrabyadod siak. Kanian binasak lan bukor so Biblia. Sanen asumpal ko la, ditan ko amorian saray Tasi nen Jehova labat so totoon miparay ugali ed saray Kristiano nensaman.

Diad panaaral koy Biblia, amoriak ya kaukolay baleg a pananguman ed bilay ko. Singa bilang, kaukolan kon umaney panagsalitak ta maayew ak. Kaukolan ko met ya itunday panagsigarilyok. Tan nepeg ko lan itunday pibabalik ed politika. Aliwa iyan mainomay parad siak, balet diad tulong nen Jehova, agawaan ko iraya.

Sakey ed saray mairap kon umanen et say pangontrol ed sanok ko. Ipipikasik ni ’yan siansia. Akatulong na baleg ed siak iray teksto ed Biblia a singa say Uliran 16:32, a mangibabagan: “Say matantan a manpasnok sikato so magmaong nen say makapanyari; [tan] say manuley ed espiritu to, nen say mangala na syudad.”

Nen 1991, abautismoan ak bilang sakey ed saray Tasi nen Jehova. Binautismoan da ak ed sakey a drum diad prisoan. Diad sinmublay a taon, nibulos so pigarad sikami tan imbaki da kamid Spain. Kasabik diman, inmatendi ak ya tampol diad aral na saray Tasi nen Jehova. Inawat ak na saray Tasi a singano abayag da ak lan kabat, tan tinulongan da ak ya mangigapo na balon bilay.

MARAKEP IRAN RESULTA: Maliket ak a manlilingkor ed Dios kaibay asawak tan saray anak min bibii. Dakel a panaon so nauusar kon ontulong ed arum a naaralan so Biblia. No maminsan et nanonotan ko sanen kalangweran ak ni ya ompatey ak la lawari, tan misalsalamat ak ed saray bendisyon ya agamoran ko manlapu lad saman. Agak labat mabilay, noagta wala met so ilalok. Tatalaranan koy insipan a Paraiso​—say panaon sano wala lay hustisya tan “anggapo lay ipapatey.”​—Apocalipsis 21:3, 4.

[Blurb ed pahina 19]

“Atenyeg so pusok nen naamtaan kon walay ngaran na Dios”

[Litrato ed pahina 20]

Sikamin sanasawa et maliket a manginanabang na saray publikasyon ed sign-language diad saray emel